ហេតុអ្វីអ្នកមិនគួរបោះចោលគ្រាប់ល្ហុង?
ជាទូទៅនៅពេលយើងចិតផ្លែល្ហុងទទួលទានម្ដងៗ យើងតែងតែបោះចោលគ្រាប់របស់ផ្លែល្ហុង និងទុកតែសាច់សម្រាប់ទទួលទានតែប៉ុណ្ណោះ។ ប៉ុន្តែអ្នកអាចប្រហែលជាមិនដឹងទេថាសូម្បីតែគ្រាប់របស់ល្ហុងក៏ដោយ ក៏សម្បូរដោយអត្ថប្រយោជន៍ច្រើនសម្រាប់សុខភាពរបស់យើងដែរ។ គ្រាប់ល្ហុងមានរសជាតិល្វីងហើយហិល ប៉ុន្តែការបន្ថែមវាបន្តិចបន្តួចចូលទៅក្នុងរបបអាហារប្រចាំថ្ងៃរបស់អ្នក នឹងអាចជួយអ្នកក្នុងការទប់ទល់ជាមួយជំងឺផ្សេងៗជាច្រើន។ ខាងក្រោមនេះគឺជាអត្ថប្រយោជន៍៣យ៉ាងសំខាន់ៗដែលបង្ហាញពីមូលហេតុដែលអ្នកមិនគួរបោះចោលគ្រាប់ល្ហុង៖
១) ល្អសម្រាប់សុខភាពថ្លើមរបស់អ្នក៖ គ្រាប់ល្ហុងត្រូវបានគេរកឃើញថាមានប្រសិទ្ធភាពសម្រាប់ព្យាបាលជំងឺក្រិនថ្លើម ដែលជាលទ្ធផលបណ្ដាលមកពីការទទួលទានភេសជ្ជៈមានជាតិអាល់កុលអស់រយៈពេលយូរ។ នៅពេលអ្នកមានជំងឺក្រិនថ្លើម ថ្លើមរបស់អ្នកអសមត្ថភាពក្នុងការកម្ចាត់ជាតិពុលចេញពីក្នុងរាងកាយ ដែលជាហេតុនាំឲ្យរាងកាយរបស់អ្នកក្លាយជាមានជំងឺ។ អ្នកអាចទទួលទានគ្រាប់ល្ហុងដោយយកគ្រាប់ល្ហុង៥ទៅ៦គ្រាប់មកកិនឲ្យម៉ត់រួចយកវាទៅលាយជាមួយទឹកក្រូចឆ្មារ ហើយទទួលទានឲ្យបានម្ដងឬ២ដងក្នុង១ថ្ងៃ។ ប៉ុន្តែបើអ្នកកំពុងប្រើប្រាស់ថ្នាំអ្វីមួយជាប្រចាំ នោះអ្នកគួរតែពិភាក្សាជាមួយគ្រូពេទ្យសិនមុននឹងទទួលទានវា ពុំនោះទេគ្រាប់ល្ហុងអាចមានប្រតិកម្មអវិជ្ជមានជាមួយថ្នាំរបស់អ្នកបាន។
២) ព្យាបាលបរាសិតនិងដង្កូវនៅក្នុងពោះវៀន៖ គ្រាប់ល្ហុងត្រូវបានអះអាងដោយការសិក្សាស្រាវជ្រាវថាមានប្រសិទ្ធភាពសម្រាប់ព្យាបាលបរាសិតនិងដង្កូវនៅក្នុងពោះវៀន។ គ្រាប់ល្ហុងមានផ្ទុកសមាសធាតុម្យ៉ាងហៅថា Carpaine ដែលមានភាពខ្លាំងក្លានៅក្នុងការសម្លាប់បរាសិតនិងដង្កូវនៅក្នុងពោះវៀនដែលចម្លងរោគដល់ពោះវៀនរបស់អ្នក។ ម្យ៉ាងទៀតសមាសធាតុCarpaineនេះក៏ជួយសម្រួលដល់ចលនាពោះវៀនរបស់អ្នកដែរ ហេតុនេះអ្នកអាចនឹងជួបប្រទះនូវរោគសញ្ញាមិនធម្មតានៃការបញ្ចេញចោលលើកដំបូង តែអ្នកមិនគួរភិតភ័យនោះឡើយ។ ប៉ុន្តែបើអ្នកបន្តជួបប្រទះរោគសញ្ញាអាក្រក់ក្នុងរយៈពេលយូរ នោះអ្នកគួរឆាប់ពិភាក្សាជាមួយគ្រូពេទ្យ។
៣) មហារីក៖ គ្រាប់ល្ហុងត្រូវបានគេរកឃើញថាមានផ្ទុកសមាសធាតុដែលអាចជួយគ្រប់គ្រងនិងបញ្ឈប់ការលូតលាស់របស់កោសិកាមហារីកនិងការលូតលាស់របស់ដុំសាច់មហារីក។ ពួកវាមានប្រសិទ្ធភាពខ្លាំងបំផុតក្នុងការព្យាបាលជំងឺមហារីកថ្លើម ក្រពេញប្រូស្តាត សុដន់ មហារីកគ្រាប់ឈាម និងពោះវៀនធំ៕
ដោយ៖ ស្រីពៅ
