ចង់ចេញរកស៊ីពេលរៀនចប់ អនុវត្តយុទ្ធសាស្ត្រ ៨ ជំហាននេះ!
ប្រសិនបើធ្វើការមួយថ្ងៃ ៨ ម៉ោងជាសុបិនអាក្រក់បំផុតរបស់អ្នក អ្នកនៅមានវិធីផ្សេងដែលអាចឲ្យអ្នកជៀសផុតបាន នោះគឺធ្វើជំនួញ។ មាននិស្សិតជាច្រើនមានក្តីសុបិនចង់ចាប់ផ្តើមបើកអាជីវកម្មផ្ទាល់ខ្លួនជំនួសឲ្យការរស់នៅជាមួយនឹងភាពភ័យខ្លាចគេបណ្ដេញចេញពីការងារ ហើយទៅរកការងារធ្វើនៅកន្លែងថ្មីទៀត។ ដើម្បីធ្វើឲ្យក្តី សុបិនរបស់អ្នកអាចក្លាយជាការពិតបានធ្វើជាអ្នកជំនួញនៅពេលខាងមុខក្រោយពេលរៀនចប់ អ្នកអាចអនុវត្តតាមក្បួន ៨ជំហានខាងក្រោមនេះ៖
១.ត្រូវមានគំនិតបង្កើតមុខរបរមួយ
ប្រសិនបើអ្នកចង់ចាប់ផ្ដើមរកស៊ីអ្វីមួយ អ្នកត្រូវដឹងច្បាស់ថា តើអ្នកចង់រកស៊ីអ្វី? ក្នុងនាមជាអ្នករកស៊ី អ្នកត្រូវតែមានគំនិតបង្កើតមុខរបរថ្មីសម្រាប់ខ្លួនឯង។ តើអ្នកនឹងអាចចាប់ផ្ដើមជំនួញមួយដោយរបៀបណាបើអ្នកមិនបានដឹងថា អ្នកអត់មានគំនិតរកស៊ីអ្វីផងនោះ? តាមពិតទៅ អ្នកមិនចាំបាច់មានភាពច្នៃប្រឌិត និងបង្កើតអ្វីដែលថ្មីដែលគ្មាននរណានឹកស្មានមិនដល់នោះទេ។ អ្នកអាចគ្រាន់តែយកគំនិត ឬជំនួញណាមួយដែលមានស្រាប់នៅលើទីផ្សារ ហើយយកមកវិភាគដើម្បីស្វែងរកចំណុចខ្វះខាត ហើយប្រើឱកាសនោះមកក្រឡៃធ្វើជាមុខជំនួញផ្ទាល់ខ្លួនរបស់អ្នក។ នេះនឹងធ្វើឲ្យអ្នកមានភាពងាយស្រួលជាង បង្កើតជំនួញមួយថ្មីដោយខ្លួនឯង។
២.វិភាគទីផ្សារ
ក្រោយមានគំនិតរកស៊ីហើយនោះ អ្វីដែលអ្នកត្រូវធ្វើបន្ទាប់គឺត្រូវវិភាគទីផ្សារ ដើម្បីរកទំហំទីផ្សារ តម្រូវការ និងអតិថិជនដែលនឹងប្រើប្រាស់សេវាកម្ម ឬផលិតផលរបស់អ្នក។ វាយតម្រូវគូប្រជែង រកមើលចំណុចខ្លាំង និងចំណុចខ្សោយគូប្រជែង ហើយរកមើលថា តើអ្វីទៅជាចំណុចខុសគ្នារវាងអាជីវកម្មរបស់អ្នក និងគូប្រជែង? ប្រៀបធៀបតម្លៃ និងគុណភាពសេវាកម្ម ឬផលិតផលរបស់អ្នក នឹងស្វែងរកលទ្ធភាពមួយដែលអ្នកអាចធ្វើបានល្អបំផុត។ នេះគឺជាកត្តាចាំបាច់ណាស់ ពីព្រោះថានៅពេលដែលអ្នកក្តោបបានព័ត៌មានទាំងនេះ អ្នកនឹងអាចប្រកួតប្រជែងជាមួយគូប្រជែងរបស់អ្នកដែលមានស្រាប់នៅទីផ្សារបាន។
៣.គ្រោង និងធ្វើផែនការអាជីវកម្ម
អ្នកអាចចងក្រងផែនការអាជីវកម្មមួយសម្រាប់អាជីវកម្មរបស់អ្នកដែលសរសេរអំពីបេសកកម្ម គោលបំណងអាជីវកម្ម ទិដ្ឋភាពទូទៅ សេចក្ដីសង្ខេបប្រតិបត្តិការអាជីវកម្ម ការពិពណ៌នាទូទៅរបស់ក្រុមហ៊ុន ឱកាស ឧស្សាហកម្ម និងទីផ្សារយុទ្ធសាស្ត្ររបស់អ្នក ក្រុមការងារ ផែនការទីផ្សារ ផែនការប្រតិបត្តិការ ផែនការហិរញ្ញវត្ថុ និងឧបសម្ពន្ធជាដើម។ផែនការអាជីវកម្មភាគច្រើនគឺជាតម្រូវការចាំបាច់ណាស់នៅក្នុងការធ្វើជំនួញគ្រប់ប្រភេទឲ្យទទួលបានជោគជ័យ។
៤.ការវិនិយោគ
អ្នកត្រូវតែវិនិយោគទៅលើប្រភេទមុខជំនួញផ្សេងៗដែលអ្នកចាប់អារម្មណ៍។ អ្នកអាចចាប់ផ្តើមមុខជំនួញមួយដោយមិនប្រើលុយ ប៉ុន្តែករណីនេះគឺជារឿងកម្រណាស់ ហើយអ្នកត្រូវការពេលវេលាច្រើនណាស់ដើម្បីបានផល។ នៅក្នុងជំហានទី៣ខាងលើ អ្នកត្រូវគណនាថា តើចំនួនលុយប៉ុន្មានដែលអ្នកត្រូវការក្នុងជំហានដំបូងនៃអាជីវកម្មរបស់អ្នក? អ្នកត្រូវកំណត់ការចំណាយនេះឲ្យបាន ហើយត្រៀមលុយបន្ថែមទុកជាមុនយ៉ាងហោចណាស់ ២០% ទៀត។ សូមចាំថា មានលុយត្រៀមទុកមុនតិចតួច វាប្រសើរជាងគ្មានលុយសោះពីព្រោះការចំណាយឥតគ្រោងទុកនឹងកើតមានឡើងហួសពីអ្វីដែលអ្នកត្រូវការ ជាពិសេសនៅពេលមានភាពបន្ទាន់កើតមានឡើងចំពោះមុខ។
៥.ចាប់ផ្ដើមសាកល្បងអនុវត្តគំនិតរកស៊ីរបស់អ្នក
រឿងដំបូងគេដែលអ្នកត្រូវធ្វើក្នុងចំណុចនេះ គឺត្រូវសាកល្បងអនុវត្តគំនិតរកស៊ីរបស់អ្នក។ អភិវឌ្ឍផលិតផល ឬសេវាកម្មដែលអាចទទួលបានក្នុងតម្លៃអប្បបរមាមួយ ចាប់ផ្ដើមយុទ្ធនាការផ្សព្វផ្សាយទ្រង់ទ្រាយតូចមួយ ហើយព្យាយាមលក់វាទៅកាន់អតិថិជន។ វិធីនេះនឹងជួយអ្នកឲ្យអ្នកអាចសិក្សាបានពីតម្រូវការជាក់ស្ដែងរបស់អតិថិជន។ បន្ថែមលើនេះ អ្នកត្រូវមើលផែនការរបស់អ្នក និងតម្រូវការកម្រិតអប្បបរមាណាមួយដើម្បីចាប់ផ្តើមជំនួញរបស់អ្នក។ សូមចាំថា ការ ពន្យារពេលមិនចេញអនុវត្តរកស៊ី គឺជាកំហុសមួយក្នុងចំណោមកំហុសជាច្រើនដែលសហគ្រិនបង្កើតឡើង។ អ្នកត្រូវរៀនធ្វើជាបណ្ដើរ កែកំហុសបណ្ដើរ ហើយអ្នកមិនចាំបាច់ធ្វើវាឲ្យល្អឥតខ្ចោះនោះទេ។
៦.ចុះបញ្ជីអាជីវកម្មឲ្យបានត្រឹមត្រូវ
ការចុះបញ្ជីអាជីវកម្មពិតជារឿងសំខាន់បំផុតមួយទៀតដែលអ្នកត្រូវតែធ្វើដើម្បីធានាថា អាជីវកម្មរបស់អ្នកស្របច្បាប់ និងមានការទទួលស្គាល់ពីរដ្ឋ។ ការចុះបញ្ជីនេះមិនត្រឹមតែបង្ហាញពីភាពស្របច្បាប់របស់អ្នកប៉ុណ្ណោះទេ វាក៏នឹងធ្វើឲ្យអាជីវកម្មរបស់អ្នកមានឱកាសកាន់តែធំដើម្បីពង្រីក និងពង្រឹងខ្លួនកាន់តែរឹងមាំនៅលើ ទីផ្សារក្នុងស្រុក ហើយបើសិនជាអាចនៅលើទីផ្សារអន្តរជាតិផងដែរ។ សូមបញ្ជាក់ថា ចំណុចនេះគឺជាការផ្តល់ទំនុកចិត្ត និងភាពកក់ក្ដៅបំផុតមួយសម្រាប់អតិថិជន និងដៃគូជំនួញជាច្រើនដើម្បីហ៊ានរកស៊ីជាមួយអ្នក។
៧.អភិវឌ្ឍអាជីវកម្ម
បន្ទាប់ពីបានអនុវត្តបើកទ្វារចេញរកស៊ី ផែនការអាជីវកម្មត្រូវបានកែសម្រួលហើយការលក់បានចាប់ផ្តើមយ៉ាងរលូនហើយនោះ អ្នកអាចអភិវឌ្ឍអាជីវកម្មរបស់អ្នក និងធ្វើវាឲ្យកាន់តែប្រសើរឡើងនូវចំណុចគ្រប់យ៉ាងដែលអ្នកបានសរសេរទុកនៅក្នុងផែនការអាជីវកម្ម។ អ្នកអាចចាប់ផ្ដើមបង្កើត ឬបង្កើតគេហទំព័រ ពង្រីកឃ្លាំងទំនិញ ឬការិយាល័យ ពង្រីកបុគ្គលិកឲ្យកាន់តែច្រើនជាដើមនៅពេលគំនិត និងគំរូអាជីវកម្មរបស់អ្នកបានបង្ហាញពីប្រសិទ្ធភាពជាងមុន។ ទាំងនេះជាជំហានល្អមួយសម្រាប់អ្នកពង្រីកខ្លួនកាន់តែជ្រៅទៅកាន់ទីផ្សារក្នុងស្រុក ឬទៅកាន់ពិភពលោក។ នៅពេលអ្នករកចំណូលបានពីការលក់កាន់តែច្រើន អ្នកត្រូវវិនិយោគលើវាឲ្យកាន់តែ ច្រើនថែមទៀត។
៨.បង្កើនសកម្មលើការធ្វើទីផ្សារ
អ្វីដែលអ្នកត្រូវធ្វើបន្ទាប់ទៀត គឺការបង្កើនសកម្មភាពលើការធ្វើទីផ្សារ។ អ្នកត្រូវធ្វើយុទ្ធសាស្ត្រទីផ្សារឲ្យកាន់តែផុលផុសតាមរយៈការតាមដានអតិថិជននៅលើបណ្ដាញអ៊ីនធឺណិត ប្រើប្រាស់បណ្ដាញសង្គមក៏ដូចជាប្រព័ន្ធផ្សព្វផ្សាយផ្សេងទៀតដើម្បីផ្សព្វផ្សាយការលក់។ សូមចាំថា ដរាបណាអ្នកមានមធ្យោបាយកាន់តែច្រើនឡើង និងកាន់តែសកម្ម អាជីវកម្មរបស់អ្នកនឹងត្រូវបានគេស្គាល់កាន់តែច្រើនឡើង។ ប៉ុន្តែអ្នកត្រូវប្រាកដថា យុទ្ធសាស្ត្ររផ្សព្វផ្សាយរបស់អ្នកត្រូវតែមានប្រសិទ្ធភាពទើបធ្វើឲ្យការចំណាយរបស់អ្នកលើការធ្វើទីផ្សារនេះមិនឥតប្រយោជន៍៕
ដោយ៖ Kevin
ប្រភព៖ Addicted2success
