ហេតុអ្វីអ្នកត្រូវឈប់ប្រៀបធៀបខ្លួនអ្នកជាមួយអ្នកដទៃ?
ប្រសិនបើអ្នកសង្កេតឃើញថា ខ្លួនអ្នកកំពុងចាញ់ប្រៀបអ្នកដទៃសូមកុំបារម្ភ ព្រោះនេះគឺជាសភាវគតិពីធម្មជាតិរបស់មនុស្សម្នាក់ៗ។ ទោះជាយ៉ាងណាក៏ដោយ នៅពេលអ្នកចាប់ផ្តើមសម្លឹងមើលសមិទ្ធផល ឬទ្រព្យសម្បត្តិរបស់អ្នកដទៃ ហើយមកប្រៀបធៀបនឹងខ្លួនអ្នកពីអ្វីដែលអ្នកដទៃមាន ប៉ុន្តែខ្លួនឯងគ្មាន នោះជីវិតអ្នកនឹងមានបញ្ហា។
នៅពេលអ្នកមើលឃើញពីទ្រព្យសម្បត្តិ ភាពជោគជ័យ ឬសម្រស់របស់អ្នកដទៃល្អជាងអ្នកកាន់តែច្រើនឡើង ប្រៀបដូចជាអ្នកកំពុងយកភាពសប្បាយរីករាយ និងសុភមង្គលរបស់អ្នកទៅបោះចោលដូច្នេះដែរ។ យកខ្លួនឯងប្រៀបធៀបទៅនឹងអ្នកដទៃ គឺការប្រកួតប្រជែងគ្មានទីបញ្ចប់ និងគ្មានយុត្តិធម៌ទេ អ្នកមានសង្កេតឃើញទេថា មានមនុស្សច្រើនណាស់ដែលទទួលបានភាពជោគជ័យ មានលុយ មានរូបសម្រស់ស្រស់ស្អាត ឬមានទ្រព្យសម្បត្តិច្រើនជាងអ្នក។
ការយកខ្លួនទៅប្រៀបធៀបមនុស្សទាំងនោះគឺគ្មានទីបញ្ចប់ទេ។ ការប្រកួតប្រជែងជាមួយមនុស្សទាំងនោះ នឹងធ្វើឲ្យជីវិតអ្នកមានភាពលោភលន់ច្រើន និងបណ្តាលឱ្យអ្នកបាត់បង់ការផ្តោតលើគោលដៅផ្សេងៗក្នុងជីវិតរបស់អ្នកផងដែរ ហើយទីបំផុតជីវិតរស់នៅដោយភាពសោកសៅ ក្តៅក្រហាយ ច្រណែនឈ្នានីស និងតូចចិត្តរកសេចក្តីសុខឲ្យជីវិតមិនឃើញឡើយ។ អ្វីដែលសំខាន់ជាងនេះទៅទៀតនោះគឺថា អ្នកនឹងបាត់បង់ពេលវេលាដ៏មានតម្លៃជាច្រើនសម្រាប់ធ្វើអ្វីផ្សេងទៀតក្នុងជីវិតរបស់អ្នក។ ជំនួសឱ្យការចូលចិត្តលើកយកភាពទន់ខ្សោយរបស់អ្នកមកនិយាយ អ្នកគួរផ្ដោតលើភាពខ្លាំង និងគុណសម្បត្តិដែលអ្នកមានវិញម្តង ព្រោះថា ការប្រៀបធៀបជារឿយៗ វាបានត្រឹមតែធ្វើឲ្យឱកាសរបស់អ្នករំលងផុតទៅ និងបាត់បង់ពេលវេលាសម្រាប់អភិវឌ្ឍខ្លួនឯង។
ធ្វើយ៉ាងម៉េចទើបអាចបញ្ឈប់ការប្រៀបធៀបខ្លួនឯងជាមួយអ្នកដទៃបាន?
១.ផ្តោតលើអ្វីដែលអ្នកមាន៖ អ្នកគួរផ្ដោតលើអ្វីដែលអ្នកមានជំនួសឱ្យអ្វីដែលអ្នកមិនមាន។ មនុស្សម្នាក់ៗមានគុណសម្បត្តិផ្ទាល់ខ្លួន មានមនុស្សដែលខ្លួនស្រលាញ់យកចិត្តទុកដាក់ មានមនសិការដែលអាចធ្វើអ្វីមួយឲ្យក្តីស្រមៃរបស់ខ្លួនជោគជ័យ និងកសាងមុខមាត់ក្នុងសង្គមបាន។ រៀនទទួលយកការពិត ហើយត្រូវទទួលស្គាល់ថា គ្មានអ្នកណាម្នាក់មានគ្រប់១០នោះទេ។ គេមានជំនាញរបស់គេ អ្នកត្រូវមានជំនាញរបស់អ្នក។ អ្នកផ្សេងធ្វើការតាមសមត្ថភាព និងទេពកោសល្យរបស់គេ អ្នកក៏ត្រូវធ្វើការតាមជំនាញ និងសមត្ថភាពរបស់អ្នកដែរ។ ឈប់ប្រៀបធៀបខ្លួនឯងជាមួយនឹងអ្នកដទៃ ពីព្រោះអ្នកមានអ្វីដែលអ្នកអាចធ្វើបានដែលអ្នកផ្សេងមិនអាចធ្វើបានហើយអភិវឌ្ឍភាពខ្លាំងរបស់អ្នកជំនួសឲ្យភាពខ្សោយរបស់អ្នក។
២.មោទនភាពចំពោះអ្វីដែលខ្លួនមាន៖ មនុស្សដែលមិនពេញចិត្តចំពោះអ្វីដែលខ្លួនមាន ហើយសម្លឹងមើលទ្រព្យសម្បត្តិ ឬស្នាដៃរបស់អ្នកដទៃដោយការឈឺចាប់ឬ ច្រណែនឈ្នានីសគឺជាមនុស្សដែលមិនឲ្យតម្លៃនូវអ្វីដែលខ្លួនមាន។ អ្វីក៏ដោយដែលអ្នកមានមិនថាវាមានសារៈសំខាន់ប៉ុណ្ណានោះទេ ប្រសិនបើអ្នករៀនទទួលស្គាល់ និងមោទនភាពចំពោះវា អ្នកនឹងមានស្នាមញញឹមរស់នៅពោរពេញដោយក្តីសង្ឃឹម និងសុភមង្គល។
៣.ខិតខំធ្វើអ្វីៗដែលមានតម្លៃនៅក្នុងជីវិត៖ ជំនួសឱ្យការផ្ដោតអារម្មណ៍លើភាពត្រេកត្រអាលនឹងសម្ភារៈនិយម ឬរូបរាងក្លែងក្លាយរបស់មនុស្សអ្នកត្រូវខិតខំធ្វើអ្វីៗដែលមានតម្លៃនៅក្នុងជីវិត។ អ្នកអាចផ្តល់នូវក្តីស្រឡាញ់ឲ្យបានកាន់តែច្រើន មានសន្តិភាពផ្លូវចិត្ត ផ្តល់តម្លៃដល់អ្នកដទៃ និងមានភាពអត់ធ្មត់ជានិច្ច។ ទាំងនេះគឺជាគុណសម្បត្តិដ៏សំខាន់មានតម្លៃជាងទ្រព្យសម្បត្តិ កេរ្តិ៍ឈ្មោះនិងភាពជោគជ័យទៅទៀត។
៤.ប្រៀបធៀបខ្លួនឯងទៅនឹងអតីតកាល កុំប្រៀបធៀបអ្នកដទៃ៖ នៅត្រង់ចំណុចនេះ អ្នកត្រូវឈប់យកខ្លួនឯងទៅធ្វើជាកាកសំណល់ចាញ់ប្រៀបអ្នកដទៃទៅ។ អ្វីដែលអ្នកធ្វើគឺគួរប្រៀបធៀបខ្លួនឯង ទៅនឹងអ្វីដែលអ្នកធ្លាប់ធ្វើពីមុន។ អ្នកត្រូវសួរខ្លួនឯងថា តើខ្លួនអ្នកដើរដល់ចំណុចណាហើយ? ធ្វើបានល្អជាងមុនហើយឬនៅ? បើអ្នកទទួលបានសមិទ្ធផលល្អជាងមុន នោះជាសញ្ញាណដ៏ល្អមួយរួចទៅហើយ។ អ្នកត្រូវចាំថា ការប្រៀបធៀបខ្លួនអ្នកទៅនឹងអ្នកដទៃបានត្រឹមតែធ្វើឲ្យអ្នកជូរចត់ ប៉ុន្តែបើអ្នកបន្តប្រកួតប្រជែងជាមួយខ្លួនឯង អ្នកនឹងទទួលបានការអភិវឌ្ឍជានិច្ច៕
ប្រភព៖ howtobehappy
