១០ ជំហានសាមញ្ញៗជួយឲ្យអ្នកមានសុវត្ថិភាពហិរញ្ញវត្ថុនៅវ័យ ៣០ឆ្នាំ
ពេលដែលអ្នកមានសុវត្ថិភាពហិរញ្ញវត្ថុគ្រប់គ្រាន់ អ្នកអាចសប្បាយរីករាយនឹងជីវិតចូលនិវត្តន៍បាន។ ចូលដល់វ័យ ៣០ឆ្នាំជាវ័យមួយដែលអ្នកចាប់ផ្តើមចង់បានផ្ទះ ចង់បានឡាន ចង់បង្កើតក្រុមគ្រួសារ ចង់បានអ្វីដែលអ្នកឯទៀតគេមាន ចង់បានតម្រូវការសង្គមជាច្រើន លើសពីនេះអ្នកក៏ចង់បានការសន្សំមួយផ្នែកដើម្បីអនាគត។ ដើម្បីឲ្យជីវិតអ្នកពេលចូលនិវត្តន៍បានរីករាយ អ្វីដែលអ្នកគួរត្រៀមមិនមែនចាំជិតដល់ពេលចូលនិវត្តន៍ទើបចាប់ផ្តើមសន្សំនោះទេ ហើយខាងក្រោមនេះជាអ្វីដែលអ្នកគួរធ្វើមុនឈានចូលដល់វ័យ ៣០ឆ្នាំដើម្បីការពារហិរញ្ញវត្ថុ និងមានសេរីភាពហិរញ្ញវត្ថុ៖
១) មានភាពរីករាយខ្លះ អ្នកគួរតែរីករាយនឹងជីវិតរបស់អ្នកឲ្យហើយទាន់ពេលដែលអ្នកនៅក្មេងអាចសប្បាយបាន ព្រោះចៀសមិនផុតទេដែលអ្នកត្រូវជួបទុក្ខវេទនានៅពេលចាស់ទោះមិនមែនដោយសារលុយកាក់ ក៏ដោយសារជំងឺដែរ។ ភាពជោគជ័យក្នុងជីវិតគឺជាសំដៅលើជីវិតមួយដែលអាចស្វែងរកសមតុល្យពេលវេលារវាងគ្រួសារនិងមិត្តភក្តិ និងពេលវេលារវាងការងារនិងការលំហែកម្សាន្ត។
២) ត្រូវទទួលស្គាល់ថាទ្រព្យហិរញ្ញវត្ថុសំខាន់បំផុតរបស់អ្នកគឺខ្លួនអ្នកផ្ទាល់ ជំនាញ ចំណេះដឹង និងបទពិសោធន៍គឺជាទ្រព្យសំខាន់ដែលអ្នកត្រូវមាន ហើយវាក៏មិនអាចបាត់បង់ទៅណាដែរ។ តម្លៃដែលអាចរកបានសម្រាប់អនាគតរបស់អ្នកអាចជាការសន្សំ ការវិនិយោគ ដែលបានមកពីអាជីពរបស់អ្នក។ អាជីពការងាររបស់អ្នកជាកត្តាសំខាន់ដើម្បីឲ្យអ្នកសម្រេចបានជោគជ័យនូវឯករាជ្យភាពហិរញ្ញវត្ថុ និងសុវត្ថិភាពហិរញ្ញវត្ថុ។ ឆ្លុះកញ្ចក់មើលខ្លួនឯងត្រូវចាំថាខ្លួនរបស់អ្នកជាទ្រព្យ វិនិយោគលើខ្លួនឯងសម្រាប់អនាគត បង្កើនតម្លៃខ្លួនឯងតាមរយៈការធ្វើការងារ បន្តអភិវឌ្ឍចំណេះដឹង ជំនាញ បទពិសោធន៍ ប្រឹងប្រែងឈោងចាប់យកអ្វីដែលអ្នកប្រាថ្នា។
៣) ធ្វើជាអ្នករៀបចំផែនការ មិនមែនត្រឹមជាអ្នកសន្សំ តាមការស្រាវជ្រាវបានបង្ហាញថាអ្នកដែលបានរៀបចំផែនការសម្រាប់ជីវិត អនាគតរបស់ពួកគេតែងមានសល់ទ្រព្យច្រើនជាងអ្នកដែលមិនបានគិត។ មនុស្សជោគជ័យតែងមានគោលដៅច្បាស់លាស់សម្រាប់ខ្លួនឯង ហើយយកគោលដៅនោះជាការកំណត់ អភិវឌ្ឍដើម្បីសម្រេចផែនការ។ ទោះពេលខ្លះផែនការដែលបានគ្រោងទុកមុនអាចទៅតាមបន្ទាត់ និងចំនុចដែលដៅរួច ១០០% ក៏ដោយក៏វាប្រសើរជាងការជីវិតមួយដែលតែងតោលមិនបានបោះស្នឹងហើយចេះតែរសាត់អណ្តែតគ្មានកោះត្រើយនោះដែរ។
៤) កំណត់គោលដៅរយៈពេលខ្លីដើម្បីសម្រេចផែនការរយៈពេលយូរ ជីវិតយើងមានភាពមិនប្រាកដប្រជាច្រើនណាស់ និងអាចមានការផ្លាស់ប្តូរច្រើននៅចន្លោះអាយុ ៣០ឆ្នាំនេះ។ ជាជាងការដែលដាក់ផែនការរយៈពេលវែង អ្នកគួរមានគោលដៅរយៈពេលខ្លីដែលអាចឲ្យអ្នកងាយសម្រេចផែនការរយៈពេលវែងបានល្អ។
៥) ផែនការសម្រាប់ការចូលនិវត្តន៍ បើនិយាយពីរឿងចូលនិវត្តន៍វិញមនុស្សយើងតែងគិតថាវាជាពេលវេលាសម្រាកលំហែមួយចុងក្រោយក្នុងជីវិត។ អ្នកត្រូវមានគម្រោងថាអ្នកចង់បានអ្វី អ្នកត្រូវធ្វើអ្វីពេលចូលនិវត្តន៍ ដូច្នេះអ្នករៀបចំផែនការហិរញ្ញវត្ថុ អ្នកត្រូវចាប់ផ្តើមសន្សំបន្តិចម្តងៗ ហើយធ្វើវាជារៀងរាល់ខែដើម្បីសម្រេចបំណង និងទៅដល់គោលដៅ។
៦) រក្សាបែបផែនក្នុងការរស់នៅដោយចំណាយតិចបំផុត អ្នកទើបតែបញ្ចប់ការសិក្សាថ្មីៗហើយចេញធ្វើការបានពីទៅបីឆ្នាំតែងតែមានភាពលើសនៃលំហូរសាច់ប្រាក់របស់គាត់។ គាត់នៅតែប្រើទម្លាប់មួយដូចកាលនៅរៀនការចេះសន្សំសំចៃ ហើយគាត់អាចរកប្រាក់បានច្រើនជាងតម្រូវការរបស់គាត់។ ជាជាងការប្រើវិធីមួយដែលអាចរកចំណូលបានច្រើនទៅជាការផ្លាស់ប្តូរទម្លាប់នៃការរស់នៅបែបប្រណិតមួយ នោះគឺការព្យាយាមកាត់បន្ថយបំណុល និងបន្ថែមវាទៅលើការសន្សំ។ ពេលអ្នកអាចទទួលបានការងារដែលមានប្រាក់ខែខ្ពស់អ្នកអាចឈានមួយជំហានទៅក្នុងផែនការដែលអ្នកបានគ្រោងនោះហើយ។
៧) ក្លាយជាមនុស្សដែលមានចំណេះជំនាញហិរញ្ញវត្ថុ បង្កើតលុយជារឿងមួយ តែការសន្សំនិងធ្វើឲ្យវាកើតកូនកើតចៅគឺជារឿងមួយផ្សេងទៀត។ ការគ្រប់គ្រងហិរញ្ញវត្ថុនិងវិនិយោគគឺជាការខិតខំប្រឹងប្រែងស្ទើរពេញមួយជីវិត។ តាមការស្រាវជ្រាវបានបង្ហាញថាអ្នកដែលមានចំណេះដឹងផ្នែកហិរញ្ញវត្ថុច្រើនមានទ្រព្យច្រើនជាងអ្នកមិនមានចំណេះដឹងផ្នែកនេះ។
៨) ចាប់យកឱកាស គណនាលើហានិភ័យ ធ្វើការគណនាលើហានិភ័យពេលដែលអ្នកនៅក្មេងគឺជាការសម្រេចចិត្តដ៏ប្រុងប្រយ័ត្នមួយក្នុងជីវិត។ អ្នកអាចធ្លាប់សាងកំហុស តែត្រូវចាំថាកំហុសគឺជាអ្នកបង្រៀនយើង អ្នកតែងតែទទួលបានបទពិសោធន៍ជាច្រើនពីកំហុសខ្លួនឯង ហើយក៏ទទួលបានជោគជ័យដោយសារការកែប្រែកំហុសដែរ។ ឧទាហរណ៍ដែលបញ្ជាក់ពី ការគណនាលើហានិភ័យ៖ - ធ្វើការផ្លាស់ប្តូរទៅរស់នៅទីក្រុងថ្មីដែលមានឱកាសការងារ - ត្រលប់ទៅសាលាវិញដើម្បីបានការបណ្តុះបណ្តាលបន្ថែម - ទទួលយកការងារថ្មីមួយពីក្រុមហ៊ុនផ្សេងដើម្បីទទួលបានចំណូលទាបជាង តែមានសក្តានុពលការងារច្រើនជាងមុន - ចាប់ផ្តើមក្រុមហ៊ុនថ្មីមួយ ឬជាអាជីវកម្ម startup - វិនិយោគលើមូលបត្រដែលមានហានិភ័យខ្ពស់ ប៉ុន្តែក៏ទទួលបានចំណេញមកវិញបានច្រើនដែរ (high risk high return)
៩) ខ្ចីប្រាក់ដើម្បីយកទៅវិនិយោគ ដល់វ័យនេះហើយ បើអ្នកចង់ធ្វើការខ្ចីប្រាក់គួរតែជាការខ្ចីដើម្បីវិនិយោគ នៅពេលដែលអ្នកទទួលបានផលចំនេញអ្នកមានលទ្ធភាពខ្ពស់ក្នុងការសងត្រលប់ទៅម្ចាស់បំណុល។ វាជាការល្អបើអ្នកវិនិយោគវាទៅលើមូលបត្រ ព្រោះវាជួយឲ្យអ្នកបានចំនេញក៏ដូចជាចំណេះដឹងបន្ថែមពីវា។ មិនដូច្នោះទេ អ្នកអាចយកវាជាការវិនិយោគលើខ្លួនឯងដូចជាការសិក្សា បង្កើតអាជីវកម្មផ្ទាល់ខ្លួន ទិញផ្ទះ (សម្រាប់ជួលបន្ត) វាសុទ្ធតែអាចជួយឲ្យអ្នកទទួលបានផល។
១០) ទាញយកផលប្រយោជន៍ពីហិរញ្ញវត្ថុដោយសេរីបំផុត លើលោកនេះវាគ្មានទេពាក្យថា free ត្រូវចេះទាញយកផលប្រយោជន៍ពីអ្វីមួយដែល ឧទារណ៍ថាបើអ្នកស្ថិតនៅក្នុងគម្រោងមួយរបស់ក្រុមហ៊ុនសម្រាប់ការចូលនិវត្តន៍ ត្រូវប្រាកដថាវាបានផ្តល់ឲ្យអ្នកក្នុងការចូលរួមចំណែកទទួលបានអ្វីដែលក្រុមហ៊ុននឹងផ្តល់ឲ្យអ្នកពិតប្រាកដមែន៕
ដោយ៖ យ៉ាយ៉ា
ប្រភព៖ Business Blog
