អ្នកជំនាញបង្ហើបគន្លឹះ ៣យ៉ាងជួយអ្នករៀបចំលុយកាក់បានត្រឹមត្រូវក្នុងឆ្នាំ២០២០ខាងមុខ
នៅសល់តែប៉ុន្មានជា ៥ ខែទៀតប៉ុណ្ណោះ ឆ្នាំ ២០២០ នឹងចូលមកដល់ហើយ។ តើអ្នកមានបានត្រួតពិនិត្យមើលឡើងវិញពីគម្រោងហិរញ្ញវត្ថុដែលអ្នកគិតថា ចង់សម្រេចឲ្យបាននៅក្នុងឆ្នាំ ២០១៩ នេះហើយឬនៅ? ប្រសិនបើអ្នករកឃើញកំហុសឆ្គងនៅក្នុងចំណុចនេះ គន្លឹះខាងក្រោមចំនួន ៣ នេះ អាចជួយអ្នកបាន ដើម្បីធានាថា ឆ្នាំ ២០២០ ខាងមុខ អ្នកនឹងមិនមានការថ្លោះធ្លោយម្តងទៀតឡើយ។
១.ត្រួតពិនិត្យហិរញ្ញវត្ថុរបស់អ្នកឡើងវិញ
ជំហានដ៏ល្អបំផុតដំបូងគេដែលអ្នកត្រូវអនុវត្ត គឺត្រួតពិនិត្យឡើងវិញនូវរបាយការណ៍ ឬស្ថានភាពហិរញ្ញវត្ថុរបស់អ្នកនៅក្នុងឆ្នាំនេះថា តើអ្នកបានកែលំអវាឲ្យកាន់តែប្រសើរដល់កម្រិតណាហើយ? ខាងក្រោមនេះ ជាសំនួរដែលអ្នកអាចចោទសួរខ្លួនឯងដើម្បីតាមលទ្ធផលហិរញ្ញវត្ថុរបស់អ្នក៖
-តើអ្នកកំពុងបោះជំហានត្រឹមត្រូវឆ្ពោះទៅកាន់គោលដៅហិរញ្ញវត្ថុនៅបំណាច់ឆ្នាំ ២០២០ ខាងមុខដែរឬទេ?
-តើនៅចុងឆ្នាំនេះ លទ្ធផលហិរញ្ញវត្ថុរបស់អ្នកនឹងទៅជាយ៉ាងណា? អ្នកពេញចិត្តលទ្ធផលនោះអត់?
-តើមានកត្តាសំខាន់ៗអ្វីខ្លះដែលធ្វើឲ្យប្រាក់ចំណូល ការចំណាយ ការវិនិយោគ បំណុល ឬការសន្សំរបស់អ្នកមានការផ្លាស់ប្ដូរនៅក្នុងឆ្នាំនេះ?
-តើផ្នែកណាខ្លះដែលត្រូវការយកចិត្តទុកដាក់ និងកែលំអឲ្យកាន់តែប្រសើរជាងមុន?
-តើអ្នកបានសន្សំប្រាក់ច្រើនកម្រិតណាសម្រាប់ពេលអនាគត?
២. រៀបចំគម្រោងហិរញ្ញវត្ថុឲ្យប្រសើរជាងមុន
អ្នកប្រហែលជាមានកំហុសឆ្គងលើគម្រោងហិរញ្ញវត្ថុរបស់អ្នក ដូចជា វាមិនអាចសម្រេចបានតាមការគ្រោងទុក ចាយលើសចំណូល សន្សំតិចជាងចំនួនដែលចង់បាន ជំពាក់បំណុលបន្ថែម ឬ ដោះបំណុលមិនបានដូចការចង់បាន។ នេះជាពេលវេលាដ៏ចាំបាច់បំផុតដែលអ្នកត្រូវកែទម្រង់វាឡើងវិញ ដើម្បីបង្កើតទម្លាប់ត្រឹមត្រូវមួយលើការគ្រប់គ្រងការចំណាយ និងការសន្សំឲ្យមានប្រសិទ្ធភាព។
ការកែកុនវាត្រូវផ្តើមធ្វើតាមរយៈការរាយបញ្ជីឈ្មោះចំណាយផ្សេងៗ ហើយត្រូវកំណត់ចំនួនចំណាយនោះឲ្យបានជាក់លាក់បំផុតដូចជា ប្រាក់ណាសម្រាប់បង់ថ្លៃរំលោះផ្ទះ បំណុល សម្រាប់សន្សំ សម្រាប់គ្រាអាសន្ន វិនិយោគ អប់រំ ឬកម្សាន្តជាដើម។ អ្នកមិនត្រូវវាយតម្លៃ ឬស្មានៗយកទេពីព្រោះភាពច្បាស់លាស់លើរឿងនេះ អាចធ្វើឲ្យអ្នករកឃើញពីគន្លឹះដើម្បីធ្វើឲ្យស្ថានភាពហិរញ្ញវត្ថុរបស់អ្នកមានការវិវត្តទៅមុខកាន់តែប្រសើរ។
តាមពិតទៅ ការចំណាយថេរ (Fixed Expenses ឧ.ថ្លៃផ្ទះ បំណុល បង់រំលោះ) ប្រចាំខែ មិនលំបាកសម្រាប់អ្នកទេ ព្រោះអ្នកបានដឹងពីខ្ទង់ចំណាយរួចទៅហើយ។ ដោយឡែកអ្វីដែលអ្នកត្រូវប្រុងប្រយ័ត្នគឺចំណាយអថេរ (Variable Expenses ឧ.ថ្លៃអាហារ ទិញសម្លៀកបំពាក់ ទិញរបស់របរផ្សេងៗ កម្មវិធីកម្សាន្ត ) ដែលអាចឡើងចុះមិនដូចគ្នាទៅតាមខែនីមួយៗ។
៣. ចាប់ផ្តើមអនុវត្តភ្លាមពីថ្ងៃនេះតទៅ
កុំរង់ចាំរហូតដល់ថ្លៃទី ១ ខែមករា ឆ្នាំ ២០២០ ចូលមកដល់។ អ្នកត្រូវរុះរើចោលទម្លាប់មិនល្អក្នុងរឿងហិរញ្ញវត្ថុរបស់អ្នកពីថ្ងៃនេះតទៅ។ សូមចាំថា សកម្មភាពមិនល្អបន្តិចបន្តួចរបស់អ្នកពីថ្ងៃទៅមួយថ្ងៃនេះហើយដែលធ្វើឲ្យហិរញ្ញវត្ថុរបស់អ្នកមានបញ្ហា ហើយការចាប់ផ្តើមបង្កើតទម្លាប់ល្អៗរាល់ថ្ងៃក៏ជួយឲ្យអ្នកសម្រេចបានគោលដៅហិរញ្ញវត្ថុផងដែរ។ កុំអស់សង្ឃឹម ពីព្រោះថា ការចាប់ផ្តើមរឿងដ៏ត្រឹមត្រូវដើម្បីស្រោចស្រង់ភាពដុនដាបហិរញ្ញវត្ថុរបស់អ្នក វាមិនយឺតពេលទេ៕
ប្រភព៖ CNBC
