ពិភពលោកកាន់តែធ្ងន់ធ្ងរហើយ! ១,២លានករណី និង ៦៦ពាន់នាក់ស្លាប់
បច្ចុប្បន្នភាពចុងក្រោយគិតត្រឹមយប់ម៉ោង ៩ នៃថ្ងៃទី៥ ខែមេសា នេះ បានឱ្យដឹងថា នៅទូទាំងពិភពលោក មានករណីវិជ្ជមានសរុប ១ ២២៤ ៩៣៨នាក់ និងមានអ្នកស្លាប់សរុប ៦៦ ៥០២នាក់ បន្ទាប់ពី Covid19 បានរីកសាយភាយទៅកាន់ដែនដីជាង ២០០រួចមក។ ទោះជាយ៉ាងណា មកដល់ពេលនេះ មានអ្នកជាសះស្បើយសរុប ២៥៣ ៨២១ករណី។
បើក្រឡេកទៅមើលប្រទេសមហាពិភពលោកដែលកំពុងទទួលរងទុក្ខជាទម្ងន់មាន អ៊ីតាលី មានអ្នកស្លាប់សរុប ១៥ ៣៦២នាក់ និងអ្នកឆ្លង ១២៤ ៦៣២នាក់ ខណៈអេស្ប៉ាញមានអ្នកឆ្លងច្រើនគេនៅអឺរ៉ុប ១៣០ ៧៥៩ករណី និងស្លាប់សរុប ១២ ៤១៨នាក់។ បារាំង និងអាល្លឺម៉ង់ក៏ប្រកិតគ្នាដែរលើចំនួនអ្នកឆ្លង គឺ ៨៩ ៩៥៣នាក់ និង ៩៧ ០៧៤នាក់រៀងគ្នា។ តែអ្វីដែលខុសគេសម្រាប់មហាអំណាចនៅអឺរ៉ុបទាំងអស់គឺ មានតែអាល្លឺម៉ង់គត់ដែលមានចំនួនអ្នកស្លាប់តិចជាងគេ គឺ ត្រឹមតែ ១៤៧៨នាក់ប៉ុណ្ណោះ។
ងាកទៅមើលសហរដ្ឋអាមេរិកវិញ ត្រឹមតែថេរវេលានេះ អ្នកឆ្លងកើនសរុប ៣១១ ៦៥៦នាក់ និងមានអ្នកស្លាប់ចំនួន ៨៤៥៤នាក់។ ក្រៅពី ចិន អ៊ីរ៉ង់ និងអង់គ្លេស សុទ្ធតែមានអ្នកឆ្លងលើសពី ៤៧ពាន់នាក់ និងអ្នកស្លាប់ជាង ៣ពាន់នាក់ឡើង។
នៅតំបន់អាស៊ាន ម៉ាឡេស៊ី កំពុងឈរនៅមុខគេ មានចំនួនករណីសរុប ៣៦៦២នាក់ និងអ្នកស្លាប់ ៦១នាក់។ ចំណែក ហ្វីលីពីនមានចំនួនករណីសរុប ៣២៤៦នាក់ និងអ្នកស្លាប់សរុប ១៥២នាក់។ ដោយឡែក ថៃ និងឥណ្ឌូណេស៊ី នៅប្រកិតគ្នា ពោលគឺ ២២៧៣ និង ២១៦៩នាក់រៀងគ្នាតែចំនួនអ្នកស្លាប់ ឥណ្ឌូណេស៊ីខ្ពស់ជាងគេគឺ ១៩៨នាក់ ចំណែកថៃមានតែ ២៣នាក់ប៉ុណ្ណោះ៕
អត្ថបទទាក់ទង៖
ដោយ៖ រតនៈវិភូ
