ហេតុអ្វីការបើកអាជីវកម្មគឺជាផ្លូវមួយឆ្ពោះទៅរកឯករាជ្យភាពហិរញ្ញវត្ថុ?
តើអ្នកអាចប្រាប់បានទេថា តើវិធីណាជាវិធីល្អបំផុតធ្វើឲ្យអ្នកមានភាពឯករាជ្យហិរញ្ញវត្ថុ? តើអ្នកគួរធ្វើអ្វីទើបមានលុយ និងធ្វើឲ្យជីវិតរបស់អ្នកកាន់តែប្រសើរជាងមុន? សំនួរនេះមានតែអ្នកមាន សហគ្រិន អ្នករកស៊ី ឬ ម្ចាស់អាជីវកម្មប៉ុណ្ណោះដែលអាចឆ្លើយបានត្រូវជាង ខណៈដែលជីវិតអ្នកធ្វើការឲ្យគេបានត្រឹមតែដឹង ប៉ុន្តែមិនបានពាល់ច្បាស់នៅក្នុងចិត្ត។
តទៅនេះ អ្នកនឹងបានដឹងច្បាស់ពីមូលហេតុពិតប្រាកដថា ហេតុអ្វីបានជាការធ្វើជំនួញ ឬអាជីវកម្មជាផ្លូវដ៏មានប្រសិទ្ធិមួយធ្វើឲ្យអ្នកមានឯករាជ្យភាពហិរញ្ញវត្ថុ? ផ្អែកតាមមេរៀនរបស់បណ្តាអ្នកជំនួញ ម្ចាស់អាជីវកម្ម ឬក្រុមហ៊ុនធំៗគឺថា បុគ្គលទាំងនេះរស់នៅជាមួយនឹងការសន្សំសំចៃប្រាក់ដោយឈ្លាសវៃ ការចំណាយដោយប្រុងប្រយ័ត្ន និងរស់នៅជាមួយមហិច្ឆតាធំ ដែលជាទម្លាប់ដ៏វិសេសវិសាលនៃគ្រឹះកសាងភាពមានបាន។
ភាពម៉ត់ចត់ និងការចំណាយនានានៅក្នុងក្រុមហ៊ុនប្រកបដោយភាពឆ្លាតវៃគឺជាគ្រឹះនៃឯករាជ្យភាពហិរញ្ញវត្ថុ ការគ្រប់គ្រងការចំណាយនៅក្នុងក្រុមហ៊ុន គឺជាកាតព្វកិច្ចចាំបាច់របស់ម្ចាស់ក្រុមហ៊ុន។ ដូចគេនិយាយថា រន្ធធ្លាយដ៏តូចមួយអាចពន្លិចនាវាធំមួយបាន។ អត្ថន័យមួយនេះចង់ប្រាប់អ្នកថា ជាម្ចាស់អាជីវកម្ម អ្នកត្រូវតែដឹងគ្រប់ចរន្តចេញចូលប្រាក់ចំណូលចំណាយរបស់អ្នក ត្រូវវិភាគ វាយតម្លៃវាឲ្យបានម៉ត់ចត់ និងប្រកបដោយភាពឆ្លាតវៃបំផុត។ អ្នកត្រូវចាំថា ការចំណាយប្រកបដោយភាពឆ្លាតវៃ នឹងអាច ធ្វើឲ្យអាជីវកម្មរបស់អ្នកទទួលបានប្រាក់ចំណេញកាន់តែច្រើន ហើយចំណូលនោះនឹងធ្លាក់មកលើដៃអ្នក។ យុទ្ធសាស្ត្រសំខាន់បំផុតក្នុងនាមជាម្ចាស់អាជីវកម្មគឺអ្នកដាច់ខាតកុំចំណាយលើអ្វីដែលមិនចាំបាច់។ ឧទាហរណ៍ថា បើអ្នកអាចកាត់បន្ថយការចំណាយមួយនៅក្នុងរង្វង់ ៥០០ ដុល្លារក្នុងមួយខែ ។ សាកគិតទៅមើលក្នុងមួយឆ្នាំ អ្នកអាចចំណេញលុយប៉ុន្មាន? គឺ ៦ ០០០ ដុល្លារ។ អ្នកមានដឹងទេ ម្ចាស់អាជីវកម្មច្រើនណាស់បានបាត់បង់ការផ្ដោតលើការចំណាយ ដោយផ្ដោតតែរឿងរកចំណូល ហើយបានបណ្តោយឲ្យប្រាក់ចំណូលជាច្រើនបាត់បង់ទៅដោយឥតប្រយោជន៍។ ភាពហ្មត់ចត់ក្នុងការចំណាយ នឹងធ្វើឲ្យ អ្នកមានសេរីភាពហិរញ្ញវត្ថុ។
សាកគិតដើម្បីក្លាយជាម្ចាស់អាជីវកម្ម ឬក្រុមហ៊ុនជាជាងធ្វើជានាយកប្រតិបត្តិក្រុមហ៊ុន (CEO) ឬអ្នកគ្រប់គ្រងក្រុមហ៊ុន (Manager) អ្នកប្រហែលជាកំពុងធ្វើ ជា CEO ឬ អ្នកគ្រប់គ្រងក្រុមហ៊ុនរបស់អ្នកដោយខ្លួនឯង។ យ៉ាងណាមិញ ក្នុងនាមជាម្ចាស់ក្រុមហ៊ុន អ្នកអាចលក់អាជីវកម្មក៏បាន ឬ អាចជួលអ្នកណាម្នាក់ផ្សេងទៀតមកគ្រប់គ្រងជំនួសអ្នកដើម្បីរកលុយឲ្យអ្នក។ ជាការពិត វិធីនេះអ្នកមិនបាច់ហត់គិត និងទៅបង្ហាញមុខនៅក្រុមហ៊ុនរាល់ថ្ងៃ អង្គុយធ្វើការពីព្រឹករហូតដល់យប់នោះទេ។ ក្នុងនាមជាម្ចាស់ក្រុមហ៊ុន រឿងនេះអ្នកពិតជាអាចធ្វើបាន។ នេះមានន័យថា អ្នកមានជម្រើស ២នៅទីនេះ ពោលគឺអាចលក់ក្រុមហ៊ុនរបស់អ្នក ឬ ជួលអ្នកណាម្នាក់មកគ្រប់គ្រងជំនួសអ្នក។ យ៉ាងណាមិញ ជម្រើសទាំងពីរនេះគឺសុទ្ធតែបានជួយឲ្យអ្នកមានសេរីភាពហិរញ្ញវត្ថុយ៉ាងពិតប្រាកដ។
ជីវិតហិរញ្ញវត្ថុរបស់អ្នកផ្លាស់ប្ដូរភ្លាមនៅពេលអ្នកមានគម្រោងអាជីវកម្មត្រឹមត្រូវ គោលដៅដើម្បីសម្រេចភាពឯករាជ្យហិរញ្ញវត្ថុមិនមែនជារឿងមួយថ្មីឡើយ ប៉ុន្តែវាជារឿងមួយគួរឲ្យចាប់អារម្មណ៍បំផុត ហើយមនុស្សគ្រប់គ្នាសុទ្ធតែចង់បានវា។ នៅពេលអ្នកមានមុខជំនួញក្នុងដៃច្រើន អ្នកនឹងដឹងថា លុយនឹងរត់មករកអ្នកដោយរបៀបណា ហើយនៅពេលនោះហើយដែលអ្នកដឹងច្បាស់ថា ភាពឯករាជ្យហិរញ្ញវត្ថុកំពុងធ្លាក់មកលើដៃអ្នក។ បន្ទាប់មកជម្រើសចូលនិវត្តន៍ទាំងវ័យក្មេងពិតជាអាចទៅរួចប្រសិនបើអ្នកមានគម្រោងត្រឹមត្រូវដើម្បីបង្កើតវាឡើង៕
ប្រភព៖ Ianc
