មូលហេតុ ៣យ៉ាងដែលអ្នកគួរទទួលទានពោតបារាំងជាប្រចាំ
បើទោះជាពោតបារាំងមិនសូវទទួលបានការពេញនិយមដូចជាបន្លែដទៃទៀត ក៏ប៉ុន្តែវាគឺជាបន្លែមួយប្រភេទដែលជាប្រភពនៃវីតាមីននិងសារធាតុខនិជសំខាន់ៗដូចជា វីតាមីនអា បេ សេ អឺ និងកា ក៏ដូចជាកាល់ស្យូម ដែក ម៉ាញេស្យូម ប៉ូតាស្យូម និងស័ង្កសី ហើយក៏សម្បូរដោយជាតិសរសៃដែលល្អសម្រាប់ការរំលាយអាហាររបស់អ្នកទៀតផង។ ខាងក្រោមនេះគឺជាអត្ថប្រយោជន៍ចំនួន៣របស់ពោតបារាំងដែលអ្នកមិនគួរមើលរំលង៖
១) កាត់បន្ថយសម្ពាធឈាម
ពោតបារាំងគឺជាប្រភពដ៏ល្អសម្រាប់ទទួលបានសារធាតុខនិជនិងវីតាមីន ដែលរួមបញ្ចូលទាំងប៉ូតាស្យូម ដែលជាផ្នែកដ៏សំខាន់មួយសម្រាប់សុខភាពរបស់មនុស្ស។ ប៉ូតាស្យូមមានសារសំខាន់ក្នុងការរក្សាតុល្យភាពជាតិទឹក និងជួយបន្ធូរស្រាលសរសៃឈាម ដែលអាចកាត់បន្ថយសម្ពាធឈាម និងកាត់បន្ថយសម្ពាធដែលមានចំពោះប្រព័ន្ធបេះដូង។ នេះមានន័យថាឱកាសនៃការត្បៀតសរសៃឈាមនិងការស្ទះសរសៃឈាមត្រូវបានកាត់បន្ថយដោយសារការទទួលទានពោតបារាំងជាញឹកញាប់។
២) ជួយពង្រឹងប្រព័ន្ធភាពស៊ាំ
ការចូលផ្សំគ្នារវាងសារធាតុប្រឆាំងនឹងអុកស៊ីតកម្មច្រើនប្រភេទ ធ្វើឲ្យពោតបារាំងមានប្រយោជន៍សម្រាប់ប្រយុទ្ធទប់ទល់ជាមួយពពួករ៉ាឌីកាល់សេរី ហើយវត្តមានរបស់វីតាមីនសេដែលមានខ្ពស់នៅក្នុងពោតបារាំងក៏បានធ្វើឲ្យវាជួយពង្រឹងដល់ប្រព័ន្ធភាពស៊ាំផងដែរ។ វីតាមីននេះអាចជំរុញប្រព័ន្ធភាពស៊ាំឲ្យផលិតកោសិកាឈាមស ដែលអាចប្រយុទ្ធជាមួយនឹងធាតុបង្ករោគផ្សេងៗដែលអាចធ្វើឲ្យប្រព័ន្ធភាពស៊ាំទន់ខ្សោយបាន។
៣) ធ្វើឲ្យការមើលឃើញបានប្រសើរឡើង
ពោតបារាំងសម្បូរដោយវីតាមីនអា និងជាពិសេសគឺសារធាតុប្រឆាំងនឹងអុកស៊ីតកម្មដូចជា beta-carotene, xanthein និង lutein។ សារធាតុប្រឆាំងនឹងអុកស៊ីតកម្មគឺជាសមាសធាតុដ៏ខ្លាំងក្លាដែលអាចប្រយុទ្ធជាមួយពពួករ៉ាឌីកាល់សេរី ដែលបានទទួលខុសត្រូវចំពោះការចុះខ្សោយរបស់កោសិកា ដែលរួមទាំងចក្ខុប្រសាទរបស់អ្នក។ ទទួលទានពោតបារាំងឲ្យបានច្រើនជាប្រចាំ អាចការពារភ្នែករបស់អ្នកពីជំងឺភ្នែកឡើងបាយនិងការចុះខ្សោយទៅនៃចក្ខុប្រសាទរបស់អ្នកបាន៕
ដោយ៖ ស្រីពៅ
