អ្នកវិទ្យាសាស្ត្របាន យកសត្វស្វាដែលមានសុខភាពល្អ រឹងមាំចំនួនបួនក្បាលដើម្បីធ្វើការពិសោធន៍នៃវីរុសកូវីដ១៩ និងបានរកឃើញថាក្នុងខ្លួនសត្វស្វាមានប្រព័ន្ធភាពសុំាយ៉ាងមានប្រសិទ្ធភាពក្នុងការប្រយុទ្ធប្រឆាំងជាមួយនឹងកូវីដ១៩ និងបានស្រាវជ្រាវរកឃើញពីការឆ្លងវីរុសតាមរយៈភ្នែកបើទោះបីជា មានការការពារដោយពាក់ម៉ាសមុខក៏ដោយ។ នេះ​បើយោងតាមការចុះផ្សាយេបស់សារព័ត៌មានចិន South China Morning Post។

ការសិក្សាស្រាវជ្រាវមួយ​ ដឹកនាំដោយលោកសាស្ត្រាចារ្យ Qin Chuan រួមជាមួយនឹងសហការីរបស់គាត់​ បានធ្វើការពិសោធន៍ទៅលើសត្វស្វាចំនួន 4ក្បាលដែលមិនមានផ្ទុកនូវ Covid-19។ បន្ទាប់មកពួកគេបានយកមេរោគ Covid-19 ទៅចាក់បញ្ចូលទៅក្នុងខ្លួនស្វាទាំងបួននោះ។ បីថ្ងៃក្រោយមកវាក៏បានបញ្ចេញអាការៈមួយចំនួនដូចជា ពួកវា​ចាប់ផ្តើមវិវត្តន៍ខ្លួនទៅជាក្តៅខ្លួន ពិបាកដកដង្ហើម បាត់បង់ចំណង់អាហារ និងទម្ងន់ជាដើម។ ក្រោយពី ៤ថ្ងៃបន្ទាប់មកទៀតលោក Qin បានរកឃើញមានសត្វស្វាមួយក្បាលដែលបានរកឃើញថាវីរុសបានរាលដាលពាសពេញរាងកាយរបស់វាពីច្រមុះរហូតដល់ប្លោកនោមជាមួយនឹងការខូចខាត​ជាលិការសួត។ ចំណែកឯសត្វស្វានៅសេសសល់ក៏ធ្វើតេស្តវិជ្ជមានគ្រាន់តែវាមានលក្ខណៈស្រាល ទោះជាយ៉ាងណាបានជាសះស្បើយបន្តិចម្តងៗ ហើយទីបំផុតវាក៏ឈប់បង្ហាញរោគសញ្ញា។

ប្រហែលជាមួយខែក្រោយមកបន្ទាប់ពីការធ្វើរតេស្តបានទទួលលទ្ធផលអវិជ្ជមាន ហើយកាំរស្មីអ៊ិចបានបង្ហាញថាសរីរាង្គខាងក្នុងរបស់វាបានជាសះស្បើយយ៉ាងពេញលេញ ចំណែកឯសត្វស្វា ២ក្បាលបានឆ្លងវីរុសនេះតាមមាត់ទៅវិញ។ ការធ្វើកោសល្យវិច័យត្រូវបានអនុវត្តលើសត្វស្វាទាំងពីរនេះប្រហែលពីរសប្តាហ៍ក្រោយមក ហើយអ្នកស្រាវជ្រាវមិនអាចរកឃើញដានវីរុសនៅក្នុងខ្លួនរបស់ពួកគេទេ។ ទន្ទឹមនឹងនេះដែរកម្រិតអង្គបដិប្រាណ (Antibodies) ខ្ពស់ត្រូវបានគេរកឃើញបន្ទាប់ពីសប្តាហ៍ទី ២ ដែលបង្ហាញថាប្រព័ន្ធភាពស៊ាំត្រូវបានរៀបចំដើម្បីប្រយុទ្ធប្រឆាំងនឹងជម្ងឺនេះ។

ការពិសោធន៍មួយទៀតត្រូវបានធ្វើ​ឡើង​ ដាច់ដោយឡែកមួយ​ទៅ​លើ​សត្វស្វា ៣ក្បាល បន្ទាប់ពីបានធ្វើតេស្តរួចហើយសហការីរបស់លោក Qin ក៏បានរកឃើញថា​ទោះបីជាមនុស្សមានការប្រើប្រាស់ម៉ាសសម្រាប់ការពារក៏ដោយក៏មិនអាចទប់ទល់នឹងវីរុសនេះបានដែរព្រោះវាក៏អាចឆ្លងតាមរយៈភ្នែក​។

ឧទាហរណ៍ដូចជាលោក Wang Guangfa ជាអ្នកជំនាញវេជ្ជសាស្រ្តជាន់ខ្ពស់មកពីទីក្រុងប៉េកាំង​ (A senior medical expert from Beijing) បានឆ្លងមេរោគបន្ទាប់ពីធ្វើដំណើរទៅវូហានដើម្បីស៊ើបអង្កេតពីការផ្ទុះឡើងដំបូង បើទោះជាពាក់ម៉ាសមុខ និងឧបករណ៍ការពារផ្សេងទៀតក៏ដោយ។ លោកបានសង្ស័យថាវីរុសបានចូលក្នុងខ្លួនរបស់គាត់តាមរយៈភ្នែកនៅពេលដែលគាត់ជូតញើសចេញពីថ្ងាសរបស់គាត់ ប៉ុន្តែមិនមានភស្តុតាងដើម្បីគាំទ្រទ្រឹស្តីនេះទេ។ ក្រោយមកគាត់បានជាសះស្បើយ​បន្ទាប់ពីព្យាបាលនៅផ្ទះក្នុងទីក្រុងប៉េកាំង ដោយមានរោគសញ្ញាស្រាល។

ដើម្បីផ្ទៀងផ្ទាត់ទ្រឹស្តី Qin និងសហការី បានធ្វើបំណកស្រាយមួយទាក់ទងនឹងការផ្ទុកវីរុសនៅក្នុងភ្នែកសត្វស្វានោះ។ ការស៊ើបអង្កេតបន្ថែមទៀតបានបង្ហាញថាវីរុសអាចនឹង​នៅ​ទុំលើភ្នាសភ្នែកជាលិកា នៅខាងក្នុង​ត្របកភ្នែក និងគ្របលើភ្នែកពណ៌ស ហើយបន្ទាប់មកបានធ្វើដំណើរឆ្លងកាត់បំពង់បង្ហូរទឹកភ្នែកមុនពេល​ធ្លាក់នៅបំពង់ក។

​ក្រុម​អ្នក​វិទ្យាសាស្ត្រ​ខាង​លើ​ បាន​ អះអាងថា ការឆ្លងអាចត្រូវបានកាត់បន្ថយដោយការលាងដៃជាទៀងទាត់​ប្រចាំថ្ងៃ និងពាក់វ៉ែនតាការពារនៅពេលមានទំនាក់ទំនងជិតស្និទ្ធជាមួយអ្នកជម្ងឺឬកន្លែងដែលមានមនុស្សច្រើនជាពិសេសសម្រាប់គ្លីនិក៕

អត្ថបទទាក់ទង៖ មន្ត្រីជាន់ខ្ពស់ចិន៖ ថ្នាំផ្ដាសាយ Favipiravir ប្រសិទ្ធភាពខ្ពស់​ព្យាបាល Covid19!​

ដោយ៖ Anthony