ហេតុអ្វីអ្នកគួរបង្កើតមិត្តភាពជាមួយមនុស្សមានលុយជាងអ្នក និងជោគជ័យជាងអ្នកឱ្យបានច្រើន?
ប្រសិនបើអ្នកកំពុងតស៊ូទៅនឹងការរកប្រាក់ចំណូលរបស់អ្នក ឬ ពិបាកនៅក្នុងការរកលុយឲ្យបានច្រើន អ្នកគួរបើកភ្នែកឲ្យបានធំៗហើយសំឡឹងមើលមនុស្សនៅជុំវិញអ្នក។ នៅក្នុងពិភពមួយដែលជោគជ័យផ្នែកហិរញ្ញវត្ថុ មិត្តភាពបានរួមចំណែកយ៉ាងសំខាន់មួយក្នុងកំណត់ពីភាពជោគជ័យហិរញ្ញវត្ថុរបស់អ្នកដែរ។ នេះមានន័យថា បើអ្នកចូលចិត្តរាប់អាន ឬមានទំនាក់ទំនងជាមួយនឹងបុគ្គលជោគជ័យហិរញ្ញវត្ថុ អ្នកក៏មានឱកាសជោគជ័យហិរញ្ញវត្ថុដូចគេដែរ។
បើដូច្នេះមែន អ្នកគួរតែបំភ្លេចចោលមិត្តភក្ដិចាស់ៗរាប់ឆ្នាំដែលខ្សត់ខ្សោយហិរញ្ញវត្ថុដូចអ្នក ហើយទៅរាប់អានមិត្តភក្ដិថ្មីៗដែលមានលុយច្រើនឬយ៉ាងណា? នេះមិនមែនជាអ្វីដែលអត្ថបទនេះចង់ឲ្យអ្នកធ្វើឡើយ ហើយនេះក៏មិនមែនចង់ស្នើឲ្យលោកអ្នកគួររាប់អានអ្នកណាម្នាក់ដោយគិតតែពីសម្លឹងមើលទឹកលុយរបស់គេជាធំនោះដែរ។
យ៉ាងណាមិញ អត្ថបទនេះចង់បង្ហាញអ្នកឲ្យបានស្វែងយល់ថា តើការទំនាក់ទំនងប្រចាំថ្ងៃរបស់អ្នកជាមួយមនុស្សជោគជ័យហិរញ្ញវត្ថុមានឥទ្ធិពលយ៉ាងណាដល់ស្ថានភាពហិរញ្ញវត្ថុរបស់អ្នក? គោលការណ៍ដ៏សំខាន់មួយដែលអ្នកគួរដឹងនៅពេលនេះគឺថា បើអ្នកចង់មានលុយបន្ថែម អ្នកគួរចំណាយពេលឲ្យបានច្រើន និងរាប់អានមនុស្សដែលមានលុយច្រើន ឬ ជោគជ័យជាងអ្នក។
ហេតុអ្វីអ្នកត្រូវធ្វើដូច្នេះ? ចម្លើយនោះគឺថា អ្នកជោគជ័យគឺជាបុគ្គលដែលមានសក្ដានុពលខ្លាំង។ មនុស្សមានសក្ដានុពលនឹងជួយអូសទាញអ្នកឲ្យទទួលបានគំនិតថ្មីៗ ហើយគំនិតថ្មីៗនឹងជួយឲ្យអ្នករកប្រាក់ចំណូលបានច្រើនជាងមុន។ នៅពេលនេះហើយដែលអ្នកចាប់ផ្តើមក្លាយជាមនុស្សថ្មីជោគជ័យដូចបុគ្គលទាំងនោះដែរ។
នេះជាមូលហេតុដែលក្នុងសង្គមនីមួយៗ អ្នកសង្កេតឃើញថា អ្នកមានចូលចិត្តរាប់អានអ្នកមានដូចគ្នា អ្នកជោគជ័យចូលចិត្តរាប់អានអ្នកជោគជ័យដូចគ្នា សិស្សពូកែ ចូលចិត្តរាប់អានសិស្សពូកែដូចគ្នាក៏ដូចជាអ្នកជំនួញចូលចិត្តធ្វើជំនួញជាមួយអ្នកជំនួញដូចគ្នាដែរ។ នៅក្នុងទិដ្ឋភាពជាក់ស្តែង អ្នកនឹងអាចស្វែងយល់បានថា អ្នកមានដូចជាសេដ្ឋី (Millionaire) ជាដើម ទស្សនៈរបស់ពួកគេអំពីលុយកាក់គឺពិតជាខុសស្រឡះពីគំនិតអ្នកក្រ និងមនុស្សវណ្ណៈ។ ប៉ុន្តែក្រុមសេដ្ឋីទាំងនោះនៅតែយល់ថា ពួកគេគ្រាន់តែជាមនុស្សធម្មតាម្នាក់ដែលគិតមិនចេញថា តើអាចក្លាយជាមហាសេដ្ឋី (Billionaire)ដោយរបៀបណា? ការពិតគឺនៅត្រង់ថា បើសេដ្ឋីទាំងនោះដឹងពីរបៀបក្លាយជាមហាសេដ្ឋីនោះ ពួកគេច្បាស់ជាក្លាយជាមហាសេដ្ឋីបាត់ទៅហើយ។
រឿងអីដែលពួកគេមានឈ្មោះត្រឹមតែជាសេដ្ឋីនោះ។ ដូច្នេះហើយទើបក្រុមសេដ្ឋីចូលចិត្តទៅកៀកក្រុមមហាសេដ្ឋីដើម្បីសុំរៀនសូត្រពីមនុស្សដែលជោគជ័យជាងខ្លួន។ ភាពខុសគ្នាមួយទៀតនៅក្នុងទំនាក់ទំនងរបស់មនុស្សធម្មតា និងអ្នកមាននោះគឺថា មនុស្សធម្មតាចង់ជួបសេដ្ឋីល្បីៗដើម្បីយកទៅអួតមិត្តភក្ដិ និងមនុស្សផ្សេងទៀត ខណៈដែលអ្នកមានចង់ជួបអ្នកមានលុយច្រើនជាងខ្លួនដើម្បីសុំចំណេះពីបុគ្គលទាំងនោះ។ សេដ្ឋីចង់ជួបមហាសេដ្ឋីគឺដើម្បីចង់ដឹងថា តើក្រុមមហាសេដ្ឋីមានគំនិតបែបណា?
ឥឡូវត្រឡប់មកមើលខ្លួនអ្នកវិញ! តើអ្នកអាចឆ្លើយបានទេថា នៅក្នុងទំនាក់ទំនងប្រចាំថ្ងៃរបស់អ្នក តើអ្នកមានទំនាក់ទំនងជាមួយអ្នកជោគជ័យ ឬ បុគ្គលជោគជ័យហិរញ្ញវត្ថុហើយឬនៅ? បើមាន តើមានប៉ុន្មាននាក់? បើចម្លើយឆ្លើយថា មិនទាន់មានទេនោះ សូមដាក់គោលដៅមួយឡើងនៅក្នុងឆ្នាំថ្មីនេះ ដើម្បីបញ្ជ្រាបខ្លួនបង្កើតទំនាក់ទំនងជាមួយមនុស្សដែលមានជាងអ្នក។ ហិរញ្ញវត្ថុរបស់អ្នកនឹងមានការប្រែប្រួលនៅពេលខាងមុខ៕
ដោយ៖ សារ៉ាន់ដារ
