ស្ថាបនិក Codigate Technology ប្រាប់ចំណុចគន្លឹះមួយចំនួនក្នុងការបើកអាជីវកម្មបច្ចេកវិទ្យា
លោក សុខ សុភមង្គល សហគ្រិនវ័យក្មេងនិងជាស្ថាបនិកក្រុមហ៊ុនបច្ចេកវិទ្យា Codingate Technology ជាក្រុមហ៊ុនដែលកំពុងទទួលបានការគាំទ្រទាំងទីផ្សារជាតិនិងអន្តរជាតិ បានបង្ហើបប្រាប់នូវគន្លឹះសម្រាប់អ្នកចង់បង្កើតអាជីវកម្ម ឬបើកក្រុមហ៊ុនបច្ចេកវិទ្យាដូចលោកគួរសិក្សាប៉ុន្មានចំណុចខាងក្រោមនេះ។
ចំណុចទីមួយ លោក សុភមង្គល ប្រាប់ថាគឺអាស្រ័យលើអ្នកដឹកនាំនឹងសមាជិកដែលនៅក្នុងក្រុមហ៊ុនត្រូវតែជាមនុស្សដែលចូលចិត្តស្វែងយល់នូវរបកគំហើញថ្មីៗទៅលើផ្នែកបច្ចេកវិទ្យា ព្រោះថានៅក្នុងវិស័យនេះផ្នែកបច្ចេកវិទ្យាមានការអភិវឌ្ឍលឿន ដោយយើងត្រូវមានការយល់ដឹងទាំងរបត់នឹងអ្នកប្រើប្រាស់ផង។ នៅបណ្ដាប្រទេសលោកខាងលិចគឺគេនៅប្រើប្រាស់កុំព្យូទ័រលើតុនៅឡើយ ប៉ុន្តែសម្រាប់ប្រទេសនៅតំបន់អាស៊ីដូចជាកម្ពុជាយើងជាដើមគឺមានការលោតផ្លោះប្រើប្រាស់រហូតដល់បច្ចេកវិទ្យាចុងក្រោយ។
លោកបន្តថា ដូច្នេះយើងមិនត្រឹមតែមើលលើបរិបថនៃបច្ចេកវិទ្យាទេ ប៉ុន្តែយើងក៏ត្រូវតែមើលទៅលើអ្នកប្រើប្រាស់ថាតើគាត់ចំណាយពេលរបស់គាត់ទៅលើអ្វី ហើយបច្ចេកវិទ្យាប្រភេទណាដែលយើងត្រូវបង្កើតឲ្យស្របនឹងតម្រូវការរបស់អតិថិជន ដែលនេះ ជាចំណុចដែលអាជីវកម្មត្រូវគិត។ លើសពីនេះទៅទៀត លោកថាអាជីវកម្មចាំបាច់ត្រូវមានប្រព័ន្ធគ្រប់គ្រងត្រឹមត្រូវ ព្រោះវានឹងផ្ដល់ភាពងាយស្រួលដល់ម្ចាស់អាជីវកម្មបានដឹង ថាតើការគ្រប់គ្រងរបស់គាត់មានប្រសិទ្ធិភាពដែរឬទេ។
ចំណុចចុងក្រោយស្ថាបនិករូបនេះប្រាប់ថា ទាក់ទងនឹងការធ្វើអាជីវកម្មជាទូទៅយើងប្រាកដជាត្រូវដឹងហើយទៅលើ ការគ្រប់គ្រងបុគ្គលិក គ្រប់គ្រងលំហូរសាច់ប្រាក់ គ្រប់គ្រងការលក់របស់ខ្លួន ថាតើយើងអាចគ្រប់គ្រងបែបណាឲ្យប្រកបដោយប្រសិទ្ធិភាព៕
ដោយ៖ ជួប ស្រីរ័ត្ន
