តស៊ូព្យាយាមដើរតាមក្ដីស្រមៃ
យុវតីគំរូម្នាក់ក្លាយជាស្ថាបនិកហាងផ្កាល្បីឈ្មោះទាំងវ័យក្មេង
មានកំណើតក្នុងត្រកូលគ្រួសារកសិករដាំផ្កានាទឹកដីខេត្តកណ្ដាល យុវតីរូបស្រស់សម្បុរស្រអែម កញ្ញា ផល្លី ស្រីរ៉ុង ហាក់ជាប់ចិត្តនឹងមុខរបរដាំផ្ការបស់ឪពុកម្ដាយតាំងពីខ្លួននៅវ័យក្មេង ដោយក្ដីស្រលាញ់បូករួមជាមួយនឹងទេពកោសល្យផង យុវតីរូបនេះមានមហិច្ឆតាចង់ចាប់ផ្ដើមអាជីវកម្មហាងផ្កាទាំងដែលខ្លួនមានត្រឹមទុនគំនិតប៉ុណ្ណោះ ប៉ុន្តែក្ដីស្រមៃមួយនេះត្រូវបានក្រុមគ្រួសាររបស់នាងជំទាស់។
នៅក្នុងកិច្ចសម្ភាសន៍ជាមួយ Bizkhmer ស្រីរ៉ុង ប្រាប់ថា ដោយក្ដីស្រលាញ់ខ្លាំង ជាមួយនឹងជំនឿមុតមាំចំពោះការបង្កើតអាជីវកម្មហាងផ្កា នាងបានប្រឆាំងនិងការជំទាស់របស់គ្រួសារហើយនៅតែបន្តសន្សំចិត្តចង់ធ្វើឲ្យអាជីវកម្មមួយនេះដំណើរការ។ ដោយមានគំនិតអាជីវកម្មស្រាប់ នាងបានឈ្មុសឈ្មុលសិក្សានិងស្វែងរកបទពិសោធន៍ជាហូរហែ រហូតមានពេលមួយនាងបានស្គាល់និងចូលរួមកម្មវិធីរបស់ក្លាហាន៩ ជាពេលមួយដែលបានផ្ដល់ឲ្យនាងនូវទន់គំនិត និងជំនាញសម្រាប់អាជីវកម្ម ហើយបន្ថែមពីនោះនាងក៏បានទទួលការគាំទ្រផ្នែកដើមទុនពីម្ដាយមីងផងដែរ។
អាជីវកម្មបានចាប់ផ្ដើមលេចជារូបរាងឡើងនាដើមខែកុម្ភៈ ឆ្នាំ២០១៧ ក្រោមយីហោរ ភូមិផ្កា (Phum Pka) ប៉ុន្តែភាពជោគជ័យនៅមិនទាន់អាចហៅបាននោះទេសម្រាប់អាជីវកម្មក្មេងខ្ចីមួយនេះ។ ឆ្លើយតបដោយសម្ដីរួសរាយរាក់ទាក់ម្ចាស់ហាងវ័យក្មេងបង្ហើបថា នាងអាចធ្វើឲ្យអាជីវកម្មដែលមានត្រឹមគំនិតបានលេចជារូបរាងឡើង ក៏ព្រោះតែនាងមើលឃើញភាពលំបាករបស់ឪពុកម្ដាយ ហើយចង់ឲ្យពួកគាត់ឆាប់បានរស់នៅស្រណុកសុខស្រួល។ ប៉ុន្តែមហិច្ឆតាមួយនេះមិនបានបន្តផ្ដល់ភាពជោគជ័យឲ្យនាងរហូតនោះទេ ទីបំផុតបញ្ហាជាច្រើនបានកើតឡើងម្ដងទៀតចំពោះអាជីវកម្មនេះ។
សារជាថ្មីក្រុមគ្រួសាររបស់នាងបានជំទាស់ម្ដងទៀតនៅពេលអាជីវកម្មជួបបញ្ហា។ ស្រីរ៉ុងនិយាយថា «មកដល់ចំណុចនេះប្រសិនបើយើងមិនរួចរាល់សម្រាប់ខ្លួនឯងទេ នៅពេលដែលយើងដើរដល់ចំណុចគាំងមួយយើងនឹងបាត់បង់ខ្លួនឯងនៅចំណុចនោះ ខ្ញុំបានដាក់គោលដៅចំពោះខ្លួនឯងថា ខ្ញុំនឹងក្លាយទៅជាមនុស្សម្នាក់ដែលមានឥទ្ធិពលចំពោះនារីៗដទៃទៀត ក្នុងនាមនារីម្នាក់ដែលមកពីខេត្តនឹងមានគ្រួសារដែលមិនអាចផ្គត់ផ្គង់ឲ្យយើងបើកអាជីវកម្មបាន ដូច្នេះយើងត្រូវដកពិសោធន៍ខ្លួនឯង និងបន្តខិតខំព្យាយាមរហូតអាចត្បុលទៅដល់គោលដៅមួយដែលយើងចង់ទៅដល់»។
អាជីវកម្មបានចាប់ផ្ដើមដំណើរការរលូនឡើងវិញ ដោយយុវតីឆ្នើមរូបនេះប្រើរយៈពេលត្រឹម២ខែប៉ុណ្ណោះ ក៏ចាប់ផ្ដើមមានការគាំទ្រពីអតិថិជនជាហូរហែ។ នាងប្រាប់ថា ទំនាក់ទំនងក្នុងសង្គមស្គាល់គេស្គាល់ឯងជាផ្នែកមួយដែលធ្វើឲ្យអាជីវកម្មរបស់នាងដំណើរការរលូន។
បច្ចុប្បន្នហាងផ្ការបស់នាងមានលក់ផ្កា ទាំងក្នុងស្រុកនិងនាំមកពីក្រៅប្រទេស ប៉ុន្តែភាគច្រើននាងសង្កេតឃើញថាប្រជាជនខ្មែរហាក់គាំទ្រតែផ្កាដែលនាំចូលពីប្រទេសជិតខាងជាង ជាហេតុនាំឲ្យបាត់បង់ទីផ្សារខ្លះចំពោះប្រជាកសិករក្នុងស្រុក។ នាថ្ងៃអនាគតស្រីរ៉ុងប្រាប់ថា នាងនឹងព្យាយាមសិក្សាពីប្រភេទផ្កានានា ហើយនឹងនាំយកពូជផ្កាទាំងនោះមកដាំនៅកម្ពុជា ដើម្បីចូលរួមបង្កើតឱកាសការងារបន្ថែមទៀតសម្រាប់ប្រជាកសិករខ្មែរយើង៕
ដោយ៖ ជួប ស្រីរ័ត្ន
