ក្រសួងប្រាប់វិធានការបង្ការពីជំងឺឆ្លងថ្មី ខណៈឥលូវមានរហូតដល់៤៤០ករណី
ជំងឺរលាកសួតដែលបង្កឡើងដោយវីរុសកូរ៉ូណាប្រភេទថ្មី (nCoV2019) ដែលកំពុងរាតត្បាតខ្លាំងនៅក្នុងប្រទេសចិន ដោយគិតមកត្រឹមថ្ងៃទី២១ ខែមករានេះ បានកើតមានចំនួន៤៤០ករណីមកហើយ និងបានបង្កឲ្យមានអ្នកស្លាប់ចំនួន៩នាក់។
ដោយសារជំងឺចម្លែកនេះនៅតែបន្តរាតត្បាតខ្លាំងក្នុងប្រទេសចិន ព្រមទាំងអាចចម្លងពីមនុស្សទៅកាន់មនុស្សបានផង ដូច្នេះប្រសិនបើសង្ស័យថាមានជំងឺរលាកសួតថ្មី ដោយមានកម្ដៅចាប់ពី៣៨អង្សាសេ និងមានរោគសញ្ញាមួយយ៉ាងតិចក្នុងចំណោមរោគសញ្ញា ក្អក ហូរសំបោរ ឈឺបំពង់ក ដង្ហើមខ្លី ពិបាកដកដង្ហើម និងមានប្រវត្តិធ្លាប់មកពីប្រទេសចិនដោយធ្លាប់ប៉ះពាល់ជាមួយសត្វ និងអ្នកជំងឺដែលផ្ទុកជំងឺនេះ សូមប្រញាប់រាយការណ៍បន្ទាន់ទៅកាន់លេខទូរស័ព្ទ ១១៥។
ខាងក្រោមនេះគឺជាវិធីបង្ការការពារខ្លួនពីជំងឺឆ្លងនៃក្រសួងសុខាភិបាលកម្ពុជា៖
១) គួរជៀសវាងចូលទៅកាន់កន្លែងចិញ្ចឹមសត្វ (បើគ្មានភារកិច្ច) ឬប៉ះពាល់ផ្ទាល់ជាមួយសត្វនៅតាមការដ្ឋាន និងទីផ្សារបក្សីរស់ ឬចូលកន្លែងសត្តឃាត ឬប៉ះពាល់ផ្ទៃណាមួយដែលកខ្វក់ ឬប្រឡាក់ដោយលាមក សត្វបសុបក្សី ឬសត្វដទៃទៀត
២) ជៀសវាងប៉ះពាល់ជិតស្និត ឬចូលទៅកាន់កន្លែងលក់គ្រឿងសមុទ្រហួណាន និងទីផ្សារ ឬកសិដ្ឋានដែលមានសត្វរស់ ឬសត្វព្រៃ ឬកន្លែងដែលគេដឹងថាកំពុងមានវីរុសកំពុងចរាចរ
៣) ត្រូវលាងដៃឲ្យបានញឹកញាប់ជាមួយសាប៊ូ និងទឹកស្អាត បន្ទាប់ពីប៉ះពាល់សត្វ ឬប្រភពផ្សេងៗដែលជាប្រភពចម្លងរោគ ព្រមទាំងប្រកាន់ខ្ជាប់នូវការអនុវត្តអនាម័យ និងអាហារដែលមានសុវត្ថិភាពល្អ។ ត្រូវចាំថានឹងមិនអាចឆ្លងជំងឺផ្ដាសាយបក្សី ឬវិរុសរលាកសួតប្រភេទថ្មីនេះទេ ប្រសិនបើអ្នកបរិភោគ បសុបក្សី ឬស៊ុត ដែលចម្អិនបានឆ្អិនល្អ។
៤) ជៀសវាងប៉ះពាល់ជាមួយអ្នកជំងឺដែលមានផ្លូវដង្ហើមស្រួច
៥) អ្នកមានជំងឺផ្លូវដង្ហើមស្រួចត្រូវខ្ចប់មាត់ និងច្រមុះ ពេលក្អក ដោយប្រើកន្សែង ក្រមា ឬក្រដាស
៦) បុគ្គលិកសុខាភិបាលដែលផ្ដល់ការថែទាំដល់អ្នកជំងឺ ត្រូវប្រកាន់ខ្ជាប់វិធានការការពារការចម្លងរោគនៅក្នុងគ្រឹះស្ថានសុខាភិបាលឲ្យបានហ្មត់ចត់និងត្រឹមត្រូវ ដើម្បីជៀសវាងការឆ្លងជំងឺនេះមកកាន់បុគ្គលខ្លួនឯង៕
ដោយ៖ ជួប ស្រីរ័ត្ន
