ឧកញ៉ា ចេង ខេង៖ បើចង់ក្លាយជាអ្នកមានទាល់តែយើងមានបេះដូងជាអ្នកមានសិន
នៅក្នុងវេទិកាស្ដីអំពី ភាពជាអ្នកមាន កាលពីពេលថ្មីៗកន្លងទៅនេះ លោកឧញ៉ា ចេង ខេង អគ្គនាយកនៃក្រុមហ៊ុន ស៊ីភីអិល និងជាប្រធានក្រុមប្រឹក្សាភិបាលសមាគមអចលនវត្ថុកម្ពុជា បើកលើកឡើងនូវពាក្យមួយឃ្លាសម្រាប់ការពិចារណាថា «បើចង់ក្លាយជាអ្នកមានទាល់តែយើងមានបេះដូងជាអ្នកមានជាមុនសិន»។
លោកឧកញ៉ា ចេង ខេង បានចែករំលែកថា ភាពជាអ្នកមានគឺមិនបានប្រកាន់ពណ៌សម្បុរស ខ្មៅ ទាបខ្ពស់ ឬពិការនោះឡើយ ពោលគឺមនុស្សគ្រប់គ្នាសុទ្ធតែអាចមានឱកាសក្លាយទៅជាអ្នកមាន។ លោកថា «បើចង់ក្លាយជាអ្នកមានទាល់តែយើងមានមហិច្ឆតាជាអ្នកមានជាមុនសិន ដូចរូបខ្ញុំកាលពីមកភ្នំពេញដំបូងខ្ញុំយកអត្តសញ្ញាណប័ណ្ណដូរបាយហូបទេ ប៉ុន្តែបេះដូងខ្ញុំប្រាប់ថាថ្ងៃណាមួយខ្ញុំនឹងធ្វើឲ្យគេស្គាល់ខ្ញុំទូទាំងប្រទេស»។
លោកឧកញ៉ាលេចធ្លោក្នុងវិស័យអចលនទ្រព្យរូបនេះបន្តថា ការតស៊ូរបស់លោកតាំងពីពេលនោះមកដល់ពេលនេះគឺលោកពិតជាអាចធ្វើបាន ហើយលោកជឿថាអ្នកគ្រប់គ្នាក៏អាចមានឱកាសដូចជារូបលោកដែរ។ លោកថា ការខិតខំតស៊ូធ្វើអ្វីមួយឲ្យបានអស់ពីលទ្ធភាព នោះផលដែលយើងទទួលបាន នឹងលើសពីការរំពឹងទុក។ បើចង់ក្លាយជាអ្នកមានប៉ុន្តែយើងបែរជាមិនទាំងហ៊ានគិតថាខ្លួនឯងអាចក្លាយជាអ្នកមានផង តើយើងអាចក្លាយទៅជាអ្នកមានបានយ៉ាងដូចម្ដេច?
ដោយ៖ ជួប ស្រីរ័ត្ន
