នៅក្នុងជីវិតរស់នៅរបស់មនុស្សគ្រប់គ្នា  រមែងមានការទំនាក់ទំនងជាមួយគ្នា ​ប៉ុន្តែ​មិន​មែន​មនុស្ស​ទាំង​អស់​សុទ្ធ​តែ​ចង់​បង្កើត​ការ​ទំនាក់ទំនង​នោះ​ទេ។​​ ​ យើង​អាច​និយាយ​បាន​ថា​​ ​ ទំនាក់នងជាមួយនឹងអ្នកដទៃ ក៏អាស្រ័យលើបុគ្គលិក​លក្ខណៈរបស់បុគ្គល​​ម្នាក់ៗផងដែរ។ ជារឿងមួយដែលមនុស្សយើងកំពុងជួបនៅក្នុងការរស់នៅប្រចាំថ្ងៃ ដែលធ្វើឱ្យមានគម្លាតរវាងគ្នានឹងគ្នា រហូតមិនអាចបង្កើតទំនាក់ទំនង ជាមួយគ្នាបានគឺអាស្រ័យលើបុគ្គលិកលក្ខណៈបុគ្គលម្នាក់ៗដែលមានភាពខុសគ្នា។

នៅក្នុងករណីនេះដែរ យើងក៏បានសង្កត់ធ្ងន់ទៅលើមនុស្សពីរប្រភេទគឺ មនុស្ស​ប្រភេទ Introvert និងមនុស្ស​ប្រភេទ Extrovert។ តើមនុស្សពីរប្រភេទនេះ មានលក្ខណៈខុសគ្នាយ៉ាងណានៅក្នុងសង្គម?

ជាការឆ្លើយតប លោក ឈួរ ធាង ស្រេង ប្រធានក្រុមចិត្តខ្មែរ បានឱ្យដឹងថា មនុស្ស introvert ជាប្រភេទមនុស្សដែលមានបុគ្គលិកលក្ខណៈខាងក្នុង។ លោកថា បុគ្គលដែលមានបុគ្គលិកលក្ខណៈខាងក្នុង គឺមិនសូវចូលចិត្តនិយាយច្រើននោះទេ អ្វីដែលសំខាន់ពួកគេផ្តោតទៅលើការគិតតែខាងក្នុង ទាំងបញ្ហានៃការគិត អារម្មណ៍ជាដើម។

លោក បន្ថែមថា វាមានលក្ខណៈផ្ទុយពីមនុស្ស Extrovert ព្រោះមនុស្សប្រភេទ Extrovert ជាមនុស្សដែលចូលចិត្តទំនាក់ទំនងជាមួយសង្គម ហើយពួកគេងាយស្រួលក្នុងការបង្កើតមិត្តភាពជាមួយអ្នកដ៏ទៃបានយ៉ាងងាយស្រួល។ លោក ឈួរ ធាង ស្រេង ប្រធានក្រុមចិត្តខ្មែរ ទាក់ទងទៅនឹងលក្ខណៈពិសេសរបស់បុគ្គលទាំងពីរប្រភេទនេះ លោកក៏បានបន្តថា ចំពោះបុគ្គលដែលមានគាត់មានលក្ខណៈIntrovert ជាទូទៅគឺពួកគាត់គិតច្រើន មុននឹងនឹងនិយាយចេញមកក្រៅ ហើយពួកគេជាមនុស្សដែលចូលចិត្តនៅម្នាក់ឯងច្រើនជាងនៅក្នុងចំណោមមនុស្សច្រើនដោយអាចធ្វើការម្នាក់ឯងក៏បានដែលអាចផ្ចង់អារម្មណ៍ទៅលើការងាររបស់ខ្លួនឯងបានយូរ។

ក៏ប៉ុន្តែសម្រាប់បុគ្គលដែលមានលក្ខណៈExtrovert គឺពួកគេចូលចិត្តធ្វើការងារជាក្រុម ព្រោះបើមនុស្សនេះធ្វើការងារតែម្នាក់ភាគច្រើនផលិតភាពនៃការងារនោះមិនបានល្អឡើយ ហើយមនុស្ស Extrovert នេះ ពួកគេងាយនឹងជឿទុកចិត្ត និងងាយចុះសម្រុងជាមួយមនុស្សជុំវិញ។ កញ្ញា សុខ ស្រីនិច ពិតជាមិនអាចប្រកែកបានចំពោះលក្ខណៈខាងក្នុងរបស់មនុស្ស ដែលចូលចិត្តភាពស្ងៀមស្ងាត់ជាជាងភាពអ៊ូអរ។ កញ្ញា សុខ ស្រីនិច ជានិស្សិតឆ្នាំទី៣ ផ្នែកច្បាប់ នៃសកលវិទ្យាល័យកម្ពុជា បានបង្ហាញការយល់ឃើញថាខ្លួនឯងជាមនុស្ស introvert (មនុស្សស្ងប់ស្ងាត់)។ កញ្ញាគិតថាខ្លួនឯងជាមនុស្សដែលពិបាកចូលចុះជាមួយអ្នកដទៃណាស់ ព្រោះកញ្ញាមិនសូវចូលចិត្តនិយាយច្រើន ហើយក៏មិនសូវចូលចិត្តកន្លែងដែលមានមនុស្សនៅជួបជុំច្រើនដែរ។ កញ្ញាបានបន្ថែមថាដោយសារចរិកលក្ខណៈស្ងប់ស្ងាត់បែបនេះ ធ្វើឲ្យកញ្ញាពិបាកក្នុងការបង្កើតមិត្តភក្ដិថ្មីៗ ហើយក៏មិនងាយស្រួលក្នុងការធ្វើទំនាក់ទំនងជាមួយមនុស្សនៅជុំវិញខ្លួនដែរ ព្រោះជារឿយៗគឺមិនសូវចេះនិយាយរកគេមុន ដែលកត្តានេះធ្វើឲ្យអ្នកដទៃយល់ថាកញ្ញាជាមនុស្សវាយឬក។កញ្ញាយល់ថាការធ្វើជាមនុស្សស្ងប់ស្ងាត់គឺល្អ ព្រោះនៅពេលដែលយើងមិនសូវនិយាយនោះគឺយើងមិនសូវខុស ហើយម៉្យាងទៀតអ្នកដទៃនឹងមិនដឹងថាយើងកំពុងគិតអ្វី ហើយម៉្យាងការនៅស្ងប់ស្ងាត់ធ្វើឲ្យកញ្ញាអាចប្រមូលអារម្មណ៍ធ្វើអ្វីមួយបានល្អ ។ ប៉ុន្តែទន្ទឹមនឹងនេះក៏មានចំណុចមួយចំនួនដែលកញ្ញាមិនសូវពេញចិត្តចំពោះចរិកលក្ខណៈរបស់ខ្លួនឯងផងដែរ «ពេលខ្លះចង់ផ្លាស់ប្ដូរខ្លួនឯងដែរ តែពេលខ្លះទៀតក៏គិតថាគ្មានអ្វីដែលគួរកែប្រែទេ»។

លោក តាន់ ម៉េងហ័រ ផ្ទុយពីកញ្ញា សុខ ស្រីនិច ដែលកញ្ញា ជាមនុស្ស Introvert។ ជានិស្សិតជំនាញអេឡិចត្រូនិចនៃសាលាបច្ចេកទេសដុនបូស្កូភ្នំពេញ។ លោក តាន់ ម៉េងហ័រ បានបង្ហាញការយល់ឃើញចំពោះខ្លួនឯងថាលោកជាមនុស្សរួសរាយម្នាក់ (extrovert) ។ មូលហេតុដែលនាំឲ្យយល់ដូច្នេះ ព្រោះលោកសង្កេតឃើញថាខ្លួនឯងចូលចិត្តនិយាយសំណេះសំណាលជាមួយមនុស្សនៅជុំវិញខ្លួន ហើយចូលចិត្តការជួបជុំជាមួយបងប្អូន ព្រមទាំងមិត្តភក្ដិ និងចូលចិត្តបង្កើតទំនាក់ទំនងជាមួយអ្នកដទៃ ដែលកត្តានេះធ្វើឲ្យគេក្លាយជាមនុស្សម្នាក់ដែលមានមិត្តភក្ដិច្រើនទោះទៅដល់ទីណាក៏ដោយ។ យុវជនរូបនេះបានបន្ថែមថា ការចេះនិយាយលេងសើចគឺដូចជាបច្ចេកទេសមួយដ៏ប្រសើរក្នុងការទំនាក់ទំនងជាមួយអ្នកដទៃ ហើយងាយស្រួលសម្របខ្លួនក្នុងសង្គម ប៉ុន្តែទន្ទឹមនឹងនេះដែរវាក៏ផ្ដល់ផលមិនល្អផងដែរ ព្រោះថាការលេងសើចច្រើននាំឲ្យកើតមានបញ្ហានៅពេលខ្លះដែលអាចធ្វើឲ្យអ្នកដទៃខឹង។

«រាប់អានមនុស្សច្រើន ស្គាល់គេឯងច្រើនគឺជារឿងល្អ វានឹងផ្ដល់ផលល្អដល់យើងបើសិនថ្ងៃណាមួយយើងមានរឿងចង់ពឹងពាក់គេ» នេះជាការលើកឡើងរបស់លោក។ជាចុងបញ្ចប់លោកបានបញ្ជាក់ថាលោកពេញចិត្តចំពោះចរិកលក្ខណៈរបស់លោក ទោះបីពេលខ្លះចូលចិត្តនិយាយច្រើនបន្តិចមែនតែមានភាពម៉ត់ចត់។

តាមរយៈ​គេហទំព័រ​ www.16personalities.com បានលើកឡើង​ទាក់ទងទៅនឹងលក្ខណៈខុសគ្នាដែលគួរឱ្យកត់សម្គាល់រវាងមនុស្ស Introvert និងមនុស្ស Extrovert​ យក​មក​បង្ហាញ​ផង​ដែរ៖

១. Introvert ជាមនុស្សដែលនៅដាច់ឆ្ងាយពីអ្នកដទៃ តែextrovertចូលចិត្តនិយាយជាមួយអ្នកដទៃ។

2. មនុស្ស introverts ច្រើនតែស្ដាប់ជាជាងនិយាយ Extrovert ច្រើនតែបង្ហាញពីគំនិតរបស់ពួកគេចេញមកក្រៅ។

3. មនុស្ស introverts ពេញចិត្តចំពោះការដែលបាននៅជាមួយខ្លួនឯង ចំណែកមនុស្សextrovertចូលចិត្តចំណាយពេលវេលានៅជាមួយគ្រួសារ និងមិត្តភក្ដជាដើម ហើយចូលចិត្តការចូលរួមក្នុងសង្គម។

4. មនុស្ស introverts មើលទៅហាក់ដូចជាស្ងៀមស្ងាត់តែខាងក្នុងសកម្ម ខុសពីមនុស្សextrovertដែលបង្ហាញការគិតចេញមកក្រៅ។

5. មនុស្ស introverts មិនចូលចិត្តការផ្លាស់ប្ដូរទេ ចំណែកឯមនុស្សextrovert ទទួលយកការផ្លាស់ប្ដូរបានយ៉ាងងាយ និងឆាប់សម្របខ្លួនបាន។

6. មនុស្សextrovert ជាអ្នកដែលអាចនិយាយពីខ្លួនឯងប្រាប់អ្នកដទៃដោយសេរី ។

7. ចំណុចពិសេមួយរបស់មនុស្ស introverts គឺពួកគេអាចផ្ដោតអារម្មណ៍យ៉ាងជ្រៅទៅលើអ្វីមួយ នៅខណៈដែលមនុស្សextrovertងាយទទួលការរំខានដែលធ្វើឲ្យគេផ្ដោតអារម្មណ៍មិនបានយូរ។

លោក ឈួរ ធាង ស្រេង មានប្រសាសន៍​ថា យើងមិនអាចផ្លាស់ប្តូរបានឡើយចំពោះបុគ្គលិកលក្ខណៈរបស់មនុស្សម្នាក់ៗ ប៉ុន្តែបើតាមការសិក្សាបែបចិត្តសាស្ត្រ គឺគេលើកទឹកចិត្តដល់ពួកគាត់ ទៅតាមអ្វីដែលគាត់អាចធ្វើបាន ដូចជាការសិក្សាទៅលើជំនាញ ដែលអាស្រ័យលើចំណង់ចំណូលចិត្ត និងបុគ្គលិក​លក្ខណៈ​របស់ពួកគេទាំងស្រុង៕

អត្ថបទ៖ ហៀងរ័ត្ន និង​រ៉ុន អូន