Trump ព្រមានសងសឹក បើឥណ្ឌាដាក់កម្រិតលក់ថ្នាំគ្រុនចាញ់ព្យាបាលកូវីដដល់ខ្លួន
ភ្នាក់ងារសារព័ត៌មានអន្តរជាតិមានការចាប់អារម្មណ៍យ៉ាងខ្លាំងអំពី បញ្ហារវាង ឥណ្ឌា និង សហរដ្ឋអាមេរិក ជុំវិញរឿងថ្នាំគ្រុនចាញ់ Hydroxychloquine អាចព្យាបាលជំងឺកូវីដ១៩ បានខណៈឥណ្ឌាមានបំណងបន្ថយការនាំចេញ ដើម្បីទុកសម្រាប់ផ្គត់ផ្គង់ក្នុងស្រុករបស់ខ្លួន។
ការប្រកាសនាពេលនេះ គឺធ្វើឡើងបន្ទាប់ពីការប្រកាសពីលោក Narendra Modi កាលពីថ្ងៃអង្គារនេះ ថា ឥណ្ឌាអាចបន្ថយការនាំចេញឱសថព្យាបាលជំងឺគ្រុនចាញ់ Hydroxychloquine ដែលរដ្ឋបាល Trump ចាត់ទុកថា ជាអាវុធដ៏សំខាន់សម្រាប់ប្រយុទ្ធជាមួយនឹងកូវីដ១៩។ ក្រៅពីថ្នាំគ្រុនចាញ់នេះ ឥណ្ឌា ក៏គ្រោងកាត់បន្ថយថ្នាំ Paracetamol ថ្នាំបន្ថយការឈឺចាប់ ខណៈស្តុកហាក់ស្រកបន្តិច បន្ទាប់ពីចង្វាក់ផ្គត់ផ្គង់ជួបនូវតម្រូវការខ្ពស់។
ជុំវិញបញ្ហា ភ្នាក់ងារព័ត៌មានអន្តរជាតិធំៗ បានរាយការណ៍ថា លោក Trump បាននិយាយជាមួយលោក Modi កាលពីចុងសប្ដាហ៍មុន ដោយសុំឱ្យមានការផ្គត់ផ្គង់ឱ្យបានច្រើន ហើយថែមទាំងពន្លយពាក្យផងថា ការសងសឹកអាចនឹងកើតមានឡើងប្រសិនបើឥណ្ឌា មិនព្រមដកបម្រាមលើការនាំចេញឱសថនេះនោះទេ។
ឥណ្ឌា ដែលត្រូវបានគេចាត់ទុកថា ជាប្រទេសដែលមានក្រុមហ៊ុនឱសថជាច្រើន មិនត្រឹមតែអាមេរិកទេ សូម្បីតែប្រទេសជិតខាង ក៏បញ្ជាទិញថ្នាំប្រភេទខាងលើច្រើនណាស់ដែរ ក្នុងនោះមាន នេប៉ាល់។ អ្នកនាំពាក្យក្រសួងការបរទេសឥណញឌាលោក Anurag Srivastava បានអះអាងដូច្នេះថា ៖«យើងបានសម្រេចចិត្តហើយថា ឥណ្ឌានឹងផ្ដល់អាជ្ញាប័ណ្ណបន្តដល់ការនាំចេញប៉ារ៉ាសេតាម៉ុល និងថ្នាំ Hydroxychloquine ក្នុងបរិមាណដែលត្រូវកំណត់ ទៅកាន់ប្រទេសជិតខាងរបស់យើងទាំងអស់ដែលពឹងលើសមត្ថភាពរបស់យើង។ យើងនឹងផ្គត់ផ្គង់ថ្នាំដែលចាំបាច់ទាំងនេះទៅកាន់ប្រទេសមួយចំនួនដែលទទួលរងគ្រោះខ្លាំងដោយជំងឺរាតត្បាតនេះ»។
ការប្រើប្រាស់ថ្នាំគ្រុនចាញ់ Hydroxychloquine បានកើនឡើងយ៉ាងគំហុកបន្ទាប់ពីអាមេរិកបានក្លាយជាប្រទេសដែលមានអ្នកឆ្លងច្រើនជាងគេ ហើយមានការអះអាងពីអ្នកជំនាញថា ឱសថប្រភេទនេះមានប្រសិទ្ធភាពព្យាបាល Covid១៩ នេះ។
គូសបញ្ជាក់ថា រហូតមកដល់ពេលនេះ សហរដ្ឋអាមេរិកមានអ្នកឆ្លងសរុប ៣៦៨ ១៧៤ករណី (ច្រើនជាងគេបំផុត) និងមានអ្នកស្លាប់ ១០ ៩៦៦ប្រកៀកនឹងអេស្ប៉ាញដែរ៕
ដោយ៖ រតនៈវិភូ
ប្រភព៖ CNBC, Reuter, New York Times
