ម្ចាស់ពានរង្វាន់ណូបែលបង្ហើបយុទ្ធសាស្ត្រមួយពីរបៀបវិនិយោគ មិនយកលុយទៅបោះចោលទទេៗ
លោក Harry Markowitz គឺជាជ័យលាភីពានរង្វាន់ណូបែលផ្នែកវិទ្យាសាស្ត្រសេដ្ឋកិច្ចឆ្នាំ ១៩៩០ ហើយជាអ្នកទទួលបានរង្វាន់ជ័យលាភី John von Neumann Theory ឆ្នាំ ១៩៨៩ ។ លោកត្រូវបានគេទទួលស្គាល់ថាជា "បិតាទ្រឹស្ដីផលប័ត្រសម័យទំនើប ឬ Modern Portfolio Theory" សម្រាប់ការងាររបស់លោកដែលបានរកឃើញដំណោះស្រាយប្រកបដោយភាពច្នៃប្រឌិតដើម្បីជួយដល់ប្រជាជនអាមេរិករាប់លាននាក់ឈានដល់ការសម្រេចគោលដៅនៅពេលចូលនិវត្តន៍ និងជួយឲ្យពួកគេអាចគ្រប់គ្រងលុយកាក់បានល្អប្រសើរ។
នៅក្នុងបទសម្ភាសន៍មួយជាមួយ Personal Capital លោក Markowitz ត្រូវបានចោទសួរថា តើអ្វីទៅជាដំបូន្មានល្អបំផុតរបស់លោកសម្រាប់សាធារណជនស្តីអំពីលុយ? លោកបានឆ្លើយតបថា ដំបូន្មានតែមួយគត់របស់លោកសម្រាប់ផ្តាំផ្ញើរទៅកាន់មនុស្សទូទៅ គឺការចេះវិនិយោគលុយឲ្យបានច្រើនយ៉ាង (Deversify)។ លោក Markowitz លម្អិតដូច្នេះថា ៖ "អនាគតមិនដូចអតីតកាលនោះទេ ហេតុដូច្នេះហើយអ្នកត្រូវតែប្រើលុយ ឲ្យបង្កើតលុយពីមុខជំនួញផ្សេងៗគ្នា"។ ផ្អែកលើការលើកឡើងរបស់លោកនេះមានន័យថា គឺជាវិធីសាស្ត្រមួយដែលអ្នកមិនត្រូវយកស៊ុតរបស់អ្នកទៅបោះចូលក្នុងកន្ត្រកតែមួយនោះទេ។
លោកបានបន្តថា កំហុសដ៏ធំមួយរបស់អ្នកវិនិយោគ ឬ អ្នកមានលុយនោះ គឺការយកលុយរបស់ខ្លួនទៅវិនិយោគលើជំនួញមួយតែមួយគត់។ នេះក៏ដោយសារតែពួកគេចូលចិត្តធ្វើតាមទម្លាប់ចាស់ផ្អែកលើទិន្នន័យលទ្ធផលមុខជំនួញដែលពួកគេធ្វើបានល្អបំផុតនៅពេលកន្លងមក យល់មិនច្បាស់ពីបរបទហិរញ្ញវត្ថុសម័យថ្មី ឬមកពីមានទំនុកចិត្តខ្ពស់លើអ្វីដែលខ្លួនបានធ្វើកន្លងមក។ លោកMarkowitz ពន្យល់ថា ៖ "ខ្ញុំឃើញអ្នកវិនិយោគចូលចិត្តយកលុយទៅវិនិយោគដូចជា នៅផ្សារភាគហ៊ុន S&P 500 ដាក់លុយជួញដូរលើភាគហ៊ុនក្រុមហ៊ុននេះ ឬ ភាគហ៊ុនក្រុមហ៊ុននោះជាដើម។ ប៉ុន្តែនេះមិនមែនជាវិធីសាស្ត្រដ៏ល្អនោះឡើយ ពីព្រោះថា បើវិស័យនេះដួលរលំទៅ អ្នកគ្មានជម្រើសផ្សេងទៀតនោះឡើយ។ ”។
បើយោងតាមការអះអាងរបស់លោក Markowitz នេះមានន័យថា អ្នកចាំបាច់ត្រូវចេះយុទ្ធសាស្ត្រចេះវិនិយោគលុយទៅលើមុខជំនួញច្រើនយ៉ាងលើសពី១ឡើងទៅ។ បើជំនួញមួយដួលរលំ នៅមានជំនួញមួយទៀតដែលអ្នកនឹងទទួលបានផលមកវិញ ដែលនេះហើយគុណសម្បត្តិដ៏ធំធេងនៃការប្រើយុទ្ធសាស្ត្រលុយតាមវិធីសាស្ត្រនេះ៕
ប្រភព៖ businessinsider
