អាហារ ៣ប្រភេទដែលទទួលទានច្រើនហើយ ធ្វើឲ្យអ្នកបែរជាឆាប់អស់កម្លាំង
អាហារមួយចំនួនមិនបានផ្ដល់ថាមពលដល់អ្នកដូចអ្វីដែលអ្នកគិតនោះទេ ហើយពួកវាមានតែធ្វើឲ្យអ្នកកាន់តែអស់កម្លាំងជាងមុនទៅទៀត។ ខាងក្រោមនេះគឺជាអាហារដែលអ្នកគួរចៀសវាងក្នុងការទទួលទានតាមតែអាចធ្វើបាន៖
១) អាហារសម្រន់(fast food)និងអាហារបំពងខ្លាញ់៖ ពពួកអាហារទាំងនេះមានវត្តមានរបស់អាស៊ីដខ្លាញ់ក្នុងកម្រិតខ្ពស់ និងវត្តមានរបស់ជាតិសរសៃក្នុងកម្រិតទាប ដែលជាហេតុបណ្ដាលឲ្យការរំលាយអាហាររបស់អ្នកអាចប្រព្រឹត្តទៅយឺតបាន។ បើកាលណាការរំលាយអាហាររបស់អ្នកយឺត វាក៏បន្ថយល្បឿនដែលជីវជាតិទាំងឡាយចូលទៅក្នុងរាងកាយរបស់អ្នកបានដែរ។ ម្យ៉ាងទៀតអាហារប្រភេទនេះច្រើនតែមិនសូវមានជាតិវីតាមីន សារធាតុខនិជ និងជីវជាតិបំប៉នចាំបាច់ដទៃៗទៀតនោះទេ ដែលការទទួលទានវាជាញឹកញាប់បែរជាធ្វើឲ្យអ្នកបាត់បង់ថាមពលច្រើនវិញបាន។
២) ភេសជ្ជៈថាមពល៖ ជាការពិតណាស់ ភេសជ្ជៈថាមពលពិតជាផ្ដល់ថាមពលដល់អ្នកមែន ប៉ុន្តែក្នុងរយៈពេលដ៏ខ្លីមួយប៉ុណ្ណោះ។ ក៏មានការសិក្សាមួយចំនួនបានរកឃើញថា ការទទួលទានភេសជ្ជៈថាមពលបានបង្កើនការចងចាំនិងការផ្ចង់ស្មារតីបានប្រមាណ២៤% បន្ថែមទៅលើការបំបាត់ងងុយ។ យ៉ាងណាមិញ ក្នុងភេសជ្ជៈទាំងនេះប្រើប្រាស់សុទ្ធតែសារធាតុដែលមានឥទ្ធិពលរំញោចនិងដាស់សតិថាមពលរបស់អ្នក ហើយវាថែមទាំងសម្បូរទៅដោយស្ករនិងជាតិកាហ្វេអ៊ីន។ មានភេសជ្ជៈថាមពលខ្លះមានវត្តមានរបស់ស្កររហូតដល់ទៅ៥២ក្រាមក្នុង១កំប៉ុង។ ការទទួលទានស្ករច្រើននឹងធ្វើឲ្យថាមពលរបស់អ្នកកើនឡើងរំពេចនោះយ៉ាងខ្លាំងក្លា បន្ទាប់ពីអស់ឥទ្ធិពលទៅ ថាមពលរបស់អ្នកក៏ធ្លាក់មកវិញយ៉ាងខ្លាំងផងដែរ ដែលជាហេតុនាំឲ្យអ្នកកាន់តែអស់កម្លាំងជាងមុនទៅទៀត។
៣) កាហ្វេ៖ កាហ្វេបើទទួលទានក្នុងបរិមាណសមគួរ នោះវានឹងមកនូវផលប្រយោជន៍វិជ្ជមានដល់សុខភាពរាងកាយក៏ដូចជាផ្លូវចិត្តរបស់អ្នក។ មានការសិក្សាដែលបានរកឃើញថា កាហ្វេអាចកាត់បន្ថយហានិភ័យពីការវិវត្តទៅនៃជំងឺដែលបណ្ដាលឲ្យប្រព័ន្ធប្រសាទចុះខ្សោយបានប្រមាណពី២៦%ទៅ៣៤%។ មនុស្សភាគច្រើនទទួលទានកាហ្វេដោយសារតែវាបានបង្កើនថាមពលនិងភាពស្វាហាប់ដល់ដំណើរការណ៍ខួរក្បាលរបស់ពួកគេ នៅពេលពួកគេអស់កម្លាំង។ ប៉ុន្តែ បើកាលណាទទួលទានជាប្រចាំ នោះរាងកាយរបស់អ្នកនឹងបន្សាំជាមួយនឹងឥទ្ធិពលរបស់វា ដែលធ្វើឲ្យអ្នកត្រូវទទួលទានវាច្រើនជាងមុនដើម្បីទទួលបានឥទ្ធិពលដូចពីមុន ហើយកាហ្វេអ៊ីននឹងប៉ះពាល់ដល់គុណភាពនៃការគេងរបស់អ្នក ដែលអាចធ្វើឲ្យអ្នកមានបញ្ហាគេងក្នុងរយៈពេលវែងបាន៕
ប្រភព៖ healthline.com
ប្រែសម្រួល៖ ស្រីពៅ
