ទាំងនេះគឺជាភេសជ្ជៈដែលអ្នកអាចទទួលទានជំនួសឲ្យកាហ្វេ សម្រាប់បង្កើនថាមពលបាន
កាហ្វេអាចផ្ដល់ប្រយោជន៍ចំពោះសុខភាពរបស់អ្នកនៅពេលអ្នកទទួលទានវាក្នុងបរិមាណសមល្មម។ តែបើអ្នកទទួលទានវាច្រើន នោះវាអាចធ្វើឲ្យអ្នកឆាប់អស់កម្លាំង កង្វះសារធាតុខនិជ និងអាចរំខានដល់ដំណេករបស់អ្នកបាន។ ដូច្នេះ បើសិនជាអ្នកចង់ស្វែងរកភេសជ្ជៈដែលអាចបង្កើនថាមពលរបស់អ្នក អ្នកអាចងាកមកជ្រើសរើសទទួលទានភេសជ្ជៈដែលមានប្រយោជន៍ដល់សុខភាពដូចមានរៀបរាប់ខាងក្រោមនេះវិញបាន៖
១) ទឹកបន្លែបៃតងក្រឡុក៖ ដោយសារតែបន្លែបៃតងគឺជាប្រភពនៃសារធាតុប្រឆាំងនឹងអុកស៊ីតកម្ម និងជីវជាតិបំប៉នជាច្រើនប្រភេទ វានឹងផ្ដល់ថាមពលដល់អ្នកនៅពេលអ្នកទទួលទានវាជំនួសឲ្យកាហ្វេ។ ម្យ៉ាងទៀត ពួកវាក៏សម្បូរជាតិដែក ដែលសារធាតុនេះអាចជួយការពារអ្នកពីជំងឺខ្វះគ្រាប់ឈាមក្រហម និងការឆាប់អស់កម្លាំងបាន។
២) ម្សៅតែបៃតង៖ តែបៃតងគឺជាជម្រើសដ៏ល្អបំផុតមួយដើម្បីទទួលបានថាមពលជំនួសឲ្យកាហ្វេ។ វាក៏មានជាតិកាហ្វេអ៊ីនដូចនឹងកាហ្វេដែរ ប៉ុន្តែស្ថិតក្នុងបរិមាណតិចតួចប៉ុណ្ណោះ ហើយថែមទាំងមានសារធាតុខនិជ វីតាមីន និងសារធាតុប្រឆាំងនឹងអុកស៊ីតកម្មផងដែរ។ លើសពីនេះ តែបៃតងក៏ត្រូវបានផ្សំឡើងពីអាស៊ីដអាមីណូ L-theanine ដែលអាស៊ីដនេះអាចបង្កើនការផ្ចង់ស្មារតីរបស់អ្នកនិងសមត្ថភាពចងចាំរបស់អ្នក។
៣) ទឹក៖ តើអ្នកមានដឹងទេថា សញ្ញានៃការអស់កម្លាំងកើតចេញមកពីកង្វះជាតិទឹកក្នុងរាងកាយរបស់អ្នក ? អ្នកវិទ្យាសាស្ត្របានរកឃើញថានៅពេលរាងកាយអ្នកមិនទទួលបានជាតិទឹកគ្រប់គ្រាន់ នោះវានឹងមិនអាចដំណើរការមុខងាររបស់វាបានពេញលទ្ធភាពរបស់វានោះឡើយ។ បើអ្នកមានអារម្មណ៍ថាអស់កម្លាំង ឈឺក្បាល ឬពិបាកនៅក្នុងការផ្ចង់ស្មារតី នោះវាអាចជាលទ្ធផលដែលបណ្ដាលមកពីអ្នកទទួលទានទឹកមិនបានគ្រប់គ្រាន់៕
ដោយ៖ ស្រីពៅ បានអានឬនៅ ? តើការពិសាភេសជ្ជៈ កូកាកូឡា ពិតជាអាក្រក់ចំពោះសុខភាពមែនទេ?
