ល្អដែរទេ បើសិនជាអ្នកចង់បង្កើតជំនួញជាមួយគូស្នេហ៍របស់អ្នក?
ល្អដែរទេ បើសិនជាអ្នកចង់បង្កើតជំនួញជាមួយគូស្នេហ៍របស់អ្នក? គូស្វាមីភរិយាដ៏មានឥទ្ធិពលនៅលើពិភពលោកគឺលោក Bill Gates និងលោកស្រី Melinda ដែល អ្នកទាំងពីរបានជួបគ្នានៅឯក្រុមហ៊ុន Microsoft ក្នុងឆ្នាំ ១៩៨៩ គឺជាភស្តុតាងមួយស្រាប់សម្រាប់អ្នក។ អស់រយៈពេល ១៩ ឆ្នាំហើយដែលប្តីប្រពន្ធមួយគូនេះបានដឹកនាំការងាររួមគ្នាមួយក្នុងកិច្ចការសប្បុរសធម៌ដែលមានទឹកប្រាក់រាប់ពាន់លានដុល្លារតាមរយៈមូលនិធិរបស់អ្នកទាំងពីរ Bill & Melinda Gates ។
ជាការពិតណាស់ ការធ្វើជំនួញជាមួយដៃគូសំខាន់របស់អ្នក អាចផ្តល់នូវជម្រើសការងារល្អៗជាច្រើន។ យោងតាមការសិក្សាមួយពីវិទ្យាស្ថានសេដ្ឋកិច្ចការងាររបស់អាល្លឺម៉ង់បានបង្ហាញថា គូស្វាមីភរិយាជាច្រើនដែលបានចាប់ដៃគ្នាបង្កើតក្រុមហ៊ុន គឺដោយសារតែគូស្នេហ៍ទាំងនោះចង់ដោះស្រាយបញ្ហារាំងស្ទះការងារ និងចង់បើកឱកាសឲ្យមានទំហំហិរញ្ញវត្ថុកាន់តែធំជាងមុនជាពិសេសសម្រាប់ស្ត្រីតែម្តង។
យ៉ាងណាក៏ដោយ ដំណើរជំហានរកស៊ីជាមួយគ្នានេះ វាមិនងាយស្រួលដូចអ្វីដែលអ្នកគិតឡើយ។ ហេតុដូច្នេះហើយ ទើបអ្នកត្រូវស្វែងយល់ពីគន្លឹះមួយចំនួនខាងក្រោមដែលអ្នកត្រូវដឹង និងអនុវត្តឲ្យបាននៅពេលដែលអ្នកសម្រេចចិត្តថា ចាប់ដៃគ្នារកស៊ីហើយនោះ។
១.ញែកឲ្យដាច់រវាងការងារ និងកិច្ចការផ្ទះ
ជំហានដំបូងគេបំផុត សំខាន់ណាស់ ហើយអ្នកត្រូវកំណត់ព្រំដែនការងាររបស់អ្នក និងកិច្ចការផ្ទះមិនឲ្យជាប់ពាក់ព័ន្ធគ្នា ជាដាច់ខាត។ ការងារមុខជំនួញ គឺទាមទារឲ្យអ្នកចំណាយពេលលើវាច្រើនសឹងតែ ២៤ ម៉ោងក្នុងមួយសប្តាហ៍ជាមួយគូស្នេហ៍របស់អ្នក។ ប៉ុន្តែនៅក្នុងការទំនាក់ទំនងគូស្នេហ៍ អ្នកក៏ត្រូវបង្កើតភាពផ្អែមល្ហែមរបស់អ្នកទាំងពីរដែរ។ ហេតុដូច្នេះហើយ អ្នកត្រូវបែងចែកពេលវេលាសម្រាប់ការងាររបស់អ្នក ហើយពេលដែលបំពេញការងាររបស់អ្នករួច អ្នកក៏ត្រូវមានពេលមួយចំនួនទៀតដើម្បីយកចិត្តទុកដាក់មើលថែរក្សាគ្នាទៅវិញទៅមកផងដែរ។
២.ខិតខំប្រឹងប្រែងរួមគ្នា
គ្មានមុខជំនួញណាមួយដែលជោគជ័យដោយងាយៗទេ។ បើមិនមានឧបសគ្គនេះ ឧបសគ្គមួយទៀតនឹងចូលមកដល់ គ្រាន់តែយូរនិងឆាប់តែប៉ុណ្ណោះ។ អ្នកអាចប្រឈមនឹងស្ថានការណ៍ថ្មីៗ ដែលពេលខ្លះធ្វើឲ្យអ្នកទាំងពីរអស់សង្ឃឹម និងតានតឹងខ្លាំង។ យ៉ាងណាមិញ អ្នកទាំងពីរត្រូវតែយកឈ្នះលើបញ្ហាទាំងនោះដោយត្រូវប្រឹងប្រែងចាប់ដៃគ្នាបន្តដំណើរទៅមុខជាមួយនឹងយុទ្ធសាស្ត្រ ភាពច្នៃប្រឌិត និងមធ្យោបាយផ្សេងៗដែលធ្វើឲ្យអ្នកទាំងពីរអាចសម្រេចបានភាពជោគជ័យរួមគ្នា។
៣.គោរព និងផ្តល់តម្លៃដល់ភាពជោគជ័យដាច់ដោយឡែករបស់អ្នកទាំងពីរ
នៅពេលអ្នកសង្កេតមើលពីដំណាក់កាលមួយទៅដំណាក់កាលមួយ វាអាចនឹងធ្វើឲ្យសមិទ្ធផលដាច់ដោយឡែកមួយរបស់អ្នកទាំងពីរបាត់បង់យ៉ាងងាយស្រួលនៅពេលចាប់ដៃរកស៊ីជាមួយគ្នា។ ដូច្នេះហើយ វា ជារឿងសំខាន់ ណាស់ដែលអ្នកទាំងពីរត្រូវគោរព អបអរ និងឲ្យតម្លៃដល់ភាពជោគជ័យរៀងៗខ្លួនណាមួយរបស់អ្នកទាំងពីរ។ ពេលខ្លះអ្នកយល់ថា ភាពជោគជ័យណាមួយជារបស់អ្នក ហើយពេលខ្លះទៀតជារបស់ដៃគូរបស់អ្នក។ អ្នកទាំងពីរក៏ត្រូវការពេលសម្រាប់ភាពជាឯកជនរៀងៗខ្លួន។ អ្នកត្រូវផ្តល់តម្លៃ និងគោរពដល់ភាពជោគជ័យជាឯកជនមួយនេះ ហើយត្រូវអបអរដល់ភាពជោគជ័យដៃគូរបស់អ្នក។
៤.យល់ស្របទៅនឹងចំណុចខុសប្លែកពីគ្នា
បើទោះបីជាអ្នករកស៊ីជាមួយគូស្នេហ៍របស់អ្នកឬអត់ អ្នកទាំងពីរគួរអភិវឌ្ឍគោលការណ៍មួយក្នុងការបង្ការកុំឲ្យមានជម្លោះកើតមានឡើង។ នៅក្នុងទំនាក់ទំនងរបស់អ្នកមិនថា ក្នុងការងារ ឬជីវិតគូស្នេហ៍ បញ្ហាខ្វែងគំនិតគ្នា ភាពរកាំរកូស ការអាក់អន់ចិត្ត ជាដើមនឹងកើតមានឡើងទន្ទឹមនឹងគ្នានេះ។ បញ្ហាទាំងនេះ បើកើតមានឡើងច្រើនពេក វានឹងប៉ះពាល់ដល់ផលិតភាពក្នុងមុខជំនួញរបស់អ្នកទាំងពីរ។ វាជារឿងល្អដែលអ្នកត្រូវបង្ការជាមុន និងបើកចិត្តឲ្យទូលាយទទួលយកភាពខុសគ្នាប្លែកគ្នានេះ។ សូមចាំថា នៅពេលមានជម្លោះកើតមានឡើង ការពិភាក្សាគ្នា គឺជាជំហានដំបូងល្អជាងគេបំផុត។
៥.ផ្តល់ទំនុកចិត្តគ្នាទៅវិញទៅមក
មិនខុសអ្វីពីការរកស៊ីជាមួយអ្នកដទៃដែរ ការចាប់ដៃរកស៊ីជាមួយគូស្នេហ៍របស់អ្នកមិនមែនត្រឹមតែធ្វើជាគូស្នេហ៍ល្អូកល្អើននឹងគ្នាទេ។ អ្នកទាំងពីរត្រូវធ្វើជាដៃគូជំនួញដ៏ស្មោះត្រង់បំផុត ផ្តល់ទំនុកចិត្ត និងភាពជឿជាក់ឲ្យគ្នាទៅវិញទៅមក។ អ្នកមិនត្រូវធ្វើឲ្យភាគីណាម្នាក់មានអារម្មណ៍ថា ការខិតខំប្រឹងប្រែង ការលះបង់ និងភាពស្មោះត្រង់របស់ខ្លួនត្រូវបានបំផ្លាញឡើយ។ អ្នកត្រូវតែធ្វើឲ្យមានតុល្យភាពក្នុងរឿងនេះ។
៦.ផ្តល់ពេលវេលាសម្រាប់ភាគីម្នាក់ៗឲ្យធ្វើកិច្ចការផ្សេងរៀងៗខ្លួន
តាមពិតទៅអ្នកដឹងហើយថា ការចំណាយពេលនៅជាមួយគ្នា គឺជារឿងចំាំបាច់បំផុតមួយសម្រាប់ទំនាក់ទំនងគូស្នេហ៍ ហើយវាកាន់តែចាប់អារម្មណ៍ជាងនេះទៅទៀតនៅពេលអ្នកទាំងពីរចាប់ដៃបើកជំនួញរួមគ្នា។ ប៉ុន្តែនេះមិនមែនមានន័យថា គ្រប់ពេល ២៤ ក្នុងមួយសប្តាហ៍ ឬ ៣៦៥ ថ្ងៃក្នុងមួយឆ្នាំ អ្នកទាំងពីរត្រូវតែនៅជាមួយគ្នារហូតទេ។ អ្នកក៏ត្រូវការពេលឯកជន ហើយដៃគូរបស់អ្នកក៏ដូចគ្នា។ ពេលខ្លះអ្នកត្រូវធ្វើដំណើរឆ្ងាយពីគ្នា ដើម្បីការងារផ្សេងៗដែលទាំងអស់នេះ ជាគោលការណ៍ត្រូវមានសម្រាប់មនុស្សម្នាក់ៗ៕
ប្រភព៖ CNBC
