មូលហេតុនៅពីក្រោយប្រជាជនហុងកុងម្នាក់ក្នុងចំណោម ១០ នាក់ គឺជាសេដ្ឋី
កាលពីឆ្នាំ ២០១៧ កន្លងទៅគេបានរកឃើញថា ទីក្រុងហុងកុងមានសេដ្ឋី ១លានអ្នក ពោលគឺបានកើនឡើង ១៥% បើធៀបទៅនឹងឆ្នាំ ២០១៦ កន្លងទៅ។ ក្នុងចំណោមសេដ្ឋីទាំងនេះ មានសេដ្ឋី ៦៨ ០០០ នាក់មានទ្រព្យសម្បត្តិចាប់ពី ១,២៥ លានដុល្លារឡើងទៅ នេះបើយោងតាមរបាយការណ៍ស្រាវជ្រាវរបស់ធនាគារអាមេរិក Citibank។
ជាមួយនឹងប្រជាជនសរុបប្រមាណ ៧,៣៦ លានអ្នក ការកើនឡើងនៃចំនួនអ្នកមានដ៏ច្រើនរបស់ប្រទេសនេះគឺដោយសារតែការឡើងថ្លៃនៃទីផ្សារភាគហ៊ុន និងកំណើនវិនិយោគក្នុងវិស័យអចលនទ្រព្យ។ កាលពីឆ្នាំ ២០១៧ កន្លងទៅ សន្ទស្សន៍ផ្សារភាគហ៊ុន Hang Seng Index របស់ខ្លួនបានឡើងថ្លៃសរុប ៣៦% ខណៈដែលវិស័យអចលនទ្រព្យបានកើនឡើង ១៤% ធ្វើឲ្យប្រជាជនហុងកុងទាំងប្រុសទាំងស្រី កាន់តែមានឡើង។ បើយោងតាមការលើកឡើងរបស់លោក Lawrence Lam តំណាងឲ្យធនាគារ Citibank ប្រចាំទីក្រុងហុងកុងបានឲ្យដឹងថា កំណើនក្នុងវិស័យផ្សារភាគហ៊ុន និងអចលនទ្រព្យគឺជាហេតុផលដ៏សំខាន់ធ្វើឲ្យប្រជាជនទីក្រុងនេះក្លាយជាសេដ្ឋីកាន់តែច្រើនឡើង និងមានកំណើនថែមទៀតនៅក្នុងឆ្នាំ ២០១៨នេះ។
លោកបានបកស្រាយថា ក្នុងចំណោមសេដ្ឋីហុងកុង និងចិនដីគោក ទ្រព្យសម្បត្តិ ៧០% របស់ពួកគេ បានមកពីវិស័យអចលនទ្រព្យ។ គិតជាមធ្យម សេដ្ឋីហុងកុងម្នាក់បានកាន់កាប់អចលនទ្រព្យ ៣,២ កន្លែងនៅក្នុងទីក្រុងហុងកុង ខណៈដែលសេដ្ឋីចិនដីគោក កាន់កាប់អចលនទ្រព្យ ៣,៧ កន្លែង។ ប៉ុន្តែសេដ្ឋីនានារបស់ដែនកោះមួយនេះកាន់កាប់អចលនទ្រព្យនៅក្រៅប្រទេសច្រើនជាងសេដ្ឋីចិនដីគោក ពោលគឺមាន ១,៣% ខណៈសេដ្ឋីចិនដីគោក មានត្រឹមតែ ០,៧% ប៉ុណ្ណោះ។
ក្រៅពីវិស័យអចលនទ្រព្យអ្នកមាននៅហុងកុងចូលចិត្តវិនិយោគជួញដូរលើផ្សារភាគហ៊ុន និងរូបិយប័ណ្ណនៅលើទីផ្សារជួញដូរធំៗជុំវិញពិភពលោក។ ក្រុមសេដ្ឋីទាំងនេះបានវិយោគលើទីផ្សាររូបិយប័ណ្ណចំនួន ១៤% និង ៩% ផ្សេងទៀតវិនិយោគលើផ្សារភាគហ៊ុន ខណៈដែលសេដ្ឋីចិនដីគោក វិនិយោគលើរូបិយប័ណ្ណ ១២% និង ៧% លើផ្សារភាគហ៊ុន។ យ៉ាងណាមិញ ចំណូលរបស់ប្រជាជនហុងកុង និងចិនដីគោកគឺមានប្រភពខុសគ្នា។ សេដ្ឋីហុងកុងទាំងនោះនិយាយថា ៥៥% នៃចំណូលដែលពួកគេរកបាន គឺបានមកពីប្រាក់ខែ ខណៈដែលសេដ្ឋីចិនដីគោកនិយាយថា ៥៥% នៃចំណូលរបស់ពួកគេបានមកពីការរកស៊ី។ ក្រៅពីនោះពួកគេបាននិយាយថា ពួកគេមានលុយដោយសារតែបានមកពីការវិនិយោគ និងមរតកពីឪពុកម្ដាយរបស់ពួកគេ។ ធនាគារខាងលើបានរកឃើញទៀតថា ៧១% នៃសេដ្ឋីសរុបមកពីចិនដីគោក មានជំនួញផ្ទាល់ខ្លួន ខណៈដែលសេដ្ឋីហុងកុងមានត្រឹមតែ ២១% តែប៉ុណ្ណោះ។ ប៉ុន្តែសេដ្ឋីមកពីតំបន់ទាំងពីរនេះនិយាយថា បរិស្ថានទីក្រុងហុងកុងមិនគួរឲ្យចង់រស់នៅនោះឡើយ ខណៈដែលសេដ្ឋីចិនដីគោក មានការព្រួយបារម្ភពីសុខភាពរបស់ខ្លួនកាន់តែច្រើនឡើងៗ ដែលនេះជាមូលហេតុធ្វើឲ្យសេដ្ឋីហុងកុង ១៧% មានគម្រោងផ្លាស់ទីលំនៅទៅរស់នៅប្រទេសផ្សេង ប្រៀបធៀបនឹងសេដ្ឋីចិន ២៦% មានគម្រោងដូចគ្នានេះ៕
ដោយ៖ សុរ៉ាន់ដា
