សាស្ត្រាចារ្យចិត្តវិទ្យាបង្ហើបគន្លឹះ៣ជួយកាត់បន្ថយសម្ពាធផ្លូវចិត្តនៅក្នុងស្ថានភាពជំងឺកូវីដ១៩រាតត្បាត​



ដោយសារតែ​ការ​រាតត្បាត​ពី​ជំងឺ​កូវីដេ ១៩ នៅ​ពាសពេញ​សាកលលោក ហើយ​វា​កំពុង​សម្លាប់​មនុស្ស​ដល់​ទៅ​ជិត ២ សែន​នាក់​ទៅ​ហើយ​នោះ ខណៈ​មនុស្ស​រាប់​លាន​នាក់​ផ្សេង​ទៀត​ត្រូវ​បាន​​ដាក់​បម្រាម​ឲ្យ​ស្ថិត​នៅ​ក្នុង​ផ្ទះ ស្ថានភាព​នេះ​បាន​ធ្វើ​ឲ្យ​ប៉ះពាល់​យ៉ាង​ខ្លាំង​ដល់​បញ្ហា​ផ្លូវចិត្ត​របស់​មនុស្ស​ម្នាក់ៗ។ ការ​ស្ទង់​មតិ​ចុងក្រោយ​ទៅ​លើ​ប្រជាជន​អាមេរិក​បាន​បង្ហាញ​ថា ពលរដ្ឋ​របស់​មហាអំណាច​នេះ​បាន​បង្ហាញ​សញ្ញាណ​ស្ត្រេស ឬ​សម្ពាធ​ផ្លូវចិត្ត​កាន់តែ​ច្រើន​ឡើង។ 

ជា​ការ​ឆ្លើយតប​ទៅ​នឹង​បញ្ហា​ខាងលើ​នេះ លោកស្រី​សាស្ត្រាចារ្យ​  Laurie Santos ដែល​ជា​សាស្ត្រាចារ្យ​ចិត្តវិទ្យា​ដ៏​ល្បី​ល្បាញ​មក​ពី​សាកលវិទ្យាល័យ Yale បាន​លើកឡើង​ពី​មធ្យោបាយ​ចំនួន​៣ ខាងក្រោម​ដែល​លោកស្រី​អះអាង​ថា វា​មាន​ប្រសិទ្ធភាព​ជួយ​កាត់​បន្ថយ​​ស្ត្រេស ឬ​សម្ពាធ​ផ្លូវចិត្ត​បាន។ ​

១.ប្រើប្រាស់​បណ្តាញសង្គម​ ឬបច្ចេកវិទ្យា​
លោកស្រី​សាស្ត្រាចារ្យ  Laurie Santos បាន​លើកឡើង​​ដូច្នេះ​ថា ៖“ការ​ស្រាវជ្រាវ​បាន​បង្ហាញ​ថា  មនុស្ស​ដែល​មាន​សុភមង្គល​តែងតែ​មាន​ទំនោរ​ទៅ​រក​ការ​​បង្កើត​ទំនាក់ទំនង​ល្អ​នៅ​ក្នុង​សង្គម។ ប៉ុន្តែ​នេះ​គឺ​ជា​រឿង​លំបាក​បំផុត​មួយ​ត្រូវ​ធ្វើ​នៅ​អំឡុង​ពេល​កើត​មាន​ជំងឺ​កូវីដ ១៩ ពីព្រោះ​គម្លាត​សង្គម​មិន​អនុញ្ញាត​ឲ្យ​យើង​ចេញ​ទៅ​ក្រៅ​ជួប​មនុស្ស​ជិតស្និទ្ធ​របស់​យើង​បាន​ដោយសេរីទេ​”។ 

ប៉ុន្តែ​លោកស្រី  Santos ពន្យល់​ថា បច្ចេកវិទ្យា​ពិត​ជា​អាច​ជួយ​រឿង​នេះ​បាន។ លោកស្រី​បន្ត​ថា  ជំនួស​ឲ្យ​ការ​ទៅ​ជួប​ផ្ទាល់​ជាមួយ​នរណា​ម្នាក់ ការ​ប្រើប្រាស់​បច្ចេកវិទ្យា​សម្រាប់​ទំនាក់ទំនង​ពី​ចម្ងាយ​ដូច​ជា Zoom ឬ Face Time ជា​ដើម​ ជា​វិធី​ដ៏​ល្អ​មួយ​ដើម្បី​ជួយ​ឲ្យ​អ្នក​អាច​ប្រាស្រ័យ​ទាក់ទងទៅ​កាន់​មនុស្ស​ជិតស្និទ្ធ​របស់​អ្នក​បាន​យ៉ាង​មាន​ប្រសិទ្ធភាព​ដូច ទៅ​ជួប​ផ្ទាល់​ដែរ​។

២.ជួយ​អ្នកដទៃ​​​តាម​ដែល​អាច​ធ្វើ​បាន
“មនុស្ស​ដែល​មាន​សុភមង្គល​មាន​ទំនោរ​ពិសេស​មួយ​គឺ​ ទម្លាប់​ជួយ​អ្នកដទៃ”។ លោកស្រី Santos  បាន​ពន្យល់​​ដោយ​​បញ្ជាក់​បន្ថែម​ថា មនុស្ស​ប្រភេទ​នេះ​ផ្ដោត​លើ​សុភមង្គល​អ្នកដទៃ​ធំ​ជាង​ប្រយោជន៍​ខ្លួនឯង។ ថ្វីត្បិត​ដែល​មនុស្ស​ភាគច្រើន​មាន​ភាព​អាត្មា​និយម​ខ្វាយខ្វល់​ពី​ខ្លួនឯង​​ជាង​អ្នកដទៃ ក៏ប៉ុន្តែ​លោក​ស្រី​អះអាង​ថា បើ​អ្នក​ជំរុញ​ឲ្យ​អ្នកដទៃ​ធ្វើ​អំពើ​ល្អ​កាន់តែ ច្រើន​ឡើង​សម្រាប់​មនុស្ស​ជុំវិញ​ខ្លួន​ជា​ពិសេស​នៅ​ក្នុង​កាលៈទេសៈ​នេះ​ដូច​ជា បរិច្ចាគ​លុយ​ ផ្តល់​សម្ភារៈ ឬ​ជំនួញ​ផ្សេងៗ វា​នឹង​ជួយ​​ឲ្យ​អ្នក​មាន​អារម្មណ៍​ល្អ​​កាន់តែ​ខ្លាំង​ឡើង និង​មាន​ឥទ្ធិពល​ជា​វិជ្ជមាន​​សម្រាប់​សង្គមជាតិ​។ 

៣.ផ្ដោត​យកចិត្ត​ទុកដាក់​រឿង​បច្ចុប្បន្ន​របស់​អ្នក
​នេះ​អាច​​មានន័យ​​ម្យ៉ាង​ទៀត​ថា ជា​ការ​​​ហ្វឹកហាត់​ការ​គិត​របស់​អ្នក​។ បើ​តាម​ការ​លើកឡើង​របស់​លោកស្រី​សាស្ត្រាចារ្យ​ Santos  មនុស្ស​ដែល​សប្បាយចិត្ត​ ច្រើន​តែងយកចិត្តទុកដាក់​ខ្ពស់​នូវ​អ្វី​ដែល​កំពុង​កើត​មាន​នៅ​ពេល​ឥឡូវ​នេះ។ 

“ការ​ធ្វើ​សមាធិ​គឺ​ជា​វិធី​ដ៏​មាន​អនុភាព​មួយ​នៅ​អំឡុង​ពេល​​ប្រឈមមុខ​នឹង​វិបត្តិ​មួយ​នេះ ពីព្រោះ​​វា​ជួយ​ឲ្យ​អ្នក​ផ្តោត​ទៅ​លើ​អ្វី​ដែល​​រាងកាយ​របស់​អ្នក​កំពុង​ធ្វើ​សកម្មភាព​នៅ​ពេល​ឥឡូវ​នេះ។ ​ចិត្ត​របស់​អ្នក​​នឹង​មិន​អាច​ជ្រះស្រឡះ​អំពី​​រឿង​ដែលនឹង​កើត​មាន​នៅ​ពេល​បន្ទាប់ ឬ ​អ្វី​ដែល​កើត​មាន​ឡើង​នៅ​ពេល​កន្លង​មក​នោះ​ឡើយ”។ លោកស្រី​សាស្ត្រាចារ្យ  Santos ផ្តល់​ដំបូន្មាន​បន្ថែម៕

អត្ថបទទាក់ទង៖

ដោយ៖ ណារិន 
ប្រភព៖ Weforum

X
5s