អានដំបូន្មានរបស់អ្នកជំនាញ ៣រូបនេះអ្នកនឹងដឹងថា ទិញរថយន្តខាតបង់អ្វីខ្លះ
រថយន្តថ្មីៗទំនើបៗគួរឲ្យទាក់ទាញ ឃើញហើយអ្នកណាមិនចង់បាន។ អ្វីដែលសំខាន់ត្រង់ថា តើមានលទ្ធភាពទិញឬអត់? បើមានលទ្ធភាពអាចទិញបានមិនសូវចោទជាបញ្ហានោះទេ ខ្លាចតែគ្មានលុយ ប៉ុន្តែចិញ្ចឹមចិត្តនៅតែចង់បាន សុខចិត្តបង់ រំលោះ អស់ប៉ុន្មានអស់ទៅឲ្យតែបានជិះ។
តើនេះជាការសម្រេចចិត្តដ៏វៃឆ្លាតខាងផ្នែកហិរញ្ញវត្ថុដែលឬទេ? ជុំវិញប្រធានបទនេះ អ្នកជំនាញហិរញ្ញវត្ថុ៣រូបបានលើកមូលហេតុសំខាន់ៗដូចខាងក្រោមនេះដើម្បីចែករំលែកដល់ប្រិយមិត្ត៖
១.ដំបូន្មានរបស់សេដ្ឋីកាណាដាលោក Kevin O'Leary លោក Kevin O'Leary[/caption] លោក Kevin O'Leary បានលើកឡើងដូច្នេះថា៖« បើអ្នកទិញរថយន្ត អ្នកត្រូវចាំថា របស់ហ្នឹងវាមិនចំណេញទេ។ ពេលទិញរថយន្ត យើងត្រូវការថែទាំ ទិញធានារ៉ាប់រង ចំណាយលុយលើថ្លៃសាំង ហើយតម្លៃវាធ្លាក់ចុះទៀតដែលនេះហើយធ្វើឲ្យយើងខាតលុយ។ បើបង់រំលោះរថយន្តទៀត អ្នកនឹងខាតបង់ច្រើនណាស់ ព្រោះតម្លៃវាធ្លាក់ចុះរហូត ហើយត្រូវបង់ការប្រាក់ទៀត អញ្ចឹងទាំងការទាំងដើមគឺកាន់តែច្រើន។ ឧទាហរណ៍ថា បើយើងទិញរថយន្តតម្លៃ ២៥ ០០០ ដុល្លារ មួយឆ្នាំក្រោយមក តម្លៃវាអាចធ្លាក់ចុះដល់ ២០ ០០០ ឬ ក្រោមនឹងក៏ថាបាន តែសរុបទាំងការទាំងដើមវិញអាចដល់ទៅ ៣០ ០០០ ដុល្លារឬក៏ថាបាន»។ សេដ្ឋីរូបនេះបានផ្តល់ដំបូន្មានថា យល់ល្អអ្នកគួរប្រើមធ្យោបាយសាធារណៈដូចជារថយន្តក្រុង ឬប្រើសេវាកម្មឯកជនដូចជា Uber ជាដើម។ បើគិតការចំណាយលើថ្លៃធ្វើដំណើរតាមមធ្យោបាយទាំងនេះ ប្រៀបធៀបទៅនឹងការទិញរថយន្តបង់រំលោះ អ្នកនឹងសង្កេតឃើញថា ចំណាយរថយន្តគឺមានចំនួនច្រើនណាស់។ ការចំណាយលុយដ៏ឆ្លាតវៃ គឺត្រូវមានគោលដៅហិរញ្ញវត្ថុច្បាស់លាស់ដូចជា លុយណាសម្រាប់សងបំណុល និងលុយណាជាលុយសន្សំសម្រាប់អនាគតជាដើម មិនមែនទិញរបស់ដែលអ្នកមិនចាំបាច់នោះទេ។
២.សេដ្ឋីអាមេរិកលោក David Bach «គ្មានអីខាតលុយជាងទិញរថយន្តទេ»។ នេះជាការលើកឡើងរបស់សេដ្ឋី David Bach ។ លោកថា ទិញរថយន្តថ្មីៗគឺជាការសម្រេចចិត្តផ្នែកហិរញ្ញវត្ថុដ៏អន់បំផុតមួយជាពិសេសបើអ្នកនៅក្មេង។ អ្នកមិនត្រូវឲ្យរបស់ទាំងនេះមកថ្ពក់ជីវិតអ្នកទាំងងងឹតងងុងនោះទេ ព្រោះអ្នកត្រូវធ្វើរឿងមានតម្លៃជាច្រើនទៀតនៅក្នុងជីវិត។ លោកបានចោទសួរដូច្នេះទៀតថា៖« មនុស្សជាច្រើនសុខចិត្តខ្ចីលុយដើម្បីទិញរបស់ផ្សេងៗ។ ខ្ញុំឆ្ងល់ថា ហេតុអីបានជាអ្នកខ្លះហ៊ានខ្ចីលុយគេទៅទិញរបស់ដែលធ្លាក់ថ្លៃពី ២០ ទៅ ៣០% ត្រឹមមួយប៉ប្រិចភ្នែកអញ្ចឹង?»។ លោកផ្តល់ដំបូន្មានថា ពេលបង់រំលោះត្រូវគិតពីហានិភ័យនៃការខាតបង់ប្រាក់កាក់ដូចជាការចំណាយលើអត្រាការប្រាក់នៅក្នុងរយៈពេលវែង។ ឧទាហរណ៍ថា ចំណាយ ៥០០ ដុល្លារមួយខែ ដូចនេះមួយឆ្នាំអ្នកត្រូវបង់ ៦ ០០០ ដុល្លារដែលនេះមិនទាន់រាប់បញ្ចូលការចំណាយលើថ្លៃសាំង និងធានារ៉ាប់រងផង។ អ្នកត្រូវប្រៀបធៀបថា តើទិញ ឬមិនទិញរថយន្តវាចំណេញ និងខាតអ្វីខ្លះ? បើខាតជាងចំណេញ អ្នកមិនគួរទិញឡើយ។
៣.អ្នកប្រឹក្សាហិរញ្ញវត្ថុលោកស្រី Suze Orman លោកស្រី Suze Orman វិញបានលើកឡើងប្រហាក់ប្រហែលនឹងទស្សនៈរបស់អ្នកជំនាញខាងលើដែរ។ លោកស្រីថា ខុសពីផ្ទះ រថយន្តធ្លាក់ថ្លៃរហូត។ តម្លៃវាមិនដែលឡើងទេឲ្យតែទិញហើយ វាធ្លាក់ថ្លៃពី១០% ២០% ហើយធ្លាក់ថ្លៃមិនដាច់។ លោកស្រីបានផ្តល់ដំបូន្មានឲ្យទិញរថយន្តមួយទឹកវិញ ហើយមិនគួរទិញរថយន្តបង់រំលោះ ឬ ជួលរថយន្តទេបើអ្នកគ្មានលុយ ព្រោះអ្នកត្រូវបង់ថ្លៃច្រើនណាស់។ ប៉ុន្តែបើអ្នកនៅតែចចេសចង់ទិញ លោកស្រីថា អ្នកគួរបង់រំលោះឲ្យក្រោម៣ឆ្នាំបានហើយ បើលើសពីនេះមានន័យថា អ្នកនឹងគ្មានលទ្ធភាពទិញរថយន្តដែលអ្នកនឹងចង់ទិញនោះ។ លោកស្រី Suze ផ្តល់យោបល់ដូច្នេះទៀតថា៖« ពេលអ្នកមានលទ្ធភាពទិញរថយន្តបាន ត្រូវទុកប្រើឲ្យបានយូរឆ្នាំ បើប្រើបានដល់១០ឆ្នាំ ឬលើសនេះកាន់តែល្អ។ នេះជាអ្វីដែលអ្នកមានគេបានធ្វើ។ អ្នកមានជាច្រើនដែលខ្ញុំបានស្គាល់ ពួកគេប្រើរថយន្តពី៥ ឆ្នាំ ១០ ឆ្នាំ ឬ ២០ឆ្នាំ ក៏មានដែរ។ នេះជារបៀបចាយលុយដែលធ្វើឲ្យអ្នកមាន គេមានលុយ»៕
ដោយ៖ សូរ៉ាន់ដា
