សំណួរដែលអ្នកចាំបាច់គួរសន្ទនាជាមួយបុគ្គលិក ដើម្បីភាពរីកចម្រើនរបស់ក្រុមហ៊ុនអ្នក
សន្ទនាអំពីបញ្ហាមួយចំនួនជាមួយបុគ្គលិកអាចជារឿងលំបាកសម្រាប់ពិភាក្សាគ្នា ប៉ុន្តែបើអ្នកអាចធ្វើបាននោះវានឹងជួយអ្នកឲ្យបានរីកចម្រើនប្រសើរជាងមុនមិនខាន។ ខាងក្រោមនេះគឺជាសំណួរចំនួន៣ដែលអ្នកចាំបាច់គួរនិយាយជាមួយបុគ្គលិក៖
១) តើប្រាក់ចំណូលទទួលបានមកពីណាខ្លះ ? ៖ បើសិនជាបុគ្គលិករបស់អ្នកបានយល់ថាការងាររបស់ពួកគេ កិច្ចខិតខំប្រឹងប្រែងរបស់ពួកគេ អាចចូលរួមចំណែកជួយអ្វីខ្លះបានដល់ទស្សនវិស័យនៃក្រុមហ៊ុន និងភាពរីកចម្រើនរបស់ក្រុមហ៊ុន នោះវានឹងក្លាយជាកត្តាជំរុញកម្លាំងចិត្តប្រកបដោយភាពប្រាកដប្រជានឹងនមួយសម្រាប់ពួកគេក្នុងការជម្នះឧបសគ្គទាំងឡាយដើម្បីសម្រេចសមិទ្ធផលរបស់ខ្លួន។ មានបញ្ហាខ្លះៗអំពីរឿងលុយកាក់ដែលគួរតែរក្សាទុកសម្ងាត់រង់ចាំដំណោះស្រាយប្រសើរជាជាងដោយអាស្រ័យទៅលើការឈ្វេងយល់របស់អ្នកជាម្ចាស់ក្រុមហ៊ុនខ្លួនឯង ប៉ុន្តែការប្រាប់បុគ្គលិកអំពីថាតើការខិតខំរបស់ពួកគេនឹងជួយឲ្យមានការបង្កើនប្រាក់ចំណូលពីណាខ្លះ នោះវាជារឿងចាំបាច់មួយដែលអ្នកគួរពិចារណាធ្វើវា។
២) តើចំណុចខ្សោយរបស់ខ្ញុំជាមេដឹកនាំមានអ្វីខ្លះ? ៖ មនុស្សជាច្រើននៅពេលដែលមានមុខតំណែងខ្ពង់ខ្ពស់គ្រប់គ្រងគេ ពួកគេច្រើនតែក្អេងក្អាងពីចំណេះដឹងរបស់ខ្លួន សមត្ថភាពរបស់ខ្លួន សមិទ្ធផលរបស់ខ្លួនមិនថាជាសញ្ញាប័ត្រថ្នាក់ខ្ពស់ពីក្នុងស្រុកឬប្រទេសក្រៅ ឬអាងខ្សែបក្សពួកអ្វីនោះទេ។ មនុស្សដែលអួតក្អេងក្អាងមានមោទនភាពជ្រុលចំពោះខ្លួនឯង ច្រើនតែធ្លាក់ទៅក្នុងអន្ទាក់នៃចំណេះដឹងរបស់ខ្លួន ឬក្លាយជាទាសករនៃចំណេះដឹងរបស់ខ្លួននោះឯង ព្រោះចំណេះដឹងរបស់មនុស្សតែងមានដែនកំណត់។ មនុស្សដែលមានគតិបណ្ឌិត នឹងបន្ទាបខ្លួនគេឲ្យទាបនិងរៀនសូត្រពីមនុស្សជុំវិញខ្លួនជានិច្ច។
៣) តើនរណាដែលមិនគួរនៅបន្តទៀត? ៖ បុគ្គលិកចាកចេញបុគ្គលិកចូលថ្មី នេះគឺជារឿងធម្មតានោះទេ។ ប៉ុន្តែមុននឹងអ្នកសម្រេចចិត្តបញ្ឈប់ការងាររបស់បុគ្គលិកណាម្នាក់ នោះអ្នកគួរតែព្យាយាមយល់ពីបញ្ហារបស់ពួកគេដោយផ្ទាល់ជាមួយនឹងពួកគេសិន។ មនុស្សដែលខ្វះខាតសមត្ថភាពអាចត្រូវបានបណ្ដុះបណ្ដាលទៀតបាន ប៉ុន្តែបើសិនជាពួកគេលែងមានគោលដៅដូចគ្នាជាមួយនឹងអ្នកទៀតហើយ ហើយពួកគេក៏មិនសូវមានចិត្តចង់បន្តធ្វើការងារជាមួយអ្នកទៀត នោះអ្នកក៏គួរតែបញ្ឈប់ពួកគេបើសិនជាការងាររបស់ពួកគេបានប៉ះពាល់ដល់ភាពរីកចម្រើននៅក្នុងក្រុមហ៊ុនអ្នក៕
ដោយ៖ ស្រីពៅ
