ការពិត ១០យ៉ាងដែលអ្នកមិនបានដឹងពីអត្ថន័យសុភមង្គលនៅជុំវិញពិភពលោក
មនុស្សគ្រប់គ្នាមានសុភមង្គលតិច ឬច្រើនអាស្រ័យលើកត្តាជាច្រើនរាប់ចាប់តាំងពីសុខភាព មិត្តភាព ភាពជោគជ័យក្នុងជីវិត លុយ ការងារ មុខមាត់ ឋានៈតួនាទីក្នុងសង្គមជាដើម។ ទន្ទឹមនឹងនេះ សុភមង្គលរបស់ប្រទេសនីមួយៗក៏មិនដូចគ្នាដែរ ជាពិសេសរវាងប្រទេសក្រីក្រ និងប្រទេសអភិវឌ្ឍ។
បើយោងតាមរបាយការណ៍សុភមង្គលប្រចាំឆ្នាំ ២០១៧ របស់អង្គការសហប្រជាជាតិ (World Happiness Report) បានស្រាវជ្រាវលើបណ្ដាប្រទេសចំនួន ១៥៥ ហើយស្វែងរកថា តើប្រទេសណាដែលមានសុភមង្គលជាងគេបំផុត? ការវាស់ស្ទង់លើកម្រិតសុភមង្គលរបស់ប្រទេសទាំងនេះត្រូវបានធ្វើឡើងដោយផ្អែកទៅលើ ប្រាក់ចំណូល សុខភាព សុវត្ថិភាព ការគាំពារសង្គម សេរីភាព និងទំនុកចិត្តទៅលើរដ្ឋាភិបាលជាដើម។
ជាលទ្ធផល របាយការណ៍នេះបានបង្ហាញ ចំណុចដ៏គួរឲ្យចាប់អារម្មណ៍ចំនួន ១០ ស្តីពីសុភមង្គលនៅជុំវិញពិភពលោកដូចខាងក្រោមនេះ៖
១.អ្នកដែលធ្វើការឲ្យខ្លួនឯង មានពេញចិត្តនឹងឆាកជីវិតជាងអ្នកធ្វើការឲ្យគេ
ធ្វើការឲ្យខ្លួនឯង អាចមានចំណុចវិជ្ជមាន និងចំណុចអវិជ្ជមាន។ នៅក្នុងប្រទេសអភិវឌ្ឍ អ្នកដែលធ្វើការឲ្យខ្លួនឯងដូចជាអ្នកជំនួញ មានភាពពេញចិត្តស្កប់ស្កល់នឹងជីវិតជាងអ្នកដែលធ្វើការឲ្យគេ។ យ៉ាងណាក៏ដោយ មនុស្សប្រភេទនេះក៏ជួបបទពិសោធន៍អវិជ្ជមានច្រើនដែរដូចជាស្ត្រេស និងព្រួយបារម្ភច្រើនជាដើម។
២.មនុស្សកាន់តែសប្បាយចិត្តនៅពេលពួកគេធ្វើសកម្មភាពក្នុងសង្គមពេញមួយសប្ដាហ៍
ប្រជាជនអាមេរិកភាគច្រើនកាន់តែសប្បាយចិត្តនៅពេលថ្ងៃសម្រាកចុងសប្ដាហ៍បានចូលមកដល់។ ប៉ុន្តែអារម្មណ៍រីករាយនៅចុងសប្ដាហ៍នឹងបាត់បង់ទៅវិញនៅពេលដែលពួកគេទទួលបានបរិយាកាសការងារប្រកបដោយទំនុកចិត្តខ្ពស់។ នៅពេលដែលពួកគេចាត់ទុកថា ចៅហ្វាយរបស់ពួកគេមិនមែនជាមនុស្សគួរឲ្យខ្លាច តែជាដៃគូការងារ ហើយនៅពលដែលពួកគេចំណាយពេលធ្វើសកម្មភាពសង្គមពេញមួយសប្ដាហ៍របស់ពួកគេ។
៣.គេបានរកឃើញថា សុភមង្គលរបស់ពលរដ្ឋអាមេរិកបានធ្លាក់ចុះនៅក្នុងរយៈពេលមួយទសវត្សចុងក្រោយនេះ
នៅក្នុងមួយទសវត្សចុងក្រោយ គេបានរកឃើញថា សុភមង្គលរបស់ពលរដ្ឋអាមេរិកបានធ្លាក់ចុះ។ ពួកគេបានរស់នៅផ្សារភ្ជាប់ទៅនឹងការធ្លាក់ចុះនូវភាពស្កប់ស្កល់ក្នុងជីវិតរបស់ពួកគេដោយសារតែមានការធ្លាក់ចុះនូវការគាំពារសង្គម សេរីភាពផ្ទាល់ខ្លួន ជំនួយ ជំងឺថ្មីៗ និងអំពើពុករលួយក្នុងអាជីវកម្ម និងក្នុងរដ្ឋាភិបាល។
៤.សុខភាពផ្លូវចិត្តគឺជារឿងអាទិភាពសម្រាប់អ្នក
ផ្អែកលើការសិក្សាស្រាវជ្រាវដែលបានធ្វើឡើងនៅអាមេរិក អូស្ត្រាលី អង់គ្លេស និងឥណ្ឌូណេស៊ីដើម្បីកំណត់ពីមូលហេតុដែលនាំទៅរកភាពគ្មានសុភមង្គល និងភាពក្រីក្រ។ ពួកគេបានរកឃើញថាជំងឺផ្លូវចិត្តបានរួមចំណែកធ្វើឲ្យប៉ះពាល់ដល់សុភមង្គលរបស់មនុស្សច្រើនជាងការបាត់បង់ប្រាក់ចំណូល ការងារឬ ជំងឺប្រចាំកាយទៅទៀត។ នៅប្រទេសនីមួយសុខភាពផ្លូវកាយគឺពិតជាសំខាន់ខ្លាំងណាស់ ប៉ុន្តែគ្មានប្រទេសណាមួយដែលរកឃើញថា វាមានសារសំខាន់ជាងសុខភាពផ្លូវចិត្តនោះទេ។
៥.អ្នកដែលមានដៃគូជីវិត គ្រួសារ ឬសាច់ញាតិច្រើន កាន់តែមានសុភមង្គល
អ្នកដែលមានដៃគូជីវិត មានទំនាក់ទំនងរឹងមាំជាមួយគ្រួសារដែលនៅឆ្ងាយ ឬជាមនុស្សសាមញ្ញដែលអាចទុកចិត្តបាន គឺមានសុភមង្គលច្រើនជាងអ្នកដែលមិនមានដៃគូជីវិត គ្រួសារ ឬសាច់ញាតិ។ របាយការណ៍បានបញ្ជាក់ថាទៀតថា ១០ %នៃប្រជាជនរបស់ប្រទេសនីមួយៗ ដែលរដ្ឋបានបង្កើតគោលនយោបាយគាំពារសង្គម ធ្វើឲ្យសុភមង្គលរបស់ប្រជាពលរដ្ឋរបស់ខ្លួនកើនឡើងជាង ២០% ។
៦.គ្រួសារ កុមារភាព និងសាលារៀន មានឥទ្ធិពលដល់សុភមង្គលរបស់មនុស្សម្នាក់ៗនៅពេលអនាគត
សម្រាប់មនុស្សពេញវ័យ កម្រិតនៃសុភមង្គលរបស់ពួកគេនៅថ្ងៃនេះមានឥទ្ធិពលខ្លាំងចេញពីស្ថានភាពសេដ្ឋកិច្ចគ្រួសារ ឋានៈនៅក្នុងសង្គម និងសុខភាពតាំងពីក្មេងមកម្ល៉េះ។ ខណៈដែលប្រវត្តិសាវតាររបស់មនុស្សត្រូវបានគេមើលរំលង វាបានដើរតួនាទីសំខាន់ណាស់ដល់ភាពពេញចិត្តស្កប់ស្កល់ក្នុងជីវិតរបស់ពួកគេនៅពេលពួកគេធំឡើង។
៧.ចំណូលមានសារសំខាន់ជាងការអប់រំ
ការស្រាវជ្រាវទៅលើប្រទេសជាច្រើនបានបង្ហាញថា ប្រាក់ចំណូលគឺមានសារសំខាន់សម្រាប់សុភមង្គលជាងការអប់រំ។ បុគ្គលមួយចំនួននៅក្នុងចំណោមបុគ្គលមានជាងគេបំផុតក្នុងលោកបានបោះបង់រៀននៅមហាវិទ្យាល័យ ហើយងាកមកបើកជំនួញរកចំណូលបានរាប់ពាន់លានដុល្លារដែលក្នុងនោះរួមមានដូចជាមហាសេដ្ឋី Bill Gates និងលោក Mark Zuckerberg ជាដើម។
៨.សុភមង្គលតិច ឬច្រើនអាស្រ័យលើប្រភេទមុខរបរការងារនីមួយៗរបស់មនុស្សម្នាក់ៗ
នេះវាមិនមែនជារឿងចម្លែកទេដែលមនុស្សមានការងារធ្វើ សប្បាយចិត្តជាងអ្នកគ្មានការងារធ្វើ។ ប៉ុន្តែប្រភេទមុខរបរការងាររបស់មនុស្សម្នាក់ៗ ក៏វារួមចំណែកធ្វើឲ្យមនុស្សម្នាក់ៗមានសុភមង្គលខុសៗគ្នាផងដែរ។ អ្នកដែលមានមុខរបរនៅក្នុងវិស័យមួយចំនួនដូចជា វិស័យសាងសង់ រុករករ៉ែ ឧស្សាហកម្ម ដឹកជញ្ជូន កសិកម្ម នេសាទ និងព្រៃឈើ មានទំនោរទៅរកការធ្លាក់ចុះនៃសុភមង្គល។
៩.មានលុយមិនប្រាកដថា មានសុភមង្គល
ប្រាក់ខែ ឬមានលុយច្រើន មិនមែនជាកត្តាតែមួយគត់ដែលមានឥទ្ធិពលដល់កម្រិតសុភមង្គលរបស់ម្នាក់ៗនោះទេ។ ឋានៈមុខមាត់ក្នុងសង្គម ការងារ ទំនាក់ទំនងនៅកន្លែងការងារ តំណែងការងារ ភាពជោគជ័យ និងការកំណត់គោលដៅ ទាំងអស់នេះសុទ្ធតែរួមចំណែកដើរតួនាទីយ៉ាងសំខាន់ក្នុងការកំណត់ឲ្យមនុស្សម្នាក់ៗកាន់តែមានសុភមង្គល។
១០.ភាពអត់មានការងារធ្វើ គឺជារឿងមួយគួរឲ្យខ្លាច
ទោះបីជានរណាម្នាក់រកបានការងារថ្មីធ្វើក៏ដោយ របាយការណ៍បានបង្ហាញថា អារម្មណ៍មិនសប្បាយចិត្តរបស់ពួកគេ នៅតែបន្តដាក់សម្ពាធផ្លូវចិត្តរបស់ពួកគេមិនងាយនឹងបំភ្លេចបានភ្លាមៗឡើយ ហើយវាធ្វើឲ្យពួកគេដេកភ័យព្រួយខ្លាច រូបភាពភាពគ្មានការងារធ្វើកើតមានចំពោះពួកគេបន្តទៀតនៅថ្ងៃណាមួយខាងមុខ៕
អត្ថបទទាក់ទង៖
ហេតុផល ៨ នេះបញ្ជាក់ថាលុយពីជាអាចទិញសុភមង្គលបានពិតមែន
ហេតុអ្វីបានជាហ្វាំងឡង់ជាប់ឈ្មោះជាប្រទេសមានសុភមង្គលជាងគេបំផុតក្នុងលោក?
ដោយ៖ Kevin
ប្រភព៖ Entrepreneur
