ដើម្បីក្លាយជាបុគ្គលឆ្នើម គឺទាមទារឱ្យ​មានការលះបង់ខ្ពស់ចំពោះបុព្វហេតុការងារ  ​ពោល​គឺ​ទាំងពេលវេលា​ និង​កម្លាំងកាយចិត្ត​​គឺ​ធ្វើយ៉ាងណាដើម្បីឱ្យការងារនោះទទួលបានលទ្ធផលជាផ្លែផ្កា ឯក្រុមហ៊ុនក៏ទទួលបានភាពរីកចម្រើន ហើយបុគ្គលខ្លួនឯងក៏ក្លាយជាមនុស្សដែលគេកោតសសើរ​ហើយ​ត្រូវ​បាន​ក្រុមហ៊ុន​ផ្ដល់​នូវ​​ការ​លើក​ទឹក​ចិត្ត ឬ​អត្ថប្រយោជន៍​ផ្សេងៗ។

មានមនុស្សជាច្រើន  ដែលចង់ឱ្យ​ប្រធាន ឬថ្នាក់ដឹកនាំរបស់ពួកគេកោតសសើរខ្លួនថា ជាបុគ្គលិកឆ្នើម ប៉ុន្តែទន្ទឹមនឹងនោះ ពួកគេមិនបានដឹងទេថា ភាពជាបុគ្គលិកឆ្នើមត្រូវមានលក្ខណៈសម្បត្តិច្រើនយ៉ាងណាស់ដើម្បីក្លាយជាបុគ្គលម្នាក់​ត្រូវបានគេទទទួលស្គាល់ និងដាក់នាមថា ជាបុគ្គលិកឆ្នើម។ ចង់ដឹងថាតើ លក្ខណៈ បែបណាខ្លះទៅ ដែលធ្វើអោយអ្នកអាចក្លាយខ្លួនជាបុគ្គលិកឆ្នើមបាន?

ខាងក្រោមនេះគឺជាបុគ្គលិកលក្ខណៈសំខាន់ខ្លះៗដែលបានដកស្រង់ចេញពីគេហទំព័រ www.forbes.com ​ដើម្បី​ក្លាយ​ជា​បុគ្គលិក​ឆ្នើម

១) សកម្មភាពតម្រង់ទិស

អ្នកដែលមានលក្ខណៈបែបនេះគឺជាមនុស្សដែលសកម្ម និងចេះចាប់យកឱកាស។ ពួកគេអាចកែច្នៃភាពបរាជ័យ ឬឧបសគ្គ​ឱ្យ​ទៅជាឱកាស ហើយពួកគេតែងតែមានភាពជោគជ័យមានទំនុកចិត្តនិងគំនិតថ្មីៗផងដែរ។

២) វៃឆ្លាត 

ភាពឆ្លាតវៃអាចធ្វើ​ឱ្យ​មនុស្សទទួលបាននូវភាពជោគជ័យផងដែរ។ បុគ្គលដែលមានភាពវ័យឆ្លាត តែងតែដោះស្រាយបញ្ហាបានរហ័ស និងមិនបង្ករ​ឱ្យ​មានបញ្ហាស្មុគស្មាញច្រើនពេកនោះទេនៅក្នុងការងារ។

៣) មានមហិច្ឆតា

បុគ្គលិកបែបនេះ មិនត្រឹមតែជួយ​​ខ្លួនឯងរីកចម្រើននោះទេ តែក៏ធ្វើ​ឱ្យ​ក្រុមហ៊ុនកាន់ តែមានភាពរីកចម្រើនទៅតាមនោះផងដែរ។

ស្វ័យភាព៖ មានភាពម្ចាស់ការទៅលើការងារដែលខ្លួនបានទទួលខុសត្រូវ ពួកគេមិនចាំបាច់តាមសួរនាំចៅ ហ្វាយនាយគ្រប់ពេលវេលានោះទេ ពួកគេអាចចាត់ចែង និងសម្រេចចិត្តដើម្បីធ្វើកិច្ចការអ្វីមួយដើម្បីក្រុមហ៊ុន។ ហើយអ្វីដែលពិសេសជាងនេះទៅទៀតនោះ គឺបុគ្គលិកប្រភេទនេះតែងតែចាត់ទុកថា ក្រុមហ៊ុននេះ ជារបស់ខ្លួនពួកគេផ្ទាល់។

៤) បង្ហាញភាពជាអ្នកដឹកនាំ

ពួកគេតែងតែបង្ហាញនូវទំនុកចិត្តខ្លួនឯង និង គំនិតវិជ្ជមាន រួមទាំងទស្សនៈនៃភាព ជោគជ័យជាច្រើនតែងតែនៅក្នុងខួរក្បាលរបស់ពួកគេ។

៥) មានសន្ទុះការងារ

បុគ្គលិកដែលមកធ្វើការពោរពេញទៅដោយភាពស្រស់ស្រាយ និង ថាមពលជារៀងរាល់ ថ្ងៃនោះនឹងធ្វើការងាររបស់ពួកគេមានភាពរីកចម្រើនឥតគណនា ពីមួយថ្ងៃទៅមួយថ្ងៃឥឥឈប់ឈរផងដែរ។ បុគ្គលិកប្រភេទនេះ ធ្វើ​ឱ្យ​ក្រុមហ៊ុនរីកចម្រើនយ៉ាងឆាប់រហ័ស។

៦) ភាពជោគជ័យពីអតីតកាល

ប្រសិនបើបុគ្គលណាធ្លាប់មានប្រវត្តិជោគជ័យក្នុងកន្លែងការងារចាស់របស់ពួកគេ នោះច្បាស់ណាស់ ថាគេប្រាកដជាមានបទពិសោធន៍យ៉ាងត្រចះត្រចង់ និងអាចអភិវឌ្ឍភាពជោគជ័យនេះតទៅ មុខទៀតបានជាក់ជាមិនខាន។

៧) ភាពស្មោះត្រង់

បុគ្គលិកដែលមានទេពកោសល្យ មានច្រើនណាស់នៅលើពិភពលោក ប៉ុន្តែមនុស្សដែល មានភាពស្មោះត្រង់ គឺមិនមានច្រើននោះទេ ដូច្នេះហើយទើបភាពស្មោះគឺជារឿងសំខាន់ ព្រោះវាជាទំនុកចិត្ត មួយដ៏ធំ ដែលអ្នកណា កន្លែងណាក៏ត្រូវការចាំបាច់។

៨) ល្អិតល្អន់

មនុស្សបែបនេះ មិនប្រហែសងាយៗនោះ ពួកគេធ្វើការដោយយកចិត្តទុកដាក់ម៉ត់ចត់ ល្អិតល្អន់ជាពិសេសគឺពួកគេ មិនងាយជួបរឿងភ្លាំងភ្លាត់នោះទេ ហើយមនុស្សបែបនេះពិបាករកបន្តិចហើយ។

គំរូមួយ​នៃ​ភាព​ជា​បុគ្គលិក​ឆ្នើម​របស់​យុវជន​ម្នាក់

​លោក រស់​ សាត​ ដែលមានស្រុកកំណើតនៅខេត្តស្វាយរៀង ដែលសព្វថ្ងៃនេះលោកជា​ប្រធាន​ផ្នែក លក់ និងទីផ្សារ នៅក្នុងក្រុមហ៊ុន Acta Bio បានបង្ហាញពីប្រវត្តិតស៊ូក្នុងការងារជាច្រើនឆ្នាំរបស់លោក និងកិច្ចខិតខំប្រឹងប្រែង រួមទាំងការតាំងចិត្តដ៏មុតមាំរបស់លោកទម្រាំតែមានថ្ងៃនេះ។ លោកបានថ្លែងថា ដើម្បីក្លាយជាបុគ្គលិកឆ្នើមមួយរូប សម្រាប់ខ្លួនលោកផ្ទាល់តែងតែអនុវត្តនូវបុគ្គលិកលក្ខណៈមួយចំនួនដូចជា៖

ភាពស្មោះត្រង់ ការតស៊ូអត់ធ្មត់ មិនងាយបោះបង់អ្វីមួយងាយៗ មានភាពវ័យឆ្លាតក្នុងការស្វះស្វែងរក ទីប្រឹក្សាដែលមានបទពិសោធន៍ច្រើន រៀនកែប្រែខ្លួនឯងជាប្រចាំ កុំគិតពីពេលវេលាខ្លាំងពេក ចេះស្វែងរកវិធីសាស្រ្តថ្មីៗ រួមទាំងការមានក្រុមការងារល្អជាដើម។

លោកបានបន្តទៀតថា សព្វថ្ងៃនេះ លោកក៏មានអាជីវកម្មផ្ទាល់ខ្លួនផងដែរ ប៉ុន្តែ លោកមើលឃើញថា ការងារ​នៅ​ក្នុង​ក្រុមហ៊ុន​ ACTA BIO ពិតជាជួយប្រជាជនបានច្រើន លោកក៏បានដាក់ចិត្តដាក់កាយទៅលើការងារយ៉ាងខ្លាំងក្លាតែម្ដងដោយលោកមានទស្សនៈថា “ការងារគឺជាជីវិត”។ លោកក៏បានលើកឡើងនូវ បុគ្គលិកលក្ខណៈមួយចំនួនដែលធ្វើ​ឱ្យ​យើង មិនអាចក្លាយខ្លួនជាបុគ្គលិកឆ្នើមផងដែរ ។

លោកបានមានប្រសាសន៍ថា​ ៖«ជាឧបសគ្គរបស់បុគ្គលិកដែលគាត់ធ្វើការ​ឱ្យ​គេ ខ្ញុំសង្កេត ឃើញ នៅពេលដែលគាត់សម្រេចធ្វើកិច្ចការមួយ គឺគាត់មើលឃើញរឿង ៣យ៉ាង សម្រាប់ខ្លួន ។ គាត់ផ្លាស់ប្តូរមកធ្វើកន្លែងយើងដោយសារ គាត់ទទួលបានបទពិសោធន៍ថ្មី ទីពីរគាត់ ចេញពីកន្លែង ចាស់មកកន្លែងយើងដោយសារ បានប្រាក់ខែច្រើនជាងមុន ហើយចំណុចទីបី នោះគឺគាត់ បានរៀនអ្វី ថ្មីៗពីកន្លែងយើង ប៉ុន្តែជាទូទៅឧបសគ្គបស់គាត់ភ្លេចរឿងមួយ គឺគាត់អត់បានគិតថាក្រុម ហ៊ុននេះបស់គាត់ទេ បា យើងៗខ្វះចំណុចមួយនេះចុងក្រោយ»។

ឆ្លើយតបដោយទឹកមុខញញឹម លោក រស់ សាត​ បានបង្ហើរនូវអនុសាសន៍ចុងក្រោយថា៖ «ជារួមខ្ញុំ ខ្ញុំអរគុណប្អូន ហើយខ្ញុំនៅតែសំនូមពរដល់យុវជន ​ឱ្យ​យុវជនគ្រប់គ្នាផ្ដោតទៅលើការ សិក្សា ជាចម្បង មិនដើម្បីតែខ្លួន ទីមួយដើម្បីខ្លួនយើង ទីពីរដើម្បីសង្គមជាតិ និងមនុស្សដែលយើង ស្រលាញ់។ ត្រូវរកវិធីណាក៏ដោយដើម្បីរួមចំណែកដែលត្រូវនឹងក្រមសីលធម៌ និងច្បាប់សកល។ ជាសំនូមពរ ចុះជួយយកអាសារការងារសង្គម ក៏ត្រូវសាកល្បងធ្វើកិច្ចការណាដែលជាគោលការរណ៍ការងារស្ម័គ្រចិត្ត ដើម្បីរៀនយកបទពិសោធន័ថ្មីៗ ។ យើងត្រូវរៀនមើលបរទេស គេធ្វើការមួយចំនួន ស្ម័គ្រចិត្តអីគេដើម្បីបានបទពិសោធន៍ បទពិសោធន៍នឹងហើយដែលគេកែប្រែខ្លួនគេ»។ ចុះចំណែកលោកអ្នកវិញ យល់ឃើញយ៉ាងណាដែរ?

ដោយ៖ ថា ហ៊ាង