ឲ្យតែប្រកាន់ជំហរនេះ ទោះអាជីវកម្មស្រដៀងគ្នាក៏រីកចម្រើនឆាប់រហ័សដែរ
វាប្រហែលជាពិបាកបន្តិចហើយសម្រាប់អ្នកដែលចង់ចាប់ផ្ដើម ឬបង្កើតអាជីវកម្មមួយដែលថ្មីស្រឡាង ត្បិតនៅលើទីផ្សារកម្ពុជាបច្ចុប្បន្នមានអាជីវកម្មជាច្រើនប្រភេទកំពុងតែរីកដុះដាលដូចផ្សិតទៅហើយ ដូច្នេះប្រសិនបើធ្វើអាជីវកម្មមួយដែលស្រដៀងគ្នា តើល្អឬទេ? ហើយតើគួរធ្វើយ៉ាងដូចម្ដេចខ្លះដើម្បីធ្វើឲ្យអាជីវកម្ម អាចរីកចម្រើនបានឆាប់រហ័ស? ខាងក្រោមនេះ ជាការចែករំលែករបស់អ្នកស្រី តិច ស៊ីមហ៊ាង ប្រធានសមាគមស្ត្រីតម្បាញ និងអភិវឌ្ឍន៍សូត្រ និងជាស្ថាបនិកអាជីវកម្មកីមាស។
នៅក្នុងកម្មវិធី "The Executive Talks 2019” ក្រោមប្រធានបទ «ផលិតផលក្នុងស្រុក៖ កាលានុវត្តភាព ឧបសគ្គ និងកត្តាផ្សេងៗ» កាលពីពេលកន្លងទៅ ស្ថាបនិកកីមាស អ្នកស្រី តិច ស៊ីមហ៊ាង បានលើកឡើងថា «អ្នកដែលចង់បង្កើតអាជីវកម្មគឺទាមទារត្រូវតែមានភាពវិជ្ជមានខ្លាំងបំផុត សម្រាប់ខ្ញុំអាជីវកម្មកីមាសនៅពេលដែលចាប់ផ្ដើមដំបូងបានទាញភាពអវិជ្ជមានជាច្រើនមកលើខ្ញុំ គឺមិនចង់ឲ្យខ្ញុំបើក ព្រោះអាជីវកម្មនេះមានគេរកស៊ីរួចទៅហើយ ដូច្នេះគេជាដុំថ្មយើងជាពងមាន់បើជល់ទៅយើងចប់ហើយ ប៉ុន្តែដោយសារភាពជឿជាក់ និងក្ដីស្រលាញ់ទើបខ្ញុំគិតថាវាគឺជាឱកាស»។
អ្នកស្រីស្ថាបនិកបន្តថា នៅពេលដែលយើងស្រលាញ់អាជីវកម្មរបស់យើងពិតប្រាកដ នៅពេលដែលយើងជឿជាក់លើការធ្វើទីផ្សារ នោះវានឹងអូសទាញអតិថិជនឲ្យមកគាំទ្រផលិតផលយើងជាមិនខាន ប៉ុន្តែយើងក៏ត្រូវធ្វើយ៉ាងណាឲ្យផលិតផលរបស់យើងអាច កន្ត្រាក់ និងទាញបេះដូងរបស់អតិថិជនឲ្យជឿជាក់ផងដែរ។ ចំណុចសំខាន់គឺម្ចាស់អាជីវកម្មត្រូវចេះរកចំណុចដែលជាតម្រូវការរបស់អតិថិជន ហើយច្នៃឲ្យត្រូវនឹងបេះដូងរបស់ពួកគាត់ នោះប្រាកដណាស់អតិថិជននិងមកគាំទ្រ។
បន្ថែមពីនេះលោកស្រីបញ្ជាក់ថា ដើម្បីធ្វើទីផ្សារឲ្យកាន់តែមានប្រសិទ្ធភាព ម្ចាស់អាជីវកម្មត្រូវចេះមើលពីភាពខ្វះចន្លោះរបស់ដៃគូប្រកួតប្រជែង បើកាលណាសម្លឹងឃើញហើយគួរតែចាប់ផ្ដើមធ្វើភ្លាម។ បើកាលណាផលិតផលរបស់យើងត្រូវបានគូប្រកួតយើងចម្លងតាម នោះបានន័យថាអាជីវកម្មយើងឈ្នះគេហើយ ដូច្នេះត្រូវបន្តប្រឹងប្រែងពង្រីកបន្ថែមទៀត។
អ្នកស្រី តិច ស៊ីមហ៊ាង «បើគ្រាន់តែស្រលាញ់ តែមិនស្គាល់ច្បាស់ពីទីផ្សារនោះអាជីវកម្មមិនអាចនៅបានយូរនោះទេ»៕
ដោយ៖ ជួប ស្រីរ័ត្ន
