ដំណឹងដ៏ក្រៀមក្រំ ដែលអ្នកស្លាប់កើនដល់ ២៦ នាក់ ក្នុងករណីបាក់រលំអគារនៅខេត្តកែប
គិតមកត្រឹមម៉ោង ៩:៣០នាទីព្រឹក ថ្ងៃទី ០៥ ខែមករា ឆ្នាំ២០២០ ចំនួនមនុស្សដែលបាត់បង់ជីវិតកើនឡើងជាង ២៦ នាក់ហើយ បើតាមការរាយការណ៍ពីទូរទស្សន៍ជាតិកម្ពុជា ទ.ទ.ក។
ចំនួនអ្នកស្លាប់ និងអ្នករងរបួសដែលបានរកឃើញមកទល់ពេលនេះប្រមាណជាង ៥០ នាក់។
ចំនួនអ្នកស្លាប់ដែលបានរកឃើញពីសំណាក់ក្រុមប្រតិបត្តិការរុករកមានច្រើនជាងគេនៅជាន់ផ្ទាល់ដីកាលពីយប់ថ្ងៃទី ០៤ ខែមករា យប់មិញនេះ ហើយក្រុមអ្នករុករកនៅតែបន្តសកម្មភាពក្នុងការស្វែងរកជនរងគ្រោះបន្ថែមទៀត។
ជាមួយគ្នានេះដែរ សម្ដេចតេជោនាយករដ្ឋមន្ត្រីក៏នៅតែបន្តដឹកនាំការស្វែងរកជនរងគ្រោះនេះបន្ថែមទៀតដូចគ្នា។
គួរបញ្ជាក់ផងដែរថា ករណីបាក់រលំអគារកម្ពស់ ៧ ជាន់នៅខេត្តកែបបានកើតឡើងកាលពីល្ងាចថ្ងៃទី ០៣ ខែមករា ឆ្នាំ២០២០ វេលាប្រមាណជា ១៦:៣០ល្ងាច៕
ដោយ៖ យ៉ាយ៉ា
