ចំណុចសំខាន់ដែលអ្នកគួរដឹង ប្រសិនបើចង់បើកអាជីវកម្មប្រភេទដឹកជញ្ជូន Logistics!
បច្ចុប្បន្នវិស័យពាណិជ្ជកម្ម ការនាំទំនិញ និងផលិតផល ចេញចូលពីឬទៅបណ្ដាប្រទេសនានាមកកាន់ឬចេញពីកម្ពុជាកាន់តែសម្បូរបែបដែលបានបង្ហាញពីសក្ដានុពល និងការរីកចម្រើនគួរឲ្យកត់សម្គាល់នៅក្នុងវិស័យនេះ។ ខាងក្រោមនេះ គឺជាការចែករំលែករបស់លោក យន់ ភិរុណ ស្ថាបនិកក្រុមហ៊ុន Sunshine Logistics (Cambodia) Co., Ltd. ដែលជាក្រុមហ៊ុនកំពុងទទួលនូវប្រជាប្រិយភាព និងការគាំទ្រពីសំណាក់អតិថិជន Logistics ។
លោក យន់ ភិរុណ បានលើកឡើងថា ប្រភេទក្រុមហ៊ុន Logistics នេះ ប្រសិនបើយើងចង់បើកអាជីវកម្មដំបូងយើងត្រូវស្វែងយល់ពីបែបបទ និងពីនិតិវិធីគយឲ្យបានហ្មត់ចត់ជាមុនសិន។ បន្ទាប់ពីនោះមក យើងត្រូវធ្វើការប្រកាសពន្ធដារ ដោយបែបបទទាំងអស់នេះយើងត្រូវសិក្សារអំពីច្បាប់នៅក្នុងប្រទេសកម្ពុជាយើង បន្ទាប់ពីនោះយើងគ្រាន់តែគោរពទៅតាមច្បាប់គយ ច្បាប់ប្រទេស ក៏ដូចជាច្បាប់របស់រដ្ឋទៅគឺយើងអាចដំណើរការអាជីវកម្មប្រភេទនេះបានហើយ ដោយមិនមានអ្វីដែលជាបញ្ហាចោទទេ។
ក្នុងនោះផងដែរ ស្ថានិករូបនេះ បានចែករំលែកបន្ថែមទាក់ទងនឹងបញ្ហាចោទសម្រាប់ការដំណើរការក្រុមហ៊ុនប្រភេទ Logisticsនេះ ដោយលោកបានលើកឡើងថា បញ្ហាធំបំផុតនៅក្នុងការដំណើរការអាជីវកម្មផ្នែកដឹកជញ្ជូនសព្វថ្ងៃនេះគឺ ការប្រកួតប្រជែងដណ្តើមទីផ្សារ។ លោកបានបញ្ជាក់ថា ក្រុមហ៊ុនមិនត្រឹមតែត្រូវបង្កើនការជឿទុកចិត្តប៉ុណ្ណោះទេ ថែមទាំងត្រូវបង្កើនភាពងាយស្រួល និងតម្លៃឱ្យបានល្អដល់អតិថិជនខ្លួន ហើយនេះជាបញ្ហាធំសម្រាប់ក្រុមហ៊ុនទើបបើកថ្មី ឬក្រុមហ៊ុនដែលមិនសូវមានបទពិសោធន៍ក្នុងប្រតិបត្តិការច្រើន ជាពិសេសពេលមានបញ្ហាជាយថាហេតុកើតឡើងក្នុងកំឡុងពេលដឹកជញ្ជូន។
លោកបញ្ជាក់បន្ថែមថា កាលណាយើងយកចំណេញតិច យើងត្រូវបង្កើនចំនួនប្រតិបត្តិការ និងទាក់ទាញការបញ្ជាទិញសេវាកម្មពីអតិថិជនឱ្យបានច្រើន ទើបអាចធានាការចំណាយប្រចាំខែបាន តែអ្វីដែលល្អនោះគឺ បើសិនជាក្រុមហ៊ុនទូទៅអាចធ្វើយ៉ាងនេះបានគឺអាចឈានមុខគេ ក្នុងទីផ្សារ និងមាននិរន្តរភាពដូចក្រុមហ៊ុនលោកជាក់ជាពុំខាន។
បញ្ហាបន្ទាប់ខ្លះៗទៀតគឺ ការឡើងថ្លៃនៃក្រុមហ៊ុនកាប៉ាល់ដែលគេហៅថា THC (Terminal Handling Charge) ដែលមានន័យថា ជាថ្លៃលើកដាក់ពីកុងតាន័រ ពីកាប៉ាល់មកដាក់នៅចំណតកុងតាន័រដែលគេហៅថា CY (Container Yard) នៅកំពង់ផែ ដែលចេះតែបន្តឡើងថ្លៃមិនឈប់ឈរ។
ដូច្នេះបើប្រៀបធៀបទៅនឹងប្រទេសជិតខាងកម្ពុជាយើងនៅមានតម្លៃខ្ពស់ ដែលនេះ ជាបញ្ហានៃការប្រកួតប្រជែងខ្លាំងនៅក្នុងវិស័យនេះដែលធ្វើឲ្យអ្នករកស៊ីនៅក្នុងវិស័យនេះពិបាកខ្លាំងនៅក្នុងការទាក់ទាញអតិថិជន។
លោក យន់ ភិរុណ បានបន្តដោយខ្លីបន្ថែមទៀតថា ៖“ប្រសិនបើយើងមានឆន្ទៈស្រលាញ់មុខរបរណាមួយ យើងត្រូវតែតស៊ូធ្វើឲ្យអស់ពីចិត្តពីថ្លើម សឹងតែអាចនិយាយបានថា យើងដាក់ជីវិតនៅក្នុងការធ្វើអាជីវកម្មនោះ នោះយើងនឹងរីកចម្រើន”៕
អត្ថបទ៖ ជួប ស្រីរ័ត្ន
