ហេតុអ្វីវៀតណាមជាប្រទេសតែមួយគត់ក្នុងទ្វីបអាស៊ីដែលនាំចេញកាហ្វេធំជាងគេ?
វៀតណាមគឺជាប្រទេសនាំចេញកាហ្វេធំជាងគេលំដាប់ទី២ក្នុងពិភពលោកបន្ទាប់ពីប្រទេសប្រេស៊ីល ហើយក៏ជាប្រទេសដែលឈានមុខគេបំផុតនៅទូទាំងទ្វីបអាស៊ី លើការនាំចេញផលិតផលឧស្សាហកម្មកាហ្វេទៅកាន់ពិភពលោកផងដែរ។ បើនិយាយពីទីតាំងភូមិសាស្ត្ររបស់វៀតណាមវិញគឺមិនសូវជាខុសប្លែកពីបណ្ដាប្រទេសមួយចំនួនក្នុងតំបន់អាស៊ីអាគ្នេយ៍ប៉ុន្មាននោះទេទាំងអាកាសធាតុ និងសណ្ឋានដី ចុះហេតុអ្វីទើបបានជាមានតែប្រទេសវៀតណាមតែមួយគត់ដែលអាចក្លាយជាទីផ្សារផ្គត់ផ្គង់កាហ្វេដ៏ធំលំដាប់ពិភពលោក?
បច្ចុប្បន្នប្រទេសវៀតណាមមានផ្ទៃដីដាំកាហ្វេប្រហែល ៦៦៤,០០០ ហិកតា ដែលបានផ្ដល់ការងារដល់កសិករប្រមាណជាង ៥០ម៉ឺននាក់។ ដំណាំកាហ្វេត្រូវបានដាំដុះនៅជាច្រើនតំបន់ក្នុងប្រទេសវៀតណាម ដែលផ្ទៃដីដាំដុះធំជាងគេគឺនៅតំបន់ខ្ពង់រាបកណ្ដាល បន្ទាប់មកគឺតំបន់ភាគពាយព្យកណ្ដាល និងភាគអាគ្នេយ៍។ ក្នុងមួយឆ្នាំៗ ចំណូលពីការនាំចេញកាហ្វេបានកើនឡើងរហូតដល់៣ពាន់លានដុល្លារ ហើយកាលពីពេលថ្មីៗនេះវៀតណាមទើបតែបានបង្ហាញពីមហិកតាបង្កើនប្រាក់ចំណូលរហូតដល់ ៦ពាន់លានដុល្លារ ពីការនាំចេញកាហ្វេនៅឆ្នាំ២០៣០ខាងមុខ។
ផលិតកម្មកាហ្វេបានក្លាយជាប្រភពចំណូលដ៏សំខាន់សម្រាប់វៀតណាមតាំងពីដើមសតវត្សទី២០ ហើយបារាំង គឺជាប្រទេសដំបូងដែលនាំដំណាំកាហ្វេមកកាន់វៀតណាមនៅឆ្នាំ១៨៥៧ និងបានធ្វើឲ្យវិស័យនេះរីកចម្រើនបន្តិចម្ដងៗរហូតក្លាយជាអ្នកផលិតសំខាន់ជាងគេនៅអាស៊ី។ វៀតណាមមានភាពល្បីល្បាញលើកាហ្វេ Robusta ដែលមានប្រហែលជាង ៩០% នៃផលិតកម្មកាហ្វេសរុប ក្នុងនោះកាហ្វេប្រហែល ១០ភាគរយ ប៉ុណ្ណោះដែលគេប្រើប្រាស់នៅក្នុងស្រុក និងប្រមាណ ៩០ភាគរយ គឺជាគ្រាប់កាហ្វេឆៅដែលត្រូវបាននាំចេញទៅលក់នៅទីផ្សារបរទេស។
បើក្រឡេកមកមើលពីប្រវត្តិដំណាំកាហ្វេនៅកម្ពុជាវិញ ក៏ត្រូវបានបារាំងនាំមកក្នុងកំឡុងពេលដូចគ្នាទៅនឹងប្រទេសវៀតណាមនិងឡាវដែរ ប៉ុន្តែមកដល់ពេលនេះទីផ្សារកាហ្វេកម្ពុជាហាក់នៅមានទំហំតូចនៅឡើយ។ ក្នុងនោះយើងឃើញមានការដាំដុះដំណាំនេះភាគច្រើនគឺនៅតំបន់ភាគឦសានប្រទេសដែលរួមមានខេត្ត មណ្ឌលគិរី, រតនគិរី និងស្ទឹងត្រែងជាដើម។ លោក លូ ម៉េង នាយកប្រតិបត្តិសហព័ន្ធទេសចរណ៍កម្ពុជា ធ្លាប់បានលើកឡើងនៅក្នុងកម្មវិធី «ប្រកាសជាផ្លូវការនៃការប្រកួតប្រជែង ឆុងកាហ្វេថ្នាក់ជាតិ ប្រចាំប្រទេសកម្ពុជា» កាលពីពេលកន្លងទៅថា ស្ទើរតែ៨៥ទៅ៩០ភាគរយទៅហើយដែលកម្ពុជាបាននាំចូលកាហ្វេពីក្រៅប្រទេស គឺតែមិនមែនមានន័យថាក្រុមហ៊ុននិងអ្នកវិនិយោគទាំងនោះមិនចង់ទិញពីកម្ពុជានោះទេ ប៉ុន្តែមកពីយើងផលិតមិនទាន់គ្រប់គ្រាន់។
លោកសំណូមពរដល់អ្នកវិនិយោគ ក៏ដូចពលរដ្ឋម្ចាស់ចម្ការ ត្រូវវិនិយោគលើដំណាំកាហ្វេឲ្យបានច្រើន ព្រោះបច្ចុប្បន្នកាហ្វេនៅកម្ពុជាកំពុងមានភាពល្បីល្បាញ គឺកាហ្វេខេត្តមណ្ឌលគិរី រតនគិរី និងខេត្តមួយចំនួនទៀតដែលនៅក្បែរនោះ សុទ្ធតែជាដីល្អអាចវិនិយោគលើដំណាំនេះនិងទទួលបានផលល្អប្រសើរ។
គួរបញ្ជាក់ផងដែរថា កាលពីពេលកន្លងទៅមានក្រុមហ៊ុនកាហ្វេរបស់កម្ពុជាមួយឈ្មោះថា កាហ្វេ អិមខេ មណ្ឌលគិរី បានឈ្នះពានរង្វាន់ត្បូងពេជ្រ World Quality Commitment Diamond Category ឆ្នាំ២០១៩ នាទីក្រុងប៉ារីស ប្រទេសបារាំង ដែលនេះគឺជាមោទនភាពដ៏ធំមួយសម្រាប់ប្រជាជាតិកម្ពុជា៕
ប្រភព៖ Market Watch/Nhân Dân
ដោយ៖ ជួប ស្រីរ័ត្ន
