លោក ហ៊ុយ សំបូរ នាយកសាលាភាសាអង់គ្លេស ECE៖ ៥ចំណុចដែលអាណាព្យាបាលត្រូវគិតគូរបើសម្រេចចិត្តឲ្យកូនរៀនសាលាឯកជន
បច្ចុប្បន្ននេះ នៅកម្ពុជាសាលារៀនឯកជនកំពុងតែរីកចម្រើនឡើងយ៉ាងច្រើនគួរឲ្យកត់សម្គាល់។ ទន្ទឹមគ្នានោះផងដែរ ឪពុកម្ដាយនិងអណាព្យាបាល មួយចំនួនដែលមានការមមាញឹកនឹង ការងារកំពុងតែមានទំនោរទៅលើការបញ្ជូនកូនៗរបស់ខ្លួនឲ្យទៅសិក្សានៅតាមសាលាឯកជន ដោយក្ដីរំពឹងពីការមើលថែទាំដិតដល់ពីសំណាក់សាលាមកលើកូនៗ។
ស្របគ្នានោះដែរលោក ហ៊ុយ សំបូរ នាយកសាលាភាសាភាសាអង់គ្លេស ECE បានផ្ដល់អនុសាសន៍ដល់អាព្យាបាលដែលមានបំណងជ្រើសរើសសាលាឯកជនសម្រាប់បុត្រធីតាឲ្យគិតនូវចំណុចសំខាន់ចំនួន ៥ខាងក្រោមនេះសិន៖
ទី១ សូមកុំមើលសាលាតែសម្បកក្រៅ៖ អាណាព្យាបាលគួរមើលពីស្ថានភាពខាងក្នុងរបស់សាលា ថាតើសាលាមានគោលការណ៍នៃការគាំពារកុមារដែរឬទេ? ដែលវាគឺជាផ្នែកដ៏សំខាន់មួយក្នុងការចូលរួមគាំពារបុត្រធីតាពីការរំលោភបំពានផ្លូវអារម្មណ៍ និងផ្លូវកាយ។
ទី២ សម្ភារៈឧបទេស និងគ្រូ៖ ក្នុងនាមជាឪពុកម្ដាយ ឬអណាព្យាបាលមិនត្រូវខ្លាចក្នុងការស្នើសុំសាលាចូលមើលថ្នាក់រៀនរបស់កូនឡើយព្រោះសម្ភារៈឧបទេសក៏ជាផ្នែកមួយដែលសំខាន់ដែរ មួយវិញទៀតត្រូវមើលទៅលើគ្រូបង្រៀន ជូនកាលសាលាខ្លះមិនមានសម្ភារៈឧបទេសសម្បូរបែបមែនប៉ុន្តែគេមានគ្រូដែលមានជំនាញនិងចេះច្នៃប្រឌិតខ្ពស់។
ទី៣ កម្មវិធីសិក្សា៖ ត្រូវមើលថាតើសាលាមានកម្មវិធីសិក្សាអ្វីខ្លះ ហើយក្នុងមួយថ្ងៃរៀនប៉ុន្មានម៉ោង តើក្នុងម៉ោងនិមួយៗរៀនពីអ្វីខ្លះ មានកម្មវិធីគោលឬកម្មវិធីបំណិនជីវិតនានាដែលយើងគិតថាអាចជួយកូនៗយើងឲ្យយល់ដឹងពីពិភពលោកឲ្យបានច្រើនឬទេ។
ទី៤ ចេះប្រៀបធៀបសាលា៖ អាណាព្យាបាលមួយចំនួនមានលទ្ធភាពត្រឹមតែសាលាតម្លៃមធ្យម ប៉ុន្តែអាណាព្យាបាលមួយចំនួនទៀតដែលមានធនធានគឺទាមទារតែសាលាដែលមានតម្លៃថ្លៃ ប៉ុន្តែយើងត្រូវគិតថាវាមានទាំងគុណសម្បិត្តនិងគុណវិបត្តិព្រោះថា សាលាខ្លះគាត់មានទាំងគុណភាពនិងតម្លៃដែលអាចទទួលយកបាន ដូច្នេះការជ្រើសរើសសាលាដែលមានតម្លៃអាចទទួលយកបាននិងមានទាំងគុណភាពគឺអាចជួយច្រើនដល់អណាព្យាបាល ប៉ុន្តែក៏មិនត្រូវជ្រើសសាលាដែលថោកពេកដែរ។
ទី៥ មើលទៅលើសុវត្ថិភាពរបស់កុមារ៖ មើលទៅលើបរិស្ថានជុំវិញរបស់សាលា ថាតើកន្លែងសិក្សារបស់គាត់មានកន្លែងណាដែលអាចបង្កគ្រោះថ្នាក់ដល់គាត់ដែរឬទេ ដូចជាមានកន្លែងដែលអាចធ្វើឲ្យគាត់ដួល ឬក៏មានសុវត្ថិភាពដែរទេពេលឆ្លងថ្នល់៕
អត្ថបទ៖ ជួប ស្រីរ័ត្ន
