រឿងទាំង៤យ៉ាងដែលនៅពីក្រោយ «ការមិនទាន់រៀបការរបស់នារីៗ »
អ្នកណាៗក៏ចង់បានគូស្រករជីវិតដែរ ព្រោះការនៅម្នាក់ឯង មិនយូរឡើយអ្នក នឹងទទួលរងសម្ពាធពីមនុស្សជុំវិញខ្លួន។ ហើយបើយើងនិយាយពីការរៀបការវិញ មនុស្សម្នាក់ៗ តែងតែមានការរំពឹងផ្សេងៗ និងប្លែកៗ គ្នា។ អ្នកខ្លះក៏មិនទាន់គិតគូចង់មានស្នេហា អ្នកខ្លះក៏មានគូរួចទៅហើយ។ តែអ្នកខ្លះទៀតកំពុងតែស្រលាញ់គ្នាល្អូកល្អិន តែមិនទាន់រៀបការ។ ភាគច្រើនសម្រាប់នារីៗ ដែលមិនទាន់គិតគូររៀបការ ប្រហែលជាមានរឿងរ៉ាវនៅពីក្រោយវាហើយ។ តើក្នុងនោះមានអ្វីខ្លះ?
១) ដោយសារឥទ្ធិពលអ្នកជុំវិញខ្លួន៖
មានមនុស្សជាច្រើនលើកឡើងថា ពួកគេមិនចង់បានគូស្រករឡើយដោយសារតែធ្លាប់មានមិត្តភ័ក្ដិ និងអ្នកជិតខាងដែលទើបតែរៀបការហើយនោះ តែងមានការឈ្លោះទាស់ទែងគ្មានជាប្រចាំ។ ហើយមានដៃគូដែលមិនយល់ចិត្ត ព្រមទាំងលប លួចក្បត់ថែមទៀត។ ដូចនេះពួកគេគិតថា ការរៀបការគឺមិននាំសុភមង្គលមកដល់រូបគេឡើយ។ ហើយមានតែការនៅម្នាក់ឯងប៉ុណ្ណោះដែលមិនឈឺចាប់។
២) ធ្លាប់មានការបែកបាក់គ្នា៖
សម្រាប់នារីខ្លះដែលគាត់មិនទាន់ចង់មានសង្សារ គឺមកពីពួកគេធ្លាប់ទទួលបានការឈឺចាប់ពីការបែកបាក់ស្នេហានោះ។ អ្នកខ្លះមិនមែនបែកបាក់ម្ដងជាពីរដងទេ តែសឹងរាប់មិនអស់ឯណោះ។ ដូចនេះពួកគេបង្ហាញថា៖ «ការឈឺចាប់ពីស្នេហាគឺគ្រប់គ្រាន់ហើយ ម្យ៉ាងពួកគេក៏លែងចង់ជឿនរណាទៀតដែរ។»
៣) ចង់មានសេរីភាពធ្វើអ្វីគ្រប់យ៉ាង៖
សម្រាប់នារីខ្លះដែលពួកគាត់ចង់មានសេរីភាពនឹង មិនចង់រស់នៅក្រោមការកៀបសង្កត់ពីនរណានោះ ពួកគាត់នឹងជ្រើសរើសការនៅម្នាក់ឯងជាងការមានគូស្រករ។ អ្នកខ្លះចង់ដើរលេងឲ្យបានគ្រប់ប្រទេស ហើយអ្នកខ្លះចង់ក្លាយជានារីដែលគ្មានបន្ទុកគ្រួសារ ឬបន្ទុកអ្នកដទៃ យកមកដាក់ខ្លួន។
៤) រវល់នឹងការងារពេក៖
សម្រាប់នារីខ្លះដែលមានឋានៈធំ ពួកគេកម្រនឹងមានពេលវេលាក្នុងការដើរស្វែងរកគូស្រករណាស់។ នេះដោយសារតែការចំណាយពេលច្រើននៅកន្លែងធ្វើការជ្រុលពេក ទាល់តែគ្មានពេលស្វែងរកសង្សារឬណាត់ជួបអ្នកដទៃ ដើម្បីបង្កើតស្នេហា។ ម្យ៉ាងទៀត បើកាលណាអ្នករវល់នឹងការងារខ្លាំងពេក ក៏គ្មានអ្នកណាហ៊ានសុំស្នេហ៍ នឹងនាងដែរ ព្រោះខ្លាចនាងគ្មានពេលផ្ដល់ឲ្យគេ៕
ប្រែសម្រួល៖ ព្រំ សុវណ្ណកណ្ណិកា
ប្រភព៖ bustle
