«មាន​អ្នក​រកស៊ី​មួយ​ចំនួន​តែង​និយាយ​ថា រកស៊ី​មិន​បាច់​រីក​ចម្រើន​ក៏​បាន​ដែរ​ឲ្យ​តែ​បាន​ប៉ុណ្ណេះ​រាល់​ថ្ងៃ​ទៅ​គឺ​បាន​ហើយ ភាសា​នេះ​គឺ​ជា​ភាសា​ខុស​ ព្រោះ​បើ​សិន​ជា​យើង​នៅ​ដដែល​គឺ​មាន​ន័យ​ថា​យើង​ដើរ​ថយ​ក្រោយ​ហើយ ព្រោះ​ថា​ទីផ្សារ​គឺ​តែង​តែ​ដើរ​ទៅ​មុខ» នេះ​ជា​ការ​លើក​ឡើង​របស់​លោក ហ៊រ ហាប់ អគ្គនាយក​រង​នៃ​ក្រុមហ៊ុន Ggear Group នៅ​ក្នុង​កម្មវិធី​ BIO Business Forum កាល​ពី​ពេល​ថ្មីៗ​កន្លង​ទៅ។

លោក​អគ្គនាយករង​ ហ៊រ ហាប់ ចែក​រំលែក​ថា ទីផ្សារ​តែង​តែ​ដើរ​ទៅ​មុខ ហើយ​ប្រាក់​ខែ​បុគ្គលិក និង​តម្លៃ​នៃ​ផលិតផល​ផ្សេងៗ​ក៏​ត្រូវ​ការ​ដំឡើង​ថ្លៃ​រាល់​ឆ្នាំ​ដែរ ដូច្នេះ​បើ​សិន​ជា​យើង​មិន​អាច​បង្កើន​ឬ​ពង្រីក​អាជីវកម្ម​របស់​យើង​បាន​ទេ យើង​នឹង​ត្រូវ​សម្លាប់​ដោយ​គូរ​ប្រជែង​របស់​យើង ព្រោះ​គូ​ប្រជែង​របស់​យើង​គេ​តែង​ដើរ​ទៅ​មុខ ដូច្នេះ​យើង​នឹង​កាន់​តែ​នៅ​ឆ្ងាយ​ទៅៗ​រហូត​ដល់​ពេល​មួយ​ផលិតផល​របស់​យើង​នឹង​លែង​មាន​អ្នក​ប្រើប្រាស់។

លោក​បន្ត​ថា​ ការ​លើក​ឡើង​ខាង​លើ​នេះ​គឺ​ក្នុង​នាម​ជា​ក្រុមហ៊ុន​មួយ​ដែល​នាំ​ចូល​ផលិតផល​មក​ពី​បរទេស​គឺ​ផលិតផល​LG​។ លោក​ថា កាល​ពី​ប៉ុន្មាន​ឆ្នាំ​មុន​ផលិតផល​ទូរស័ព្ទ​ដៃ LG ​ នៅ​ស្រុក​ខ្មែរ​អាច​មាន​គេ​ស្គាល់​ខ្លះ ប៉ុន្តែ​សម្រាប់​បច្ចុប្បន្ន​អាច​និយាយ​ថា​ផលិតផល​នេះ​បាន​ស្លាប់​ទៅ​ហើយ​នៅ​ទីផ្សារ​ស្រុក​ខ្មែរ។ ដោយ​ឡែក​បើ​យើង​ក្រឡេក​ទៅ​មើល​ផលិតផល​LG អេឡិចត្រូនិកវិញ​គឺ​មិន​ស្លាប់​ទេ ហើយ​អាច​និយាយ​ថា​យើង​ទៅ​ទីណា​ក៏​ឃើញ​មាន​ដែរ។

ដូច្នេះ​យើង​ត្រូវ​មាន​ទំនុក​ចិត្ត​លើ​ផលិតផល​របស់​យើង ហើយ​ត្រូវ​ព្យាយាម​ពង្រីក​អាជីវកម្ម​របស់​យើង។ ប៉ុន្តែ​ត្រូវ​ត្រៀម​ថា ការ​ពង្រីក​អាជីវកម្ម​យើង​ត្រូវ​ការ​ចំណាយ​ដើម​ទុន ពេល​វេលា ត្រូវ​យល់​ដឹង​ពី​បញ្ហា​ច្បាប់ ព្រម​ទាំង​ទីផ្សារ​ច្បាស់​ផង​ដែរ។ លោក​ថា ការ​ពង្រីក​អាជីវកម្ម​មិន​មែន​ជា​រឿង​ដែល​ងាយ​ស្រួល​ទេ​ ប៉ុន្តែ​វា​ជា​រឿង​ដែល​សប្បាយ​នៅ​ពេល​ដែល​យើង​ចូល​ចិត្ត​វា៕

ដោយ៖ ជួប ស្រីរ័ត្ន