កំណត់ត្រាមហាសោកនាដកម្មនៅអ៊ីតាលី៖ ត្រឹមតែ ១ថ្ងៃ ស្លាប់ជិត ១ពាន់នាក់
នេះជាកំណត់ត្រានៃមហាសោកនាដកម្មនៅប្រទេសអ៊ីតាលី តែត្រឹមតែមួយថ្ងៃប៉ុណ្ណោះ ចំនួនអ្នកស្លាប់ដោយសារតែ Covid19 បានកើនដល់ ៩៦៩នាក់ដែលជាចំនួនស្លាប់ច្រើនបំផុតក្នុងរយៈពេល ២៤ម៉ោង។ នេះបើយោងតាមសេចក្ដីរាយការណ៍របស់ The Guardian។
ដោយក្ដីសង្ឃឹមថា ចំនួនអ្នកឆ្លងមានការធ្លាក់ចុះ តែចំនួនអ្នកស្លាប់បែរជាកើនឡើងយ៉ាងគំហុកទៅវិញ (អ្នកស្លាប់សរុបកើនដល់ ៩ ១៣៤ករណី) ខណៈបច្ចុប្បន្នអ៊ីតាលីឈរនៅលេខរៀងទីពីរ (២) បន្ទាប់ពីប្រទេសចិន ដែលមានអ្នកឆ្លងច្រើនជាង ៨៦ ០០០នាក់។ នេះបើយោងតាមទីភ្នាក់ងារគាំពារជនស៊ីវិលរបស់អ៊ីតាលី។
បើយោងតាមការចុះផ្សាយសារព័ត៌មាន Telegraph នាពេលកន្លងមក ដែលបានដកស្រង់សម្ដីរបស់លោក Prof Walter Ricciardi អ្នកប្រឹក្សាក្រសួងសុខាភិបាលអ៊ីតាលី ចំនួនអ្នកស្លាប់នៅក្នុងប្រទេសអ៊ីតាលីកើនខ្ពស់ដោយសារតែ អត្រាប្រជាជន ដោយអ៊ីតាលីជាប្រទេសដែលមានប្រជាជនវ័យចំណាស់ជាងគេលំដាប់លេខ ២ នៅលើពិភពលោក។
លោក សាស្ត្រាចារ្យ Prof Walter Ricciardi បានថ្លែងថា៖ «អាយុរបស់អ្នកស្លាប់ក្នុងមន្ទីពេទ្យភាគច្រើនគឺមនុស្សចាស់ដែលមានអាយុច្រើនជាទូទៅ ៦៧ឆ្នាំ។ ដូចនេះ អាយុគឺជាកត្តាចំបងដែលបង្កឲ្យមានការស្លាប់ច្រើន»។
សូមអានលម្អិត៖ ជំងឺកូវីដ១៩ឆក់យកជីវិតមនុស្សជាង ៦០០នាក់ទៀតនៅអ៊ីតាលីត្រឹមមួយថ្ងៃ ដោយសារមូលហេតុមួយនេះ
