មូលហេតុទាំង ៧ ដែលធ្វើឲ្យអ្នកបរាជ័យទោះបីខំប្រឹងប្រែងយ៉ាងណាក៏ដោយ
មនុស្សទូទៅតែងយល់ថា អ្នកដែលខិតខំប្រឹងប្រែងមិនថា ការសិក្សា រកស៊ី ឬធ្វើអ្វីមួយនោះទេនៅទីបំផុតនឹងទទួលបានជោគជ័យជាមិនខាន។ ក៏ប៉ុន្តែតើអ្នកអាចរៀបរាប់បានទេថា មានមនុស្សប៉ុន្មានអ្នកដែលទទួលបានជោគជ័យ? ចម្លើយមានមិនច្រើននោះទេ។ តើនេះបណ្តាលមកពីអ្វី? ខាងក្រោមនេះជាមូលហេតុសំខាន់ៗមួយចំនួនដែលអ្នកនៅតែបរាជ័យបើទោះបីជាអ្នកខិតខំប្រឹងប្រែងយ៉ាងណាក៏ដោយ៖
១) អ្នកមិនបានស្គាល់មនុស្សថ្មីៗ វាជារឿងល្អហើយដែលអ្នកបានចំណាយពេលបង្កើតមិត្តភាពជាមួយមនុស្ស មិត្តភក្ដិ ឬរាប់អានអ្នកដែលអ្នកធ្លាប់ស្គាល់កន្លងមក។ ប៉ុន្តែបើអ្នកមិនបានព្យាយាមបង្កើតបណ្ដាញទំនាក់ទំនងជាមួយមនុស្សថ្មីៗជាពិសេសអ្នកដែលជោគជ័យជាងអ្នក គឺអ្នកនឹងនៅតែទទួលបានគំនិតដដែលៗ មិនអាចដកស្រង់ ឬរៀនសូត្រគំនិតថ្មីៗបានទេ។ នេះបានធ្វើឲ្យអ្នកមើលឃើញតែជ្រុងម្ខាង និងមិនអាចងើបផុតចេញពីជីវិតដែលអ្នកមិនចង់បាននោះឡើយដែលជាហេតុធ្វើឲ្យអ្នកបរាជ័យម្តងហើយម្តងទៀត។
២) អ្នកមិនចូលចិត្តការផ្លាស់ប្ដូរ នៅពេលអ្នកស្ថិតនៅក្នុងបរិយាកាសដដែលៗអស់រយៈពេលដ៏យូរ វាបង្ហាញថា អ្នកជាមនុស្សដែលមិនចូលចិត្តការផ្លាស់ប្ដូរ។ នេះបានធ្វើឲ្យអ្នកពិបាកក្នុងការសម្របខ្លួនទៅនឹងអ្វីដែលថ្មី និងពិបាកក្នុងការបង្កើតឱកាសសម្រាប់អភិវឌ្ឍខ្លួនឯង។ ជំនួសឲ្យទស្សនៈបែបនេះ អ្នកត្រូវតែផ្លាស់ប្ដូរផ្នត់គំនិត។ ការផ្លាស់ប្ដូរការគិតរបស់អ្នក នឹងធ្វើឲ្យអ្នកមើលឃើញគំនិតថ្មីៗដើម្បីឈានជើងចូលទៅប្រឡូកទៅក្នុងជីវិត ឬគោលដៅមួយដែលអ្នកចង់បានដោយជោគជ័យ។
៣) មិនហ៊ានប្រឈមមុខនឹងឧបសគ្គ មនុស្សឆ្លាតតែងរកវិធីងាយស្រួល រីឯសិស្សក្មេងៗចូលចិត្តជ្រើសរើសមុខវិជ្ជារៀនតាមមិត្តភក្ដិរបស់គេ ហើយរៀនឲ្យពូកែដើម្បីធ្វើការងារនៅកន្លែងល្អ។ ទោះបីជាបែបនេះក្តីអ្វីដែលពួកគេបារម្ភគឺសុវត្ថិភាពការងារ ខណៈដែលមនុស្សឆ្លាតចង់បានលើសពីនេះ។ យ៉ាងណាមិញ អ្នកទាំងនេះនៅតែមានការភ័យខ្លាចទៅ នឹងឧបសគ្គជាច្រើនដែលនឹងកើតឡើងហើយទីបំផុតត្រូវបរាជ័យ។ សម្រាប់អ្នកវិញត្រូវយល់ថា ឧបសគ្គគឺជាមេរៀនដ៏ល្អប្រសិនបើអ្នកយកឈ្នះវាបាន។ វាបានធ្វើឲ្យអ្នកកាន់តែរឹងមាំ មានបទពិសោធន៍ និងរៀនសូត្រកាន់តែច្រើនដែលនេះមិនមែនជារឿងដែលអ្នកត្រូវខ្លាចក្នុងការប្រឈមមុខនោះឡើយ។
៤) ស្ទាក់ស្ទើរច្រើន ការខិតខំប្រឹងប្រែង និងការសម្រេចចិត្តដ៏ឆ្លាតវៃអាចបើកផ្លូវឲ្យអ្នកជោគជ័យច្រើន។ ប៉ុន្តែពេលខ្លះ អ្នកមានជម្រើសជាច្រើនដែលធ្វើឲ្យអ្នកកាន់តែស្មុគស្មាញ និងពិបាកសម្រេចចិត្ត។ ការសម្រេចចិត្តដើម្បីស្រវាចាប់យកជម្រើសទាំងអស់នោះ មិនមែនជារឿងត្រឹមត្រូវនោះទេ។ អ្នកត្រូវដឹងថា ការងារណាខ្លះសំខាន់ និងជារឿងអាទិភាពសម្រាប់អ្នក។ គោលដៅ ឬក្តីសុបិន្តដែលអ្នកចង់បាន អាចធ្វើឲ្យអ្នកចំណាយពេលរាប់ឆ្នាំដើម្បីជោគជ័យ ដូច្នេះអ្នកត្រូវបែងចែកដោយមិនស្ទាក់ស្ទើរថា ការងារណាខ្លះដែលអ្នកត្រូវធ្វើមុន និងបន្តបន្ទាប់។
៥) គ្មានភាពជឿជាក់លើខ្លួនឯង វាមិនចម្លែកទេដែលមនុស្សបរាជ័យ មានគំនិតដូចចៅចាក់ស្មុគ។ អ្នកអាចជាមនុស្សប្រភេទនេះ គិតច្រើន ស្រមៃច្រើន តែមិនដែលធ្វើបានសម្រេចទេ។ នេះក៏ព្រោះតែអ្នកពឹងលើព្រេងសំណាង មិនហ៊ានចាប់ផ្តើម ខ្ជិលច្រអូស ហើយអ្វីដែលពិសេសនោះគឺខ្វះភាពជឿជាក់លើខ្លួនឯងដែលហេតុនាំឲ្យមានជំនឿមួយថា ខ្លួនមិនអាចសម្រេចគោលដៅបាន។ ទោះបីជាបែបនេះក្តី អ្នកត្រូវស្វែងយល់ដូច្នេះថា គ្មានអ្វីដែលល្អឥតខ្ចោះនោះទេ។ ចង់ជោគជ័យអ្វីមួយអ្នកត្រូវចាប់ផ្តើមពីមួយជំហានទៅមួយជំហាន ធ្វើបណ្តើររៀនបណ្តើរ និងជឿជាក់ថា អ្នកអាចធ្វើបាន។
៦) រំពឹងទុកតិចពេក បើខ្វះភាពជឿជាក់គឺជារឿងមួយទៅហើយ អ្វីដែលសំខាន់មួយទៀតនោះគឺការរំពឹងទុករបស់អ្នកមានតិចពេក។ ការរំពឹងទុកខ្ពស់ខ្លាំងពេកមិនមែនជារឿងមួយត្រឹមត្រូវទេ ប៉ុន្តែការរំពឹងទុកតិចពេកក៏មិនបានផ្តល់លទ្ធផលអ្វីឲ្យអ្នកដែរ។ រាល់ការខិតខំប្រឹងប្រែងរបស់អ្នកហាក់កាន់តែគ្មានន័យប្រសិនបើអ្នក គ្មានការរំពឹងទុកអ្វីសោះ ហើយជម្រើសតែមួយគត់របស់អ្នក គឺបរាជ័យ។ អ្នកជោគជ័យយល់ថា ជោគជ័យត្រូវតែកើតមានឡើង។ បើពេលនេះមិនបាន គង់តែថ្ងៃណាមួយវាមកដល់ជាមិនខាន។
៧) គ្មានគោលដៅច្បាស់លាស់ តើអ្នកមានគោលដៅក្នុងជីវិតដែរឬទេ? វាមិនមែនជារឿងចៃដន្យទេដែលអ្នកបរាជ័យរហូតប្រសិនបើអ្នកមិនដឹងថា អ្នកកំពុងធ្វើអ្វី? នៅកន្លែងណា? ចង់បានអ្វី? គោលដៅជីវិតមានច្រើនណាស់ ប៉ុន្តែអ្វីដែលសំខាន់នោះគឺថា តើអ្នកចង់ទៅកាន់គោលដៅណា? អ្នកត្រូវមានគោលដៅឲ្យច្បាស់លាស់ បន្ទាប់មកត្រូវដើរតាមគំនិតរបស់អ្នកឆ្ពោះទៅកាន់គោលដៅនោះ ទើបលទ្ធផលអាចជោគជ័យតាមអ្វីដែលអ្នកបានដៅទុក៕
ប្រភព៖ lifehack
