ចង់ធ្វើជាអ្នករកស៊ីជោគជ័យម្នាក់ មានជំនាញទាំងអស់នេះនៅក្នុងខ្លួនហើយឬនៅ?
នៅពេលអ្នកចង់មកជំនួញអ្វីមួយអ្នកអាចគិតថា មានត្រឹមបទពិសោធន៍ និងដើមទុនអាចគ្រប់គ្រាន់សម្រាប់អ្នកទៅហើយ។ ក៏ប៉ុន្តែនៅក្នុងទិដ្ឋភាពជាក់ស្តែង មានចំណុច២នេះ វាមិនទាន់គ្រប់គ្រាន់នោះទេ។ ជាការពិត អ្នកត្រូវមានសមត្ថភាពក្នុងការគ្រប់គ្រងពេលវេលា ហិរញ្ញវត្ថុ ទំនាក់ទំនង ជាដើម ដែលនឹងបង្ហាញជូនអ្នកនៅខាងក្រោមនេះ។ បើគ្មានជំនាញទាំងនេះ អ្នកនឹងពិបាកធានាបានជាសហគ្រិនដ៏ជោគជ័យម្នាក់ណាស់ ខណៈដែលនៅសតវត្សទី ២១ នេះ សហគ្រិនម្នាក់ៗត្រូវតែរៀនសូត្រជំនាញថ្មីៗបន្ថែមទៀតកាន់តែច្រើនឡើងផងដែរ។
ជំនាញទី១៖ ការគ្រប់គ្រងលុយកាក់
នេះជាជំនាញសំខាន់មួយព្រោះថា អ្នកមិនអាចសម្រេចបានគោលដៅជាសហគ្រិនបានទេប្រសិនបើអ្នកមិនដឹងថា តើគ្រប់គ្រងហិរញ្ញវត្ថុរបស់អ្នកដោយរបៀបណា? ចំណុចនេះទាមទារឲ្យអ្នកបង្កើតរចនាសម្ព័ន្ធដ៏ត្រឹមត្រូវមួយក្នុងដៃដើម្បីតាមដានចំណូលចំណាយរបស់អ្នកមកពីណា និងទៅណាខ្លះ។ ចំណុចមួយដែលអ្នកត្រូវចងចាំគឺថា ត្រូវធ្វើម៉េចគ្រប់គ្រងហិរញ្ញវត្ថុរបស់អ្នកឲ្យមានប្រសិទ្ធភាព បើមិនដូច្នេះទេ ជំនួញអ្នកនឹងស្លាប់។
ជំនាញទី២៖ មហិច្ឆតា
មហិច្ឆតាគឺជាជំនាញដ៏លំបាកបំផុតមួយរបស់សហគ្រិន។ គោលដៅដែលអ្នកត្រូវមានជំនាញនេះគឺថា អ្នកចាំបាច់ត្រូវការវាដើម្បីបន្តដំណើរអាជីវកម្មរបស់អ្នកនៅពេលដែលស្ថានភាពស្ថិតនៅក្នុងភាពមិនអំណោយផល។ វាជាសមត្ថភាពក្នុងការយល់ដឹងពីគោលដៅដែលត្រូវទៅនៅពេលអនាគត និងមិនបាត់បង់ការផ្ដោតយកចិត្តទុកដាក់របស់អ្នក។ ជាទូទៅសហគ្រិនដែលជោគជ័យ ជាមនុស្សដែលអន្ទះសា ស្វាហាប់ សកម្ម មិនងាយបោះបង់ និងស្រលាញ់ការងាររបស់ខ្លួនជាទីបំផុត។
ជំនាញទី៣៖ ការរៀនសូត្រជាប្រចាំ
ការរៀនសូត្រគឺជាកិច្ចការដែលត្រូវធ្វើមិនឈប់ឈរ។ ក្នុងនាមជាសហគ្រិនជោគជ័យម្នាក់ ការរៀនសូត្រទោះនៅ ក្នុងប្រព័ន្ធ ឬក្រៅប្រព័ន្ធក្តី គឺជាកិច្ចការសំខាន់មួយទៀតក្រៅពីមុខជំនួញរបស់ខ្លួន។ ហេតុដូច្នេះហើយវាទាមទារឲ្យអ្នកត្រូវសិក្សាស្វែងយល់ពីចំណេះដឹងថ្មីទាំងនៅក្នុងវិស័យបច្ចេកវិទ្យា ជំនាញដែលទាក់ទងទៅនឹងមុខជំនួញរបស់អ្នក និងជំនាញផ្សេងៗទៀតគាំទ្រដល់ការអភិវឌ្ឍសមត្ថភាពរបស់អ្នក។ ជំនាញនេះអ្នកត្រូវតែធ្វើជាប្រចាំ បើមិនដូច្នេះទេ អ្នកនឹងជួបផលលំបាកក្នុងការប្រកួតប្រជែងជាមួយគេណាស់។
ជំនាញទី៤៖ ភាពច្នៃប្រឌិត
ដើម្បីជោគជ័យនៅក្នុងអាជីវកម្មរបស់អ្នក អ្នកត្រូវតែជាសហគ្រិនដែលមានភាពច្នៃប្រឌិតម្នាក់។ ការធ្វើកិច្ចការអ្វីមួយដដែលៗ នឹងធ្វើឲ្យអ្នកទទួលបានលទ្ធផលដដែលៗ។ ហេតុដូច្នេះ ហេតុអ្វីអ្នកចាំបាច់ត្រូវមានភាពច្នៃប្រឌិត? គឺដោយសារតែវាជួយឲ្យអ្នកទទួលបានលទ្ធផលថ្មីដែលល្អប្រសើរជាងមុននៅក្នុងមុខជំនួញរបស់អ្នក។ អ្នកត្រូវមានផ្នត់គំនិតបែបច្នៃប្រឌិតក្នុងការស្វែងរកយុទ្ធសាស្ត្រ ឬគន្លឹះថ្មីៗដើម្បីធ្វើយ៉ាងណាឲ្យមុខជំនួញរបស់អ្នកកាន់តែរីកចម្រើនទៅមុខ។
ជំនាញទី៥៖ ផលិតភាពការងារ
សហគ្រិនជោគជ័យត្រូវរៀនពីរបៀបប្រើប្រាស់ជំនាញដែលធ្វើឲ្យមានផលិតភាពការងារដោយរកឲ្យឃើញនូវគោលការណ៍ ឬវិធីសាស្ត្រដែលមានប្រយោជន៍សម្រាប់ខ្លួន និងប្រកាន់ខ្ជាប់គោលការណ៍នេះឲ្យបានម៉ឺងម៉ាត់បំផុត។ លើសពីនេះទៅទៀត សហគ្រិនជោគជ័យត្រូវបង្កើនផលិតភាពការងាររបស់ខ្លួនដោយបំពេញការងារមួយឲ្យអស់លទ្ធភាព និងប្រើប្រាស់យន្តការតាមដានផលិតភាពការងារប្រកបដោយប្រសិទ្ធភាពសម្រាប់និរន្តរភាពក្រុមហ៊ុនរបស់ខ្លួន។
ជំនាញទី៦៖ ទំនាក់ទំនងក្នុងសង្គម
សហគ្រិនមួយចំនួនបានបង្ហាញការយកចិត្តទុកដាក់ខ្លាំងក្នុងការឲ្យតម្លៃលើជំនាញមួយនេះ ខណៈដែលសហគ្រិនខ្លះទៀតបានមើលរំលងជំនាញមួយនេះ។ សហគ្រិនដែលមិនបានឲ្យតម្លៃលើជំនាញមួយនេះបានបរាជ័យក្នុងការស្វែងរកមនុស្សល្អៗជាច្រើនដែលមានសមត្ថភាពមកធ្វើជាដៃគូជំនួញ ឬដៃគូទំនាក់ទំនងក្នុងអាជីពរបស់ខ្លួនដែលជាហេតុធ្វើឲ្យបាត់បង់ឱកាសជោគជ័យ។ ផ្ទុយទៅវិញ ការបង្កើតទំនាក់ទំនងនៅក្នុងសង្គមដ៏ល្អមួយជាពិសេសជាមួយក្រុមមនុស្សដែលមានជំនាញប្រហាក់ប្រហែលអ្នក នឹងធ្វើឲ្យអ្នកទទួលបានគន្លឹះថ្មីៗ បទពិសោធន៍ និងយុទ្ធសាស្ត្រជាច្រើនដែលអ្នកមិនបានរៀននៅ ក្នុងសាលាមកអនុវត្តនៅក្នុងមុខជំនួញរបស់អ្នក។
ជំនាញទី៧៖ ការគ្រប់គ្រង
ជំនាញទាំងប៉ុន្មានខាងលើនេះមិនទាន់គ្រប់គ្រាន់ទេសម្រាប់ធ្វើជាសហគ្រិនដ៏ជោគជ័យម្នាក់ដរាបណាអ្នកមិនមានជំនាញផ្នែកគ្រប់គ្រង។ ក្នុងនាមជាសហគ្រិនម្នាក់ អ្នកចាំបាច់ត្រូវគ្រប់គ្រងការងារជំនួញរបស់អ្នកឲ្យមានប្រសិទ្ធភាពដើម្បីទទួលបានលទ្ធផលល្អដូចការចង់បានរបស់អ្នក។ នេះគឺជាពេលវេលាដ៏ល្អមួយសម្រាប់អ្នកត្រូវរៀនសូត្រពីរបៀប លើកទឹកចិត្តខ្លួនឯង អភិវឌ្ឍ និងគាំទ្រដល់បុគ្គលិករបស់អ្នក។ ការរៀនសូត្រពីជំនាញមួយនេះ នឹងអាចជួយឲ្យអ្នកអាចចាត់ចែង និងរៀបចំបំពេញការងារស្របតាមអ្វីដែលជាភាពខ្លាំង និងចំណុចខ្សោយរបស់ពួកគេ។
ជំនាញទី៨៖ ចំណេះដឹងលើប្រព័ន្ធផ្សព្វផ្សាយបណ្ដាញសង្គម
នេះជាជំនាញមួយដែលអាចបង្កើតទិដ្ឋភាពអាជីវកម្មរបស់អ្នកកាន់តែរលូនឡើងដោយហេតុថា នៅពេលបច្ចុប្បន្ននេះ ប្រព័ន្ធផ្សព្វផ្សាយសង្គមបានដើរតួនាទីយ៉ាងសំខាន់នៃភាពជោគជ័យរបស់អ្នក។ នៅក្នុងដំណាក់កាលដំបូងនៃអាជីវកម្មរបស់អ្នក អ្នកចាំបាច់ត្រូវមានចំណេះដឹងមួយនេះឲ្យបានច្រើនបំផុតតាមដែលអាចធ្វើបាន និងត្រូវប្រើប្រាស់វាឲ្យមានប្រសិទ្ធភាពដើម្បីឲ្យវាជួយផ្សព្វផ្សាយអាជីវកម្មរបស់អ្នកឲ្យដល់អតិថិជនគោលដៅ។ ក្នុងករណីអ្នកមិនមានពេលច្រើនដើម្បីស្វែងយល់ពីវា អ្នកអាចជួលអ្នកផ្សេងទៀតមកគ្រប់គ្រងជំនួសអ្នកក៏បាន។
ជំនាញទី៩៖ តស៊ូ
សហគ្រិនជោគជ័យទាំងអស់សុទ្ធតែធ្លាប់បានជួបប្រទះការបរាជ័យរាប់មិនអស់ និងពេលខ្លះបានធ្លាក់ចូលទៅក្នុងស្ថានភាពមួយដែលធ្ងន់ធ្ងរទៀតផង។ យ៉ាងណាក៏ដោយ គេអាចសហគ្រិនប្រភេទនេះជោគជ័យបាន គឺដោយសារតែពួកគេអាចហែលឆ្លងកាត់ឧបសគ្គទាំងនោះបាន ខណៈដែលអ្នកផ្សេងទៀតបានបោះបង់អាជីវកម្មរបស់ខ្លួន។ ពួកគេបានប្រែក្លាយការបរាជ័យទាំងនោះទៅជាឱកាសសម្រាប់សិក្សារៀនសូត្រ ហើយបន្តដំណើរជាថ្មីម្តងទៀត មិនព្រមបោះបង់រហូតទទួលបានជោគជ័យនៅទីបំផុត។
ជំនាញទី១០៖ ការគ្រប់គ្រងពេលវេលា
ការគ្រប់គ្រងពេលវេលាឲ្យមានប្រសិទ្ធភាព ត្រូវបានចាត់ទុកថា ជាជំនាញដ៏មានតម្លៃបំផុតមួយទៀតសម្រាប់សហគ្រិនដែលជោគជ័យ។ ដើម្បីគ្រប់គ្រងពេលវេលាឲ្យមានប្រសិទ្ធភាព អ្នកត្រូវរៀបចំគម្រោងដែល អ្នកត្រូវធ្វើឲ្យបានលម្អិតបំផុត ឬរៀបចំកាលវិភាគការងារប្រចាំថ្ងៃ។ បន្ថែមលើនេះ អ្នកក៏ត្រូវបែងចែកការងារដែលត្រូវធ្វើតាមភាពសំខាន់របស់វាផងដែរ និងចេះជ្រើសរើសកិច្ចការផ្សេងៗដែលចាំបាច់មកធ្វើជាការងារអាទិភាពរបស់អ្នក។ សូមបញ្ជាក់ថា ប្រសិនបើអ្នកចេះគ្រប់គ្រងពេលវេលា ការងាររបស់អ្នកនឹងមានប្រសិទ្ធភាពកាន់តែខ្ពស់ និងអាចចំណាយពេលតិចផងដែរ។
ជំនាញទី១១៖ ការទំនាក់ទំនង
មិនចំពោះថា អាជីវកម្មរបស់អ្នកតូច ឬធំប៉ុណ្ណាក៏ដោយ វាជារឿងចំាបាច់ដែលអ្នកត្រូវអភិវឌ្ឍខ្លួនធ្វើជាសហគ្រិនដែលពោរពេញទៅដោយសមត្ថភាពនៅក្នុងការទំនាក់ទំនងប្រកបដោយប្រសិទ្ធភាពជាមួយអតិថិជន ដៃគូជំនួញ បុគ្គលជោគជ័យ និងបុគ្គលិកនៅក្នុងស្ថាប័នរបស់អ្នកផងដែរ។ វាជាជំនួញដ៏សំខាន់ដែលធ្វើឲ្យអ្នកជោគជ័យក្នុងនាមជាសហគ្រិន។ ហេតុអ្វី? ពីព្រោះថា ប្រសិទ្ធភាពនៃការទំនាក់ទំនងរបស់អ្នកនឹងធ្វើឲ្យអ្នកស្គាល់មនុស្សកាន់តែច្រើន ស្គាល់អតិថិជនកាន់តែច្រើន និងទទួលបានការគាំទ្រពីសាធារណជនកាន់តែច្រើនដែលនឹងធ្វើឲ្យក្រុមហ៊ុនរបស់អ្នករីកចម្រើន។
ជំនាញទី១២៖ យុទ្ធសាស្ត្រអាជីវកម្ម
ការមានយុទ្ធសាស្ត្រជំនួញនៅក្នុងដៃត្រូវបានគេចាត់ទុកថា ជាជំនាញដ៏សំខាន់សម្រាប់សហគ្រិនដែលជោគជ័យ។ ថ្វីបើសហគ្រិនភាគច្រើនបានឈានដល់កម្រិតកំពូលនៃអាជីពរបស់ខ្លួនក៏ដោយតាមរយៈនឆន្ទៈខ្ពស់ និងទេពកោសល្យក៏ដោយ ក៏វាចាំបាច់ត្រូវមានយុទ្ធសាស្ត្រអាជីវកម្ម។ យុទ្ធសាស្ត្រនេះទាមទារឲ្យអ្នកមានជំនាញទាំងប៉ុន្មានខាងលើនេះដើម្បីបង្កើតរចនាសម្ព័ន្ធអាជីវកម្មមួយដ៏សមស្របសម្រាប់យកមកអនុវត្តបន្តបន្ទាប់៕
ប្រភព៖ Entrepreneur
