ពីបុគ្គលិកលាងចានប្រាក់ខែ៦០ដុល្លារតស៊ូរហូតក្លាយជាស្ថាបនិកក្រុមហ៊ុន CAPITAL CHARM
លោក លឹម បណ្ឌិត បច្ចុប្បន្នជាស្ថាបនិកក្រុមហ៊ុន CAPITAL CHARM ដែលជាសម្ព័ន្ធក្រុមហ៊ុនបម្រើទៅលើសេវាជាច្រើនដូចជា ភោជនីយដ្ឋាន Capital View Sky Bar ដែលកំពុងតែទទួលការគាំទ្រច្រើន, ផ្គត់ផ្គង់សម្ភារៈចង្រ្កាន ទទួលរៀបចំកម្មវិធីផ្សេងៗ និងសេវាកម្មមួយចំនួនទៀត។ ស្ថិតក្នុងក្រសែភ្នែកមនុស្សគ្រប់គ្នាងារជាស្ថាបនិកក្រុមហ៊ុនពិតជាភាពជោគជ័យមួយដែលគួរឲ្យសរសើរបំផុត ប៉ុន្តែមនុស្សភាគច្រើនប្រហែលជាមិនដឹងទេថានៅពីក្រោយភាពជោគជ័យរបស់បុគ្គលម្នាក់នេះបង្កប់ដោយភាពសោកសៅនឹងការតស៊ូក្នុងជីវិតយ៉ាងណាទម្រាំនឹងអាចមកដល់សព្វថ្ងៃនេះ ។
មានទីកំណើតនៅខេត្តបន្ទាយមានជ័យ លោក លឹម បណ្ឌិត គឺជាកូនកំព្រាម្ដាយមានបងប្អូន៥នាក់ និងស្ថិតនៅក្រោមស្ថានភាពគ្រួសារមួយដែលលំបាកខ្លាំង ដោយកាតព្វកិច្ចនិងទំនួលខុសត្រូវទាំងអស់ក្នុងគ្រួសារត្រូវធ្លាក់ជាបន្ទុកមកលើឪពុករបស់លោកទាំងស្រុង ដែលត្រូវធ្វើការជាអ្នករត់ម៉ូតូឌុបដើម្បីរកលុយមកផ្គត់ផ្គង់ការសិក្សារបស់កូនៗ ពិសេសរូបលោកផ្ទាល់រហូតបានបញ្ចប់ការសិក្សាថ្នាក់វិទ្យាល័យដោយជោគជ័យ។ ស្ថាបនិកវ័យក្មេងរូបនេះបានបន្តដោយទឹកមុខក្រៀមក្រំថា បន្ទាប់ពីបានបញ្ចប់ការសិក្សាថ្នាក់វិទ្យាល័យ រូបលោកក៏បានមកបន្តការ សិក្សាថ្នាក់បរិញ្ញាបត្រនៅទីក្រុងភ្នំពេញ ប៉ុន្តែដោយសារតែជីវភាពគ្រួសារខ្វះខាតពេលដែលមកដល់ភ្នំពេញដំបូងលោកមិនបានបន្តការសិក្សាភ្លាមៗនោះឡើយគឺលោកត្រូវបង្ខំចិត្តដើរស្វែងរកការងារធ្វើសិន ហើយការងារដំបូងរបស់លោកគឺធ្វើជាអ្នកលាងចានឲ្យគេ។
ប្រាក់ខែគោលនៃការងារនេះគឺត្រឹមតែ៦០ដុល្លារប៉ុណ្ណោះក្នុងមួយខែ ដែលលោកត្រូវយកមកចំណាយលើការទូទាត់ពេញមួយខែគឺទៅលើការសិក្សាភាសាអង់គ្លេស បង់ថ្លៃផ្ទះជួល ការហូបចុក នឹងត្រូវសន្សំត្បិតត្បៀតផ្ញើរទៅផ្ទះខ្លះដើម្បីជួយផ្គត់ផ្គង់ការសិក្សារបស់ប្អូនស្រីពៅ។ ក្រោយមកលោកបានបន្តការសិក្សាថ្នាក់បរិញ្ញាបត្រជំនាញទេសចរណ៍និងគ្រប់គ្រងនៅសាកលវិទ្យាល័យជាតិគ្រប់គ្រង។ បន្ទាប់ពីបានបញ្ជប់ការសិក្សានៅសាកលវិទ្យាល័យ លោកបានវិវត្តខ្លួនពីបុគ្គលិកលាងចានធម្មតា មកក្លាយជាអ្នកប្រមូលចាន បន្ទាប់មកក៏ក្លាយជាអ្នករត់តុ ហើយរូបលោកក៏បន្តវិវត្តរហូតក្លាយជាអ្នកដឹកនាំនិងគ្រប់គ្រងគេ(Supervisor) ។ អស់រយៈពេល៤ឆ្នាំនៃការធ្វើការឲ្យគេ បើទោះបីជាការធ្វើការងារនេះហាក់មានការវិវត្តទៅមុខ ប៉ុន្តែរូបលោកផ្ទាល់បានគិតថាវាល្មមសម្រាប់ខ្លួនឯងហើយក្នុងការចាប់ផ្ដើមអាជីវកម្ម ហើយលោកក៏បានចាប់ផ្ដើមដែលអាជីវកម្មដំបូងរបស់លោកគឺទាក់ទងនឹងE-Commerce។
លោក បណ្ឌិត បានប្រាប់ថាអ្វីដែលបានជម្រុញឲ្យលោកអាចមកដល់សព្វថ្ងៃនេះគឺការបំបាក់ស្មារតី មានមនុស្សមួយចំនួនយល់ថាលោកគឺជាមនុស្សដែលចូលចិត្តគិតអ្វីដែលធំហួសមាឌនិងគិតថាលោកមិនអាចធ្វើបានទេ ហើយអ្វីដែលធ្វើឲ្យលោកឈឺចាប់និងកាន់តែតស៊ូទ្វេដងនោះគឺការមើលងាយមកលើគ្រួសាររបស់លោកថាលោកមិនអាចបញ្ចប់ការសិក្សាបានទេ ហើយមិនយូរមិនឆាប់គង់តែត្រឡប់មកស្រុកវិញ។ ហេតុផលនេះហើយដែលធ្វើឲ្យលោកកាន់តែតស៊ូខ្លាំងឡើង។ លោកបន្តថា មូលហេតុសំខាន់មួយទៀតនោះគឺការលើកទឹកចិត្តពីឪពុករបស់លោកដែលតែងតែប្រាប់ថា "កូនតស៊ូទៅកុំបោះបង់ មានប៉ានៅក្បែរទោះជាមិនមានលទ្ធភាពជួយកូន" ពាក្យតែប៉ុណ្ណឹងទេដែលធ្វើឲ្យលោកតស៊ូជម្នះគ្រប់បែបយ៉ាងរហូតអាចវិវត្តន៍ខ្លួនឯងពីក្មេងជនបទធ្វើការងារជាអ្នកលាងចានឲ្យគេដើម្បីបន្តការសិក្សា រហូតពេលនេះលោកអាចក្លាយជាស្ថាបនិកនៃក្រុមហ៊ុន CAPITAL CHARM ។
លោក លឹម បណ្ឌិត "ខ្ញុំសូមលើកទឹកចិត្តដល់យុវជនឲ្យមានការតស៊ូខិតខំប្រឹងប្រែងកំណត់គោលដៅខ្លួនឯងឲ្យបានច្បាស់លាស់ និងធ្វើជាទំពាំងជួយអភិវឌ្ឍសង្គមជាតិដើម្បីបង្ហាញប្រាប់ពិភពលោកថាជាតិសាសន៍យើងខ្លាំង ហើយកុំតូចចិត្តថាយើងក្រ លុយវាគ្រាន់តែជាកត្តាតូចមួយប៉ុណ្ណោះ អ្វីដែលសំខាន់គឺចំណេះដឹងរបស់យើង"៕
អត្ថបទដោយ៖ ជួប ស្រីរ័ត្ន
