គួរឲ្យបារម្ភ! សំណល់ប្លាស្ទិកនឹងកើនដល់៣៤ប៊ីលានតោននៅឆ្នាំ២០៥០
កំណើនប្រជាជន តម្រូវការ រួមផ្សំនឹងការរីកចម្រើនរបស់សង្គម បានបង្កផលប៉ះពាល់មិនតិចនោះឡើយដល់បរិស្ថាន ពិសេសបើនិយាយដល់កាកសំណល់ប្លាស្ទិកដែលកំពុងកើនឡើងឥតឈប់ឈរពីមួយថ្ងៃទៅមួយថ្ងៃវិញ បច្ចុប្បន្នវាបានក្លាយជាក្ដីកង្វល់ដ៏ធំរបស់ពិភពលោក រហូតជំរុញឲ្យមានវិធានការទប់ស្កាត់ជាហូរហែដែលយើងតែងឃើញផ្សាយតាមរយៈបណ្ដាញសង្គម។ ជាមួយគ្នានេះ យោងតាមក្រសួងបរិស្ថានបានឲ្យដឹងថា សំណល់ប្លាស្ទិកនឹងកើនរហូតដល់៣៤ប៊ីលានតោនឯណោះនៅក្នុងឆ្នាំ២០៥០ ដែលចំនួននេះវាអាចនឹងច្រើនជាងត្រីនៅក្នុងសមុទ្រទៅទៀតប្រសិនបើគ្មានវិធានការទប់ស្កាត់ដ៏មានប្រសិទ្ធភាពទេនោះ។
បច្ចុប្បន្នការបំពុលដោយកាកសំណល់ប្លាស្ទិកកំពុងក្លាយទៅជាមហន្តរាយយ៉ាងធ្ងន់ធ្ងរដល់បរិស្ថាន ក្នុងនោះគេបានប៉ាន់ប្រមាណថា សំណល់ប្លាស្ទិកប្រមាណជា ១០០លានតោនឯណោះត្រូវបានគេប្រមូលយកចេញពីមហាសមុទ្រ។ នេះបើយោងតាមគេហទំព័ររបស់ Basel Convention (សន្ធិសញ្ញាអន្តរជាតិមួយដែលធ្វើការគ្រប់គ្រងលើកាកសំណល់រឹងប្លាស្ទិក មានទីតាំងនៅទីក្រុង Basel Switzerland)។
ក្នុងវេទិកាស្ដីអំពី «សកម្មភាពទប់ស្កាត់សំណល់ប្លាស្ទិកនៅកម្ពុជា» កាលពីពេលថ្មីៗកន្លងទៅ ឯកឧត្ដម នេត្រ ភក្ត្រា រដ្ឋលេខាធិការក្រសួងបរិស្ថានបានលើកឡើងថា សព្វថ្ងៃនេះ ការប្រយុទ្ធប្រឆាំងនឹងសំណល់រឹងសំរាម សំណល់ប្លាស្ទិកជាសកម្មភាពជាអាទិភាពបំផុតមួយរបស់រាជរដ្ឋាភិបាលកម្ពុជា។ រាជរដ្ឋាភិបាលកម្ពុជា មិនអនុញ្ញាតឱ្យមានជាដាច់ខាតចំពោះការនាំចូលនូវសំណល់ប្លាស្ទិកមកកែច្នៃនៅកម្ពុជាហើយកម្ពុជាតែងតែជំទាស់ជានិច្ចនឹងការនាំចូលសំណល់ប្លាស្ទិក និងប្រេងម៉ាស៊ីនមកកែច្នៃនៅកម្ពុជា។
គួរបញ្ជាក់ថា ចាប់តាំងពីការបង្កើតប្លាស្ទិកដំបូង រហូតដល់ឆ្នាំ ២០១៧ សំណល់ប្លាស្ទិកមានចំនួនប្រមាណជាជាង ៨.៣ ប៊ីលានតោន ហើយមានតែ ៩% តែប៉ុណ្ណោះនៃសំណល់ប្លាស្ទិកដែលត្រូវបានយកមកកែច្នៃដើម្បីប្រើប្រាស់ឡើងវិញ ក្នុងនោះថៃជាប្រទេសមួយដែលមានការប្រើប្រាស់ និងចោលសំណល់ជាថង់ប្លាស្ទិចច្រើនជាងគេលើពិភពលោកដែលបង្កឲ្យប៉ះពាល់ដល់ជីវិតសត្វសមុទ្រមិនតិចឡើយ៕
ដោយ៖ ជួប ស្រីរ័ត្ន
