អគ្គនាយក​ក្រុមហ៊ុន​ថ្នាំ​ពណ៌​ជាតិ៖ ត្រូវ​រៀន​វិនិយោគ​មុន​នឹង​រៀន​រកស៊ី​



«នៅ​ពេល​ដែល​ខ្លួន​ឯង​មិន​ទាន់​មាន​បទពិសោធន៍​គ្រប់គ្រាន់​ក្នុង​ការ​ធ្វើ​អាជីវកម្ម​ឬ​រកស៊ី​ទេ សូម​កុំ​តាំង​ខ្លួន​ឯង​ថា​ជា​អ្នក​ខ្លាំង​អី​ គឺ​ត្រូវ​រៀន​វិនិយោគ​សិន​មុន​ពេល​ដែល​យើង​ចង់​ចេញ​ទៅ​រកស៊ី» ទាំង​នេះ​ជា​ការ​លើក​ឡើង​របស់​លោក​ សោម សម្បត្តិ អគ្គនាយក​ក្រុមហ៊ុន​ថ្នាំ​ពណ៌​ជាតិ​ (CAM-PAINT)។

លោក​អគ្គនាយក​ សោម សម្បត្តិ លើក​ឡើង​ថា នៅ​ពេល​ដែល​យើង​មាន​លុយ​តិចតួច​យើង​ត្រូវ​ស្វែង​រក​មើល​អ្នក​ដែល​ពូកែ​រកស៊ី ហើយ​ត្រូវ​យក​លុយ​របស់​យើង​ទៅ​ចូល​រួម​វិនិយោគ​ជា​មួយ​គេ​សិន​ ធ្វើ​បែប​នេះ​គឺ​ដើម្បី​ឲ្យ​យើង​អាច​រៀន​សូត្រ​ និង​លួច​មើល​ពី​របៀប​រកស៊ី​របស់​គេ​ថា​តើ​គេ​រកស៊ី​យ៉ាង​មិច​។ មិន​ត្រូវ​ធ្វើ​ខ្លួន​ជា​ខ្លាំង​ ជា​អ្នក​ពូកែ​ហើយ​ចេញ​មក​ភ្លាម​រកស៊ី​តែ​ម្ដង ទាំង​ដែល​ខ្លួន​នៅ​មិន​ទាន់​មាន​បទពិសោធន៍​តិច​តួច ឬ​មិន​ទាន់​មាន​នោះ​ទេ។

លោក​សម្បត្តិ​ថា «បន្តក់​(វិនិយោគ)​តិចៗ​ជា​មួយ​គេ​ទៅ​ ជូន​កាល​យើង​មិន​បាច់​ទៅ​រកស៊ី​ផង ព្រោះ​បើ​យើង​បន្តក់​(វិនិយោគ)​ត្រូវ​តែ​២ ទៅ​៣​កន្លែង​ ការ​ពិត​ទៅ​យើង​បាន​ចូល​ខ្លួន​ជា​ម្ចាស់​ហ៊ុន​នោះ​ យើង​ក្លាយ​ទៅ​ជា​ការ​រកស៊ី​បាត់​ទៅ​ហើយ» លោក​បន្ត​ដោយ​ការ​និយាយ​ជា​ការ​លេង​សើច​ផង​ថា «អ្នក​ខ្លះ​ចង់​ក្លាយ​ជា​អ្នក​រកស៊ី តែ​ពេល​ខ្លះ​ចង់​ខ្លាំង​ពេក​រក​មិន​ទាំង​គ្រប់​នឹង​ស៊ី​ទៀត​»។

លោក​បន្ត​លើក​ឡើង​ថា «ចំណេញ​តិចៗ​ វា​ប្រសើរ​ជាង​ម្ដង​ខាត​ម្ដង​ចំណេញ ដូច្នេះ​ទើប​បាន​ជា​ខ្ញុំ​ថា​ឲ្យ​រៀន​បន្តក់​តិចៗ​ជា​មួយ​គេ​សិន​ទៅ ព្រោះ​ថា​ខ្ញុំ​នេះ​គឺ​ជា​ជើង​មួយ​ដែល​ចូល​ចិត្ត​ហក់លោត​ ហើយ​បើ​និយាយ​ពី​រឿង​ខាត​វិញ​ក៏​មិន​តិច​ដែរ ប៉ុន្តែ​ដោយ​សារ​តែ​ពូកែ​គំនិត​ទើប​មាន​ពេល​ខ្លះ​ក៏​អាច​ហក់​ត្រូវ​បាន​ខ្លះ»៕

ដោយ៖ ជួប ស្រីរ័ត្ន

X
5s