ពេលចង់ផ្ញើសារក្នុងទំនាក់ទំនងការងារប្រយ័ត្នបង្កើតកំហុស៧នេះ វាអាចធ្វើឲ្យប៉ះពាល់ក្រេឌីតរបស់អ្នក
នៅក្នុងទំនាក់ទំនងការងារប្រចាំថ្ងៃ អ្នកប្រហែលជាផ្ដោតលើគុណភាពការងារជាសំខាន់ជាងអ្វីៗផ្សេងទៀត។ ក៏ប៉ុន្តែពេលខ្លះអ្នកប្រហែលជាមើលរំលងចំណុចខ្វះខាតមួយចំនួនដែលអាចប៉ះពាល់ដល់អាជីពការងារ ឬក្រេឌីតរបស់អ្នកនៅកន្លែងការងារ។ តើនោះជាអ្វី? នោះគឺរបៀបផ្ញើសារនេះឯង។ ភាពថ្លោះធ្លោយ ឬការមិនយកចិត្តទុកដាក់របស់អ្នកបង្ហាញថា អ្នកធ្វើការដោយគ្មានភាពហ្មត់ចត់ និងគ្មានវិជ្ជាជីវៈ។
ពិនិត្យមើលចំណុចទាំងអស់នេះឡើងវិញ តើអ្នកឧស្សាហ៍បង្កើតកំហុសទាំងនេះឬទេ?
១.ផ្ញើសារភ្លាមៗដោយមិនសុំការអនុញ្ញាតជាមុន
មុនផ្ញើសារទៅនរណាម្នាក់ដូចជាក្រុមការងារជាដើម អ្នកគួរស្នើសុំពួកគេជាមុនថា តើអ្នកអាចផ្ញើសារទាក់ទងពួកគេតាមរបៀបណា? ផ្ញើសារតាមលេខទូរស័ព្ទ ឬតាមប្រព័ន្ធទំនាក់ទំនងសង្គមដូចជា Telegram ឬ Facebook? តើពួកគេអាចអនុញ្ញាតឲ្យអ្នកអាចខលតាមលេខទូរស័ព្ទបានទេក្នុងករណីអ្នកចង់ណាត់ជួបពិភាក្សាការងារ? ការសាកសួរនេះគឺដើម្បីបង្ហាញថា អ្នកបានផ្តល់តម្លៃ និងបង្ហាញការគោរពអនុញ្ញាតជាមុនដល់ក្រុមការងាររបស់អ្នក។
២. រំពឹងថា ទទួលបានសារឆ្លើយតបភ្លាមៗ
សូមកុំរំពឹងថា អ្នកដែលអ្នកបានផ្ញើសារទៅសុទ្ធតែអាចឆ្លើយតបសាររបស់អ្នកបានភ្លាមៗគ្រប់ពេលនោះ។ ក្រុមការងាររបស់អ្នកមានរបៀបទំនាក់ទំនងខុសៗគ្នា ដូច្នេះបើអ្នកចង់បានការឆ្លើយតបឆាប់រហ័ស គួរខលហៅពួកគេ ឬក៏ផ្ញើតាមអ៊ីមែលដោយដាក់ថា ជាការបន្ទាន់ (Urgent)។ ប៉ុន្តែបើអ្នកយល់ថា ការងារអ្នកទាំងពីរ ឬក្រុមការងារផ្សេងទៀតនឹងត្រូវរងប៉ះពាល់ដោយសារតែការមិនទទួលបានឆ្លើយសារតបភ្លាមៗ អ្នកគួរពិភាក្សាបញ្ហានេះដោយបើកចំហ ហើយរកមធ្យោបាយទំនាក់ទំនងដែលមានប្រសិទ្ធភាពជាងនេះ។
៣.ប្រើសញ្ញា Emoji ច្រើនពេក
ដោយសារតែសញ្ញា Emoji ពេញនិយមសម្រាប់លេងនៅក្នុងបណ្ដាញសង្គមដូចជា Facebook ការប្រើប្រាស់សញ្ញាទាំងនេះជ្រុលពេកជាមួយក្រុមការងាររបស់អ្នកជាពិសេសជាមួយអ្នកដែលមិនសូវជិតស្និទ្ធនឹងអ្នក អាចប៉ះពាល់ដល់វិជ្ជាជីវៈរបស់អ្នក។ មធ្យោបាយល្អ គឺកាត់បន្ថយវាឲ្យមកត្រឹមចំនួនមួយតិចតួចបំផុត។
៤.កំហុសក្នុងការប្រើវេយ្យាករណ៍ច្រើន និងបញ្ហាអក្ខរាវិរុទ្ធ
ដោយសារតែសារទំនាក់ទំនងក្នុងការងារត្រូវទាមទារឲ្យមានវិជ្ជាជីវៈបន្តិច ការមិនយកចិត្តទុកដាក់ ឬ ថ្លោះធ្លោយក្នុងការប្រើប្រាស់វេយ្យាករណ៍ និងអក្ខរាវិរុទ្ធលើសំណេររបស់អ្នកបានឆ្លុះបញ្ចាំងថា អ្នកជាមនុស្សមិនល្អិតល្អន់គ្មានភាពហ្មត់ចត់សរសេរឲ្យរួចតែពីដៃ។ ដូច្នេះមុនសម្រេចចិត្តផ្ញើសាររបស់អ្នក សូមត្រួតពិនិត្យយ៉ាងហោចណាស់ឲ្យបាន ២ដងឡើងទៅដែរ ដើម្បីជៀសវាងកំហុសទាំងនោះដែលវាអាចប៉ះពាល់ដល់ក្រេឌីតរបស់អ្នក។
៥.ផ្ញើសារមិនមើលពេលវេលា
ដោយសារតែការសន្ទនាតាមប្រអប់សារ (Messenger)ជារឿយៗត្រូវបានគេមើលឃើញថាមានភាពលឿនរហ័ស និងស្និទ្ធស្នាលជាងតាមរយៈអ៊ីមែល ការព្យាយាមផ្ញើសារក្នុងម៉ោងធ្វើការធម្មតាចន្លោះពី ៨ ព្រឹកដល់ម៉ោង ៧ យប់គឺជារឿងល្អ។ ក៏ប៉ុន្តែប្រសិនបើអ្នកផ្ញើសារនៅមុន ឬក្រោយពេលម៉ោងធ្វើការ អ្នកត្រូវប្រាប់មូលហេតុអ្នកដែលទទួលសាររបស់អ្នកថា ហេតុអ្វីអ្នកត្រូវការផ្ញើសារនៅក្រៅម៉ោងការងារ? បើមិនដូច្នេះទេ សាររបស់អ្នកបញ្ជាក់ថា គឺជាការរំខាន និងមិនចេះបែងចែកពេលវេលា។
៦.ផ្ញើសារម្តងៗវែងអន្លាយ
ផ្ញើសាររបៀបណាទើបល្អ? សម្រាប់ការងារ ការផ្ញើសារខ្លីៗ ឬសង្ខេបគឺជារឿងល្អបំផុត។ បើអ្នកមានពាក្យពេចន៍ចង់លើកមកសរសេរច្រើនឃ្លាឡើងទៅ ការផ្ញើសារតាមអ៊ីមែលគឺជាជម្រើសល្អជាង។ អ្នកគួរដឹងថា គ្មាននរណាម្នាក់ចង់អានសារម្តងៗដែលវែងអន្លាយដូចរឿងនិទានទេ ហើយព្យាយាមបង្រួមអត្ថន័យឲ្យខ្លី និងងាយយល់។
៧.ផ្ញើព័ត៌មានរសើប
ដើម្បីឲ្យការផ្ញើសារមួយប្រកបដោយវិជ្ជាជីវៈ វាក៏ត្រូវការព្រំដែនរបស់វាដែរ ។ ជាលទ្ធផល ការបញ្ជូនសារ ឬព័ត៌មានរសើបពីអ្វីមួយ វាមិនមែនជារឿងចាំបាច់ទេ បើទោះបីជាសារនោះនិយាយពីព័ត៌មានសម្ងាត់ អាជីវកម្ម ឬព័ត៌មានរសើបអំពីខ្លួនអ្នកក៏ដោយ។
ព័ត៌មានដូចជាប្រាក់ខែរបស់និយោជិក តម្លៃកិច្ចសន្យារបស់អតិថិជន ឬព័ត៌មានសម្ងាត់ដែលមានសក្ដានុពលផ្សេងទៀត វាមិនគួរត្រូវបានផ្ញើតាមរយៈសាររបស់អ្នកនោះទេ។ ទន្ទឹមនឹងគ្នានេះព័ត៌មានផ្ទាល់ខ្លួនរបស់អ្នកក៏មិនគួរចែករំលែកនៅក្នុងសារសន្ទនារបស់អ្នកដូចគ្នា។ អ្នកនឹងមិនអាចដឹងថា មាននរណាខ្លះអាចអានសាររបស់អ្នក ឬនរណាម្នាក់អាចនឹងកំពុងតាមដានអ្នកនោះទេ៕
ប្រភព៖ Businessinsider
