រឿង ២ យ៉ាងដែលអ្នកត្រូវដឹងដើម្បីក្លាយជាសហគ្រិនជោគជ័យ
អ្វីទៅដែលជួយឲ្យសហគ្រិនម្នាក់ក្លាយជាសហគ្រិនជោគជ័យ? មានមនុស្សមិនតិចទេដែលមានបំណងក្លាយជាសហគ្រិន តែបំណងមួយនោះត្រូវបានបរាជ័យទៅវិញដោយសារកត្តាផ្សេងៗ។
ដូចនេះ តើមានអាថ៌កំបាំងមែនទេដែលនាំឲ្យបុគ្គលម្នាក់ក្លាយជាសហគ្រិនដែលជោគជ័យនៅក្នុងសង្គម? តែធាតុពិតអ្នកនឹងក្លាយជាមនុស្សដែលជោគជ័យម្នាក់ក្នុងអាជីវកម្ម នៅពេលដែលអ្នកអាចដឹងច្បាស់ពី ២ ចំនុចសំខាន់ៗខាងក្រោមនេះ៖
១) យល់ច្បាស់ពីមនុស្ស
ជាពាក្យសាមញ្ញៗ គ្រាន់តែយល់ពីមនុស្ស។ តែនេះជាល្បិចធំណាស់ ព្រោះការដែលយល់ពីមនុស្សជួយអ្នកបានច្រើនណាស់ដល់ដំណើរការអាជីវកម្ម។ មិនបាច់គិតអ្វីច្រើនទេ អ្នកគ្រាន់តែពិចារណាបន្តិចថា ក្នុងនាមជាអ្នកលក់ម្នាក់ ការលក់ទំនិញឬសេវាកម្មដល់អតិថិជនគឺលក់ឲ្យមនុស្ស ទោះបីទំនិញនោះសម្រាប់បំពេញតម្រូវការរបស់សត្វ ឬរុក្ខជាតិនៅនៅតែមនុស្សជាអ្នកមកទិញ។
ជាអ្នកលក់ពូកែអាចដឹងច្បាស់ថានរណាជាអតិថិជនពិតប្រាកដរបស់ខ្លួន ផលិតផលឬសេវាកម្មរបស់ខ្លួនលក់ទៅសម្រាប់អតិថិជនក្នុងថ្នាក់ណា មនាកម្រិតជីវភាពប៉ុនណា មនុស្សបែបណាដែលអាចទទួលយកផលិតផល ឬសេវាកម្មនោះបាន។ លើសពីនេះ បន្ទាប់ពីលក់និងស្គាល់អតិថិជនបានមួយរយៈ អ្នកលក់ពូកែអាចកត់សម្គាល់បានថា អតិថិជន A ម្នាក់មានចំណង់ចំណូលចិត្តបែបណា គាត់ត្រូវការលក្ខណៈពិសេសបែបណាលើផលិតផលយើង គាត់ជាមនុស្សសាមញ្ញឬជាមនុស្សមិនចូលចិត្តផ្តល់ភាពស្មុគស្មាញច្រើនដល់យើងទេ។ ពេលអ្នកអាចស្គាល់ប្រភេទមនុស្សច្រើនវាធ្វើឲ្យអ្នកងាយសម្របខ្លួននៅក្នុងសង្គម មានឱកាសច្រើនដើម្បីទាញផលចំនេញក្នុងអាជីវកម្ម ហើយអ្នកនឹងក្លាយជាសហគ្រិនមួយរូបដែលជោគជ័យ។
មិនត្រឹមតែសហគ្រិនទេ នរណាក៏ដោយឲ្យតែមានសមត្ថភាពឆាប់មើលយល់ចិត្តមនុស្ស ដឹងពីតម្រូវការមនុស្សនៅជុំវិញខ្លួនច្រើន ស្គាល់ពីចរិតមនុស្ស នោះបង្ហាញថាអ្នកជាមនុស្សដែលពោរពេញទៅដោយភាពជាអ្នកដឹកនាំនិងជាមនុស្សដែលអាចងាយបង្កើតមិត្តភាពជាមួយអ្នកជុំវិញខ្លួនបានងាយបំផុត។ អ្នកក៏នឹងក្លាយជាមនុស្សម្នាក់ដែលមានភាពជោគជ័យក្នុងការដឹកនាំដូចគ្នា។
២) យល់ពីបរិបទសេដ្ឋកិច្ច
ធម្មតាទេការរកទទួលទានគឺត្រូវដឹងច្បាស់បំផុតពៅបរិបទសេដ្ឋកិច្ចសង្គម។ សហគ្រិនល្អមួយរូបគាត់ធ្វើការតាមដានខ្លាំងណាស់ពីដំណើរវិវដ្តសេដ្ឋកិច្ចប្រទេស សេដ្ឋកិច្ចតំបន់ និងសេដ្ឋកិច្ចពិភពលោក សួរថាហេតុអ្វីមែនទេ? ចម្លើយនោះគឺថាការរកស៊ីគឺជាការធ្វើឲ្យមានដំណើរ និងផ្តល់ចរន្តក្នុងប្រព័ន្ធសេដ្ឋកិច្ច។ ក្នុងនាមជាសហគ្រិនម្នាក់ គាត់ដឹងច្បាស់ណាស់ថាប្រព័ន្ធសេដ្ឋកិច្ចដែលគាត់កំពុងរស់នៅជាប្រទេសដែលមានបរិបទសេដ្ឋកិច្ចដូចម្តេច សេដ្ឋកិច្ចកំពុងរីកចម្រើន សេដ្ឋកិច្ចដែលមានស្ថិរភាព សេដ្ឋកិច្ចដែលកំពុងដាំក្បាលចុះ ឬសេដ្ឋកិច្ចដែលកំពុងងើបរើបឡើងវិញ។ គេយល់ច្បាស់ពីនិន្នាការសេដ្ឋកិច្ច ហើយគេក៏អាចក្តាប់ឱកាសទាញយកប្រយោជន៍ពីការដំណាក់កាលនីមួយៗរបស់សេដ្ឋកិច្ច៕
ដោយ៖ យ៉ាយ៉ា
