ដំបូន្មានទាំង ៧ចំណុចរបស់លោក Warren Buffett សម្រាប់កសាងទ្រព្យសម្បត្តិ ភាពជោគជ័យ និងការវិនិយោគ
នៅពេលនិយាយពីអ្នកមានកំពូលៗក្នុងលោក លោក Warren Buffett គឺជាមហាសេដ្ឋីអាមេរិកមាន ជាងគេបំផុតលំដាប់ទី ៣ សម្រាប់ឆ្នាំ ២០១៨ នេះ។ មហាសេដ្ឋីវ័យ ៨៧ ឆ្នាំរូបនេះ គឺជាស្ថាបនិក និងនាយកប្រតិបត្តិក្រុមហ៊ុន Berkshire Hathaway ដែលមានទ្រព្យសម្បត្តិសរុបប្រមាណ ៨៧ លានដុល្លារអាមេរិក។
លោកត្រូវបានគេទទួលស្គាល់ថា ជាមហាសេដ្ឋីល្បីល្បាញ និងជោគជ័យខាងវិនិយោគ ជាពិសេសវិនិយោគលើទីផ្សារភាគហ៊ុនតែម្តងដែលនេះជាផ្នែកមួយធ្វើឲ្យលោកក្លាយជាមហាសេដ្ឋីចាប់តាំងពីវ័យ ៣២ឆ្នាំមកម្ល៉េះ។ ភាពជោគជ័យរបស់លោកនេះហើយទើបលោកបានផ្តល់ដំបូន្មានជាច្រើនទាក់ទងទៅនឹងការកសាងទ្រព្យសម្បត្តិ ភាពជោគជ័យ និងការវិនិយោគដែលអ្នកអាចរៀនសូត្រពីគាត់បាន។
១.លេងភាគហ៊ុនត្រូវប្រើពេលយូរអង្វែង ទាក់ទងទៅនឹងការវិនិយោគលើទីផ្សារភាគហ៊ុន លោក Buffett ផ្តល់ដំបូន្មានថា អ្នកមិនគួរជួញដូរភាគហ៊ុនដើម្បីតែទិញលក់តែមួយមុខប៉ុណ្ណោះទេ។ លោកបន្តថា អ្នកត្រូវលេងប្រើពេលយូរអង្វែង និងមានភាពអត់ធ្មត់ ព្រមទាំងត្រូវគ្រប់គ្រងវារហូត។ សម្រាប់លោក Buffett លោកទិញតែភាគហ៊ុនរបស់ក្រុមហ៊ុនណាដែលលោកយល់ច្បាស់ និងចូលចិត្តប៉ុណ្ណោះ ហើយលោកថា ការលក់ភាគហ៊ុនធ្វើឡើងនៅពេលដែលអ្នកចាំបាច់ត្រូវការប្រាក់ប៉ុណ្ណោះ មិនមែនទិញលក់នៅពេលអ្នកជឿជាក់ថា ឈ្នះនោះទេនោះ។
២.រៀនរហូត និងចេះដាក់ខ្លួន លោក Buffett បានផ្តល់ដំបូន្មានថា ជាសហគ្រិនក៏ដោយ ជាអ្នកធ្វើការឲ្យគេក៏ដោយ អ្នកត្រូវរៀនអ្វីៗថ្មីៗជាប្រចាំ រៀនប្រឈមនឹងបញ្ហា រៀនស្វែងរកឱកាស និងត្រូវចេះបន្ទាប់ខ្លួនគោរពអ្នកដទៃ។ សម្រាប់រូបលោកផ្ទាល់ លោកក្រោកពីព្រឹកដើម្បីហាត់ប្រាណ និងទាញកាសែតផ្សេងៗយកមកមើលព័ត៌មានផ្សេងៗ និងចាប់សៀវភៅមកអានជាប្រចាំនូវអ្វីដែលលោកយល់ថា ចំណេះដឹងបានផ្តល់ប្រាក់ចំណេញមិនចេះរីងស្ងួត។
៣.វិនិយោគភាគហ៊ុនដោយប្រើលុយរបស់អ្នក មហាសេដ្ឋី Buffett បាននិយាយថា តម្លៃភាគហ៊ុនធ្លាក់ចុះអាចធ្វើឲ្យអ្នកជួញដូរ ព្រួយបារម្ភ និងអាចនាំទៅរកការសម្រេចចិត្តមួយមិនល្អប្រសិនបើលុយដែលពួកគេយកវិនិយោគនោះមិនមែនជាលុយរបស់ខ្លួនឯង។ លោកពន្យល់ថា អ្នកវិនិយោគភាគហ៊ុនដែលសល់លុយ និងគ្មានជំពាក់បំណុលអ្នកផ្សេងទៀត នឹងមានឱកាសច្រើននៅពេលដែលទីផ្សារធ្លាក់ចុះពីព្រោះពួកគេមិនចាំបាច់ព្រួយបារម្ភរឿងទូទាត់បំណុលត្រឡប់ទៅវិញ និងអាចជួញដូរតាមចិត្តចង់។
៤.បង្កើតបណ្ដាញទំនាក់ទំនងឲ្យបានច្រើន និងឲ្យតម្លៃអ្នកដទៃ ក្នុងពេលមួយដែលលោកបានធ្វើដំណើរទៅកាន់សាលារដ្ឋ Iowa លោក Buffett បានបង្រៀនសិស្សនិស្សិតដែលរៀនចប់ថ្នាក់អនុបណ្ឌិតថា អ្នកមិនអាចបំភ្លេចមិត្តភាពចាស់ៗ ជំនួសដោយមិត្តភាពថ្មីៗបានទេ។ អ្នកត្រូវតែពង្រីកមិត្តភាពថ្មីៗឲ្យបានច្រើនបន្ថែមទៀតជាពិសេសអ្នកដែលអាចបង្រៀនអ្នកឲ្យកាន់តែជោគជ័យ ព្រមទាំងឲ្យតម្លៃ និងគោរពអ្នកទាំងនោះដោយមិនរើសអើង។
៥.សម្លឹងមើលទៅអនាគតខាងមុខ កុំមើលអតីតកាល «ជាការពិត អ្នកជួញដូរថ្ងៃនេះ អាចខកចិត្តដោយសារតែមិនបានប្រាក់ចំណេញនៅពេលជួញដូរថ្ងៃម្សិលមិញ។ នេះជាសម្តីរបស់លោក Buffett។ លោកបន្តថា ទោះបីជាបែបនេះក្តី អ្នកជួញដូរត្រូវមើលពីឱកាសនៅពេលខាងមុខ ហើយមិនត្រូវដិតដាមច្រើនពេកទៅនឹងអតីតកាលមិនល្អច្រើនពេក។ ការផ្តោតលើការវិនិយោគនៅថ្ងៃខាងមុខ គឺជារឿងល្អសម្រាប់អ្នក។
៦.កុំជ្រួលជ្រើមតាមអ្នកដទៃ កាលពីឆ្នាំ ២០០៤ លោក Buffett បានមានប្រសាសន៍ដូច្នេះថា៖« ត្រូវភ័យខ្លាចនៅពេលអ្នកផ្សេងទៀតកំពុងលោភលន់ និងត្រូវចេះលោភលន់នៅពេលអ្នកផ្សេងទៀតកំពុងភ័យខ្លាច»។ អត្ថន័យនេះចង់មានន័យម្យ៉ាងទៀតថា ទិញក្នុងតម្លៃទាប លក់ចេញក្នុងតម្លៃខ្ពស់។ នេះជាសារមួយដែលលោកព្រមានដល់អ្នកជួញដូរផ្សារភាគហ៊ុនអំពីគ្រោះថ្នាក់នៃការជួញដូរតាមគេតាមឯង។ យុទ្ធសាស្ត្រដ៏យូរអង្វែងរបស់លោក Buffett គឺលក់ភាគហ៊ុននៅពេលតម្លៃឡើងថ្លៃខ្ពស់ជាជាងលក់ចេញនៅពេលតម្លៃធ្លាក់ចុះ និងនៅពេលមនុស្សគ្រប់គ្នាកំពុងមានភាពភ័យខ្លាចថា តម្លៃរបស់វានឹងមិនឡើងថ្លៃមកវិញ។
៧.កុំគិតរឿងលុយច្រើនពេក លោក Buffett មិនចង់ឲ្យមនុស្សគ្រប់គ្នាផ្ដោតតែរឿងលុយកាក់ដែលខ្លួនមានតិចឬច្រើនពេកនោះទេ។ លោកថា មានគឺជារឿងល្អ ប៉ុន្តែអ្វីដែលសំខាន់គឺត្រង់ថា តើអ្នកអាចមានដោយវិធីណា? អ្នកណាខ្លះចាំជួយអ្នក? ហើយអ្វីទៅជាឧបសគ្គធំបំផុតរបស់អ្នក? លោកថា នៅពេលណាមួយអ្នកនឹងយល់ថា មនុស្សដែលស្រលាញ់អ្នក រាប់អានអ្នក និងមនុស្សដែលអ្នកស្រលាញ់ នឹងមានតម្លៃជាងលុយកម្រិតណា៕
ប្រភព៖ businessinsider
