ធ្វើ​ដូចម្ដេច​ទើប​អាច​បង្កើន​ប្រសិទ្ធភាព​ក្រុម​ការងារ​? នាយិកា​ក្រុមហ៊ុន​រំដួល​ប្រាប់​វិធីសាស្ត្រ​



«នៅ​ពេល​ដែល​យើង​កំពុង​ដើរ​ទៅ​រក​ក្ដី​សុបិន វា​ពិត​ជា​រឿង​ចាំបាច់​ណាស់​ក្នុង​ការ​រក​វិធីសាស្ត្រ​ធ្វើ​ឲ្យ​អ្នក​ដទៃ​ជឿជាក់​លើ​ក្ដី​សុបិន​របស់​យើង​ជា​រួម​ ហើយ​ខ្ញុំ​តែង​តែ​និយាយ​ជា​មួយ​នឹង​ក្រុម​ការងារ​ថា បេសកកម្ម​ដ៏​ពិបាក​កំឡុង​ពេល​ចាប់ផ្ដើម​អាជីវកម្ម គឺ​ធ្វើ​ឲ្យ​មនុស្ស​ជា​ច្រើន​ជឿជាក់​​លើ​ក្ដី​សុបិន​មួយ​រួម​គ្នា» នេះ​ជា​ការ​លើក​ឡើង​របស់​អ្នកស្រី​ នុត រត្ថា នាយិកា​នៃ​ក្រុមហ៊ុន​ រៀបចំ​កម្មវិធី រំដួល (Romdoul)។

 

ការ​សហការ​គ្នា​ល្អ​រវាង​បុគ្គលិក ឬ​ក្រុម​ការងារ គឺ​ជា​កត្តា​ដ៏​សំខាន់​មួយ​ក្នុង​ការ​ជំរុញ​ឲ្យ​អាជីវកម្ម​ ឬ​ក្រុមហ៊ុន​ដើរ​ទៅ​មុខ​ដោយ​រលូន និង​ឆាប់​រីក​ចម្រើន។ ជា​មួយ​គ្នា​នេះ អ្នកស្រី នុត រត្ថា នាយិកា​វ័យ​ក្មេង បាន​ចែក​រំលែក​ថា ការ​បណ្ដុះ​នូវ​កម្លាំង​ចិត្ត​ និង​សាមគ្គីភាព​គឺ​ជា​ចំណុច​សំខាន់​ចម្បង​ដែល​រុញ​ច្រាន​​ឲ្យ​យើង​ឈាន​ទៅ​សម្រេច​ក្ដី​សុបិន។ ក្ដី​សុបិន​នឹង​អាច​ក្លាយ​ទៅ​ជា​ការ​ពិត​បាន​យ៉ាង​រហ័ស ដរាបណា​យើង​ស្វែង​រក​បាន​ក្រុម​ការងារ​ដែល​ត្រូវ ព្រម​ទាំង​អាច​ធ្វើ​ដំណើរ​ទៅ​មុខ​ជា​មួយ​គ្នា​បាន​ដោយ​ភាព​ជឿជាក់។ មាន​ក្រុមការងារ​ល្អ នឹង​ធ្វើ​ឲ្យ​យើង​អាច​ទៅ​មុខ​បាន​កាន់​តែ​ឆ្ងាយ។

 

នាយិកា​ឆ្នើម​រូប​នេះ​បន្ថែម​ថា ខណៈ​ពេល​ដែល​យើង​កំពុង​ត្រួស​ត្រាយ​ផ្លូវ​ទៅ​កាន់​ក្ដី​សុបិន ពិត​ប្រាកដ​ណាស់​ថា​យើង​នឹង​សាង​នូវ​កំហុស ហើយ​និង​ជួប​ឧបសគ្គ ដូច្នេះ​យើង​ត្រូវ​ធ្វើ​យ៉ាង​ណា​ពន្យល់​ណែនាំ​ លើក​ទឹក​ចិត្ត​បុគ្គលិក ឬ​ក្រុមការងារ ឲ្យ​កែប្រែ​កំហុស​ទៅ​ជា​មេរៀន ឧបសគ្គ​ទៅ​ជា​ឱកាស និង​រាល់​ការ​បដិសេធន៍​ទៅ​ជា​ការ​អត់ធ្មត់ និង​អភិវឌ្ឍន៍ ហើយ​ចាំបាច់​បំផុត​ត្រូវ​ព្យាយាម​រក​វិធីសាស្ត្រ​យ៉ាង​ណា​ធ្វើ​ឲ្យ​ពួក​គាត់​មាន​មហិច្ឆតា​ធំ និង​មានការ​ជឿជាក់​ក្នុង​ការ​បន្ត​ដំណើរ​ទៅ​កាន់​ក្ដី​សុបិន​មួយ​រួម​គ្នា។ 

ដូច្នេះ​ ជា​ម្ចាស់​ក្រុមហ៊ុន ម្ចាស់​អាជីវកម្ម ឬ​ជា​អ្នក​ដឹកនាំ​ក្នុង​កម្រិត​ណា​មួយ យើង​ចាំបាច់​ត្រូវ​ចំណាយ​ពេល​​ក្នុង​ការ​ស្វែងយល់​ពី​ក្រុម​ការងារ​របស់​ខ្លួន​ឲ្យ​បាន​ច្បាស់។ ត្រូវ​ចេះ​ផ្ដល់​កម្លាំង​ចិត្ត ផ្ដល់​ក្ដី​សង្ឃឹម និង​នៅ​ជា​មួយ​គាត់ ដើម្បី​ឲ្យ​គាត់​ជឿ​ថា​រាល់​ការ​ចូលរួម និង​ការ​ខិតខំ​ប្រឹងប្រែង​របស់​គាត់​ប្រាកដ​ជា​អាច​ធ្វើ​ឲ្យ​ពួក​យើង​សម្រេច​បាន​ជោគជ័យ​រួម​គ្នា៕

ដោយ៖ ជួប ស្រីរ័ត្ន

X
5s