ទ័ពមួកខៀវកម្ពុជា ៣រូប វិជ្ជមានកូវីដ១៩ នៅប្រទេសម៉ាលី
កងទ័ពមួយខៀវកម្ពុជាប្រមាណ ៣រូបក្នុងចំណោមកងទ័ពមួយខៀវជិត ៣០០នាក់បាននិងកំពុងបំពេញបេសកកម្មរក្សាសន្តិភាពអង្គការសហប្រជាជាតិនៅប្រទេសតំបន់អាហ្វ្រិកមួយគឺ ប្រទេសម៉ាលី ត្រូវបានធ្វើតេស្តរកឃើញ ឆ្លងមេរោគកូវីដ១៩។ នេះបើតាមសេចក្ដីរាយការណ៍ពី BTV News ថ្ងៃទី២៤ ខែមេសា។
បើតាមប្រភពដដែលបានឱ្យដឹងថា កងទ័ពកម្ពុជាទាំង ៣រូបមានប្រុស ២នាក់ ស្រី ១នាក់ កំពុងសម្រាកព្យាបាលនៅមន្ទីរពេទ្យបាមាកូ រដ្ឋធានី នៃប្រទេសម៉ាលី។ ក្នុងចំណោមកងទ័ពមួកខៀវជិត ៣០០នាក់នេះ បានបំពេញបេសកកម្មនៅតំបន់ចំនួន ៦ផ្សេងៗគ្នារួមមាន តំបន់បាម៉ាកូម្នាក់ តំបន់គីដាល់៨២នាក់ ទេសាលីត៧២នាក់ ហ្កាវ១០៥នាក់ ទុំបុកទូ២១នាក់ ម៉ប់ទី១៨នាក់។
តាមរយៈ BTV News ឯកឧត្តម ឧត្តមសេនីយ៍ឯក ផល សាម៉ន អ្នកនាំពាក្យមជ្ឈមណ្ឌលជាតិគ្រប់គ្រងកងកំលាំងរក្សាសន្តិភាព បានឱ្យដឹងថា រាជរដ្ឋាភិបាលកម្ពុជា តាមរយៈក្រសួងការពារជាតិកម្ពុជា បានបញ្ជូនសំភារៈការពារមេរោគឆ្លងCOVID-19 មានម៉ាស់ ទឹកអាកុល ជែល ចំណាយអស់ថវិកាសរុបជាង ២ម៉ឺន ៥ពាន់ដុល្លារ រួមទាំងអាវពាក់ការពារមេរោគឆ្លងប្រមាណជិត ៨០កំប្លេ ចំណាយថវិកាអស់ប្រមាណជិត ១៤០០០ដុល្លារ អាមេរិច បន្ថែមពីលើជំនួយពីអង្គការសហប្រជាជាតិ ផ្តល់ជូនកងទ័ពមួកខៀវកម្ពុជា កំពុងឈរជើងតាមបណ្តាប្រទេសចំនួន ៤នោះ រួមមាន ប្រទេសលីបង់ ស៊ូដង់ខាងត្បូង ម៉ាលី និងសាធារណរដ្ឋអាហ្វ្រឹកកណ្តាល៕
ដោយ៖ វីរៈស័ក្ដិ
