នៅក្នុងវ័យនីមួយៗ អ្នកគួរតែបង្កើតទម្លាប់ហិរញ្ញវត្ថុដូចម្តេចខ្លះទើបមាន?
តើវ័យណាដែលអ្នកគួររៀបចំគម្រោងហិរញ្ញវត្ថុ? តាមពិត ការរៀបចំគម្រោងហិរញ្ញវត្ថុឲ្យបានត្រឹមត្រូវមួយ គឺជារឿងសំខាន់ណាស់សម្រាប់មនុស្សគ្រប់រូប ព្រោះថាភាពជោគជ័យហិរញ្ញវត្ថុគឺជាគ្រឹះមួយធ្វើឲ្យជីវិតរបស់អ្នករស់នៅធូរធារអាចសម្រេចបានអ្វីដែលអ្នកចង់បានភាគច្រើន។ បើអ្នកមិនទាន់ដឹងថា អ្នកគួរធ្វើអ្វីខ្លះដើម្បីជោគជ័យហិរញ្ញវត្ថុនៅក្នុងវ័យមួយទៅវ័យមួយទៀត សូមសាកល្បងធ្វើតាមដំបូន្មានខាងក្រោមនេះ៖
ពេលមានអាយុក្រោម ២០ តាមពិតអាយុក្រោម ២០ ការរកលុយមិនទាន់ក្លាយជាទំនួលខុសត្រូវរបស់យុវវ័យភាគច្រើននោះឡើយ ពោលគឺឪពុកម្ដាយជាអ្នករៀបចំទំនុកបម្រុងលើការចាយវាយផ្សេងៗដូចជាលើការសិក្សារៀនសូត្រជាដើម។ យ៉ាងណាមិញ នេះមិនមែនមានន័យថា អ្នកត្រូវជិះសេះលែងដៃរង់ចាំរហូតដល់អាយុ២០ ជាង ឬ ៣០ ទើបគិតគូរនោះទេ។ អ្នកត្រូវបង្កើតទម្លាប់ល្អមួយពីវ័យនេះទៅគឺ ១.ទម្លាប់រៀនសន្សំសំចៃក្នុងការចាយវាយមិនទិញអ្វីៗតាមតែអារម្មណ៍ ២.តាមដានរាល់ចរន្តចាយវាយរបស់អ្នកថា តើអ្នកបានចំណាយលើអ្វីខ្លះនៅក្នុងថ្ងៃនីមួយៗ?
ពេលមានអាយុ ២០ឆ្នាំឡើង នៅវ័យខ្ទង់២០ឡើង គឺជាវ័យមួយដែលចាត់ទុកថា អ្នកបានសិក្សារៀនសូត្រចប់ថ្នាក់មហាវិទ្យាល័យ ហើយចាប់ផ្តើមរកការងារធ្វើបង្កើតអាជីពការងារសម្រាប់អនាគតរបស់អ្នកបានហើយ។ ដូចនេះនៅក្នុងវ័យនេះ អ្នកគួរបង្កើតទម្លាប់គ្រប់គ្រងហិរញ្ញវត្ថុដូចជា៖ ១.រកលុយដោះបំណុលឲ្យបានឆាប់បំផុត បើមានបំណុល ២.ធ្វើការសន្សំលុយទុកដើម្បីយកទៅកសាងគ្រួសារ ឬ រកស៊ីវិនិយោគជាដើម ៣.ត្រូវមានទម្លាប់ចាយឲ្យតិចជាងចំណូល ៤.រៀបចំគោលដៅហិរញ្ញវត្ថុរយៈពេលខ្លី និងរយៈពេលវែងដូចជា ប្ដេជ្ញាសន្សំលុយឲ្យបាន ១០ ០០០ ដុល្លារក្នុងរយៈពេល៣ ឬ ៥ឆ្នាំជាដើម។
ពេលមានអាយុ៣០ឆ្នាំឡើង វ័យ ៣០ឆ្នាំឡើងជាវ័យមួយដែលអ្នកកំពុងសម្រួចអាជីពការងាររបស់អ្នកដើម្បីជោគជ័យហិរញ្ញវត្ថុ។ ដូចនេះហើយ អ្នកត្រូវរៀបចំគម្រោងហិរញ្ញវត្ថុមួយចំនួនដូចតទៅ៖ ១.ត្រូវរៀបចំប្រាក់សន្សំសម្រាប់ការចំណាយពេលមានអាសន្ន (Emergency Fund) យ៉ាងហោចណាស់បាន ៣ ទៅ ៦ខែពេលគ្មានប្រាក់ចំណូល ឬ សម្រាប់ចំណាយពេលមានឧបសគ្គផ្សេងៗ ២.ត្រូវសន្សំប្រាក់ដើម្បីកសាងគ្រួសារ ឬ វិនិយោគរកស៊ី ៣.សន្សំប្រាក់សម្រាប់វិនិយោគលើអនាគតកូនៗដើម្បីចូលរៀនចាប់ពីថ្នាក់ក្រោមដល់ថ្នាក់មហាវិទ្យាល័យ ៤.ចាប់ផ្តើមសន្សំប្រាក់សម្រាប់ការចំណាយនៅពេលអនាគតវែងឆ្ងាយ ឬ សម្រាប់ចូលនិវត្តន៍
ពេលមានអាយុ ៤០ ឆ្នាំ ឈានដល់៤០ គឺជាវ័យមួយដែលអ្នកត្រូវជោគជ័យទាំងហិរញ្ញវត្ថុ និងអាជីពការងារ។ ប៉ុន្តែការធ្វើការតែមួយមុខ ហើយគិតតែសន្សំប្រាក់ អ្នកមិនអាចដើរទាន់ទីផ្សារសាកលនោះឡើយ។ នៅមានកិច្ចការមួយចំនួនទៀតដែលអ្នកត្រូវធ្វើដើម្បីបង្កើនទ្រព្យដែលអ្នកមានស្រាប់ឲ្យកាន់តែច្រើនឡើងក្នុងនោះរួមមាន៖ ១.ចេះប្រើលុយដើម្បីរកលុយ ពោលគឺវិនិយោគដូចជាទិញដីធ្លីទុក ចូលភាគហ៊ុន ឬចាប់ដៃគូរកស៊ី ២.ចេះគ្រប់គ្រងទ្រព្យសម្បត្តិដោយភាពវ័យឆ្លាតដូចជាធ្វើឲ្យតម្លៃរបស់វាកាន់តែថ្លៃឡើង ៣.សន្សំលុយបន្តទៀតសម្រាប់ការចំណាយរបស់កូនៗ ឬសម្រាប់ពេលចូលនិវត្តន៍
នៅពេលមានអាយុ ៤០ ឆ្នាំឡើងទៅ ចង់ជោគជ័យហិរញ្ញវត្ថុនៅវ័យ ៤០ឆ្នាំឡើង អ្នកត្រូវរក្សាគោលការណ៍គ្រប់គ្រងហិរញ្ញវត្ថុរបស់អ្នកឲ្យមានប្រសិទ្ធិភាពដែលបានធ្វើឡើងតាំងពីវ័យជំទង់មក។ ទន្ទឹមនឹងការរៀនសូត្រកំហុសអតីតកាលរបស់អ្នក ក្នុងវ័យនេះអ្នកត្រូវសន្សំប្រាក់ និងវិយោគបន្តទៅទៀត ហើយនៅពេលឈានដល់វ័យ ៥០ អ្នកនឹងមានលុយកាន់តែច្រើនដើម្បីត្រៀមឲ្យអ្នកយកទៅចាយវាយយ៉ាងសប្បាយនៅពេលចាស់ទៅ។ កុំសោកស្តាយកំហុសហិរញ្ញវត្ថុនៅពេលកន្លងមក វាមិនទាន់យឺតពេលទេ។ អ្នកអាចរៀនសូត្រ និងពង្រឹងវាឲ្យកាន់តែរឹងមាំឡើងៗ៕
ប្រភព៖ cnbc
