លទ្ធផលស្រាវជ្រាវ៖ អាមេរិកអាចត្រូវអនុវត្តន៍គម្លាតសុវត្ថិភាពដល់២០២២ បើវ៉ាក់សាំងអត់មាន
គម្រោងរបស់ក្រុមអ្នកស្រាវជ្រាវមួយក្រុមបានអះអាងកាលពីថ្ងៃអង្គារ ថា សហរដ្ឋអាមេរិកអាចនឹងបន្តអនុវត្តន៍គម្លាតសុវត្ថិភាព (social distancing) រហូតដល់ឆ្នាំ២០២២ ប្រសិនបើគេនៅតែមិនទាន់រកឃើញវ៉ាក់សាំងបានលឿនទេនោះ។ នេះបើយោងការចុះផ្សាយរបស់សារព័ត៌មាន CNN នៅថ្ងៃទី១៥ ខែមេសា នេះ។
ការស្រាវជ្រាវនេះធ្វើឡើងដោយសាលា Harvard T.H. Chan ដែលផ្ដោតទៅលើសុខភាពសាធារណៈនិងជាមែកធាងមួយរបស់សាកលវិទ្យាល័យ Harvard ដែលបានបង្ហោះនូវលទ្ធផលសិក្សាស្រាវជ្រាវរបស់ខ្លួននៅលើទិនានុប្បវត្តិវិទ្យាសាស្ត្រមួយកាលពីថ្ងៃអង្គារ កន្លងទៅ។ លទ្ធផលរកឃើញដោយក្រុមអ្នកសិក្សានេះហាក់ដើរផ្ទុយពីការប្រកាសរបស់សេតវិមានដែលថា កូវីដ១៩ នឹងថមថយវិញនារដូវក្ដៅ (សម្រាប់អាមេរិកចាប់ពី១ ឧសភា ដល់ខែវិច្ឆិកា) ខាងមុខនេះ។
ប្រភពដដែលបានលើកយកនូវសេណារីយ៉ូជាច្រើនមកអះអាង ក្នុងនោះគឺ រយៈពេលនៃការអនុវត្តន៍គម្លាតសុវត្ថិភាពអាចនឹងខ្លីជាងនេះប្រសិនបើសមត្ថភាពព្យាបាលកម្រិតធ្ងន់ (critical care capacity) មានកំណើនឡើងច្រើនជាងនេះ ហើយវ៉ាក់សាំងរកឃើញបានឆាប់។
រឿងមួយទៀត គឺមិនទាន់មានការស្រាវជ្រាវច្បាស់លាស់នៅឡើយទេថា តើមនុស្សមានវិជ្ជមានកូវីដ១៩ មានភាពស៊ាំស្គាល់វីរុសថ្មីនេះហើយឬនៅ។ វាទំនងជាអាចប្រើពេលយូរជាងនេះទៅទៀត។
អានបន្ត៖ នៅសហរដ្ឋអាមេរិកមានលេចឮព័ត៌មានថា បើគ្រូពេទ្យណានិយាយពីការខ្វះខាតឧបករណ៍ នឹងត្រូវបញ្ឈប់ពីការងារ
បើគិតមកដល់ពេលនេះ ទាំង ចិន និងអាមេរិក សុទ្ធតែបានបង្ហាញពីការរកឃើញវ៉ាក់សាំងដែលឈានទៅដល់ការធ្វើតេស្តទៅលើមនុស្ស។ ជាក់ស្ដែង កាលពីថ្ងៃទី១២ មេសា ចិនអះអាងថា វ៉ាក់សាំង Adenovirus សម្រាប់ជំងឺវីរុស COVID-19 ដែលត្រូវបានស្រាវជ្រាវដោយក្រុមអ្នកជំនាញដែលដឹកនាំដោយលោកស្រី Chen Wei អ្នកជំនាញផ្នែកកិច្ចការស្រាវជ្រាវវេជ្ជសាស្រ្តយោធា នៃវិទ្យាស្ថានវិទ្យាសាស្រ្តយោធា ប្រទេសចិន ត្រូវបានឈានដល់ដំណាក់កាលពិសោធន៍ព្យាបាលជំងឺលើកទី២។ នៅលើបណ្ដាញប្រព័ន្ធផ្សព្វផ្សាយរបស់អង្គការសុខភាពពិភពលោកបានប្រកាសថា នេះជាវ៉ាក់សាំងសម្រាប់ជំងឺវីរុស COVID-19 តែមួយគត់លើពិភពលោក ដែលបានឈានដល់ដំណាក់កាលពិសោធន៍ព្យាបាលជំងឺលើកទី២។ ជាមួយគ្នានេះដែរ នៅមុនការបង្ហោះរបស់ស្ថានទូតចិន សហរដ្ឋអាមេរិកក៏បានប្រកាសដូចគ្នា ដែលតាមរយៈបណ្ដាញសង្គមរបស់ស្ថានទូតអាមេរិកប្រចាំនៅកម្ពុជា ក៏បានអះអាងថា គម្រោងជាដៃគូជាច្រើនរបស់អាមេរិកកំពុងធ្វើតេស្តវ៉ាក់សាំងមួយទៅលើខ្លួនមនុស្សរួចទៅហើយ។
សូមបញ្ជាក់ថា ទាំងក្រុមហ៊ុននៅអឺរ៉ុប និងក្រុមហ៊ុនអាមេរិក បានប្រកាសពីគម្រោងវ៉ាក់សាំងជាច្រើន ក្នុងនោះក៏មានគម្រោងជាដៃគូ ខណៈអ្នកជំនាញធ្លាប់អះអាងថា វ៉ាក់សំាំងអាចប្រើពេលយ៉ាងតិច ពី ១២ ទៅ ១៨ខែ៕
ដោយ៖ រតនៈវិភូ
