តិកនិក៤ យ៉ាងបង្រៀនអ្នកនិយាយពាក្យថា «ទេ» ឲ្យមានប្រសិទ្ធភាព
ពេលខ្លះអ្នកគួរចេះនិយាយពាក្យថា ទេ! ទៅកាន់អ្នកណាដែលតែងតែយកអ្នកមកប្រើប្រាស់ខុសរឿង និងខុសពេលវេលា។ ការនិយាយពាក្យថាទេទៅកាន់នរណាម្នាក់ គឺជាការបង្កអារម្មណ៍ មួយមិនល្អ ដោយសារតែអ្នកបានប្រកែកទៅនឹងសំណូមពររបស់អ្នកផ្សេង។ តែពេលខ្លះវាជារឿងមួយត្រឹមត្រូវនឹងនិយាយពាក្យថា ទេនេះដែរ។ ខាងក្រោមនេះគឺជាតិកនិកទាំង៤យ៉ាង ដែលនឹងជួយបង្រៀនអ្នកឲ្យនិយាយពាក្យថាទេ ដោយមានប្រសិទ្ធភាពបំផុត៖
១) កុំស្ទាក់ស្ទើរ៖ កុំរេរា ឬនិយាយអ្វីវែងឆ្ងាយអី នាំតែមានការស្ទាក់ស្ទើរ ហើយគេនឹងគិតថាអ្នកនៅតែចង់ធ្វើរឿងដែលគេឲ្យធ្វើដដែល។ កុំព្យាយាមពន្យារពេល ក្បាច់ក្បូរច្រើន បើអ្នកមិនចង់ធ្វើអ្វីមួយហើយនោះ និយាយវាចេញមកភ្លាមៗទៅ។
២) និយាយដោយប្រើពាក្យគួរសម៖ ទោះបីអ្នកមិនចង់ធ្វើ តែបើអ្នកនិយាយជំទាស់ជាមួយនរណាម្នាក់ហើយ អ្នកក៏ត្រូវបូក ផ្សំជាមួយពាក្យគួរសមផងដែរ។ អ្នកអាចប្រើពាក្យថា ៖ សូមទោស! ពេលនេះខ្ញុំជួយអ្នកមិនបានឡើយ ដោយសារតែការងារនៅស្ទះ ច្រើនពេក។
៣) បង្ហាញចរិតអាត្មានិយមខ្លះ៖ ពេលខ្លះក៏ត្រូវបង្ហាញ ពីតម្រូវការរបស់អ្នកមុនដែរ។ កាលណាអ្នកឲ្យតម្លៃទៅធ្វើរឿងរបស់គេមុន អ្នកនឹងនៅតែលង់ប្រាណធ្វើរឿងរបស់គេដដែល។ អ្នកត្រូវប្រាប់ដល់ពួកគេថា អ្នកត្រូវធ្វើរឿងផ្ទាល់ខ្លួនឲ្យបានចប់សិនដែរ មុននឹងទៅធ្វើឲ្យគេនោះ។
៤) ប្រាប់ហេតុផលឲ្យច្បាស់៖ គ្មានអ្វីដែលធ្វើឲ្យពួកគេយល់ជាងការពន្យល់ពីហេតុផលនោះទេ។ កាលណាពួកគេបានស្ដាប់យល់ពីហេតុផលរបស់អ្នក ដែលបានជំទាស់គេ នោះ រឿងដែលគេគ្រោងនឹងពឹងអ្នកអាចនឹងផ្ទេរទៅអ្នកផ្សេង។ ការប្រាប់ហេតុផលអ្នកដទៃឲ្យបានយល់គឺជារឿងងាយស្រួល ហើយមានប្រសិទ្ធភាពបំផុត ក្នុងការប្រឆាំងអ្នកដែលពឹងអ្នកច្រើន៕
ប្រែសម្រួល៖ ព្រំ សុវណ្ណកណ្ណិកា
ប្រភព៖ Inc.com
