បើអាចបែងចែក មួយណាកិច្ចការបន្ទាន់ និង មួយណាកិច្ចការសំខាន់ នោះអ្នកធ្វើអ្វីក៏សម្រេចដែរ
តើអ្នកធ្លាប់ឆ្ងល់ដែរទេថា ហេតុអ្វីអ្នកមានការទទួលខុសត្រូវលើគំនរកិច្ចការជាច្រើន ដែលសុទ្ធតែទាមទារអ្នកឲ្យបញ្ចប់វាឲ្យរួចរាល់ក្នុងពេលឥឡូវនេះ ? តើអ្នកប្រាកដចិត្តដែរទេថាអ្នកបានបែងចែកដាច់រវាងកិច្ចការបន្ទាន់ និងកិច្ចការសំខាន់ប្រកបដោយសុភវិនិច្ឆ័យហើយនោះ ? ត្រង់នេះប្រហែលជាលោក Tony Robbins គឺជាបុគ្គលដ៏ជោគជ័យមួយរូបដែលបានយល់ច្បាស់ពីភាពខុសប្លែកនេះហើយ ដោយបាននិយាយថា "មានមនុស្សភាគច្រើនបរាជ័យនៅក្នុងជីវិត ដោយសារពួកគេបានផ្ដល់ភាពសំខាន់លើរឿងដែលមិនសូវសំខាន់"។
ក៏ប្រហែលជាច្រើនលើកហើយ ដែលអ្នកតែងយល់ច្រឡំកិច្ចការបន្ទាន់ទាំងដែលមិនសូវសំខាន់ ជាមួយនឹងកិច្ចការសំខាន់បើទោះជាវាមិនបន្ទាន់ក្ដី។ កាលណាអ្នកបែងចែកមិនដាច់រវាងភាពខុសគ្នានូវកិច្ចការទាំងពីរប្រភេទនេះ ផលប៉ះពាល់អវិជ្ជមានរបស់វាក៏មានទៅលើលទ្ធផលការងាររបស់អ្នកដូចគ្នាដែរ។ តើអ្វីជាកិច្ចការបន្ទាន់ និងអ្វីជាកិច្ចការសំខាន់ ? កិច្ចការបន្ទាន់ គឺជាកិច្ចការទាំងឡាយណាដែលតម្រូវឲ្យអ្នកត្រូវធ្វើវាក្នុងពេលឥឡូវនេះ មុនពេលកំណត់មកដល់។ រីឯកិច្ចការសំខាន់ គឺជាកិច្ចការទាំងឡាយណាដែលបើទោះជាមិនបន្ទាន់ តែមានចំណែកដល់ការសម្រេចឲ្យបាននូវគោលដៅដ៏ចម្បងក្នុងរយៈពេលវែង ឬទស្សនវិស័យដ៏សំខាន់របស់អ្នក។ បើអ្នកបានមើលឃើញ និងយល់ច្បាស់ពីភាពខុសគ្នារវាងកិច្ចការបន្ទាន់ និងកិច្ចការសំខាន់ហើយ ការរៀបចំកិច្ចការរបស់អ្នកសម្រាប់បំពេញទៅតាមលំដាប់សំខាន់របស់វា គឺជារឿងងាយស្រួលមួយសម្រាប់ជំហានបន្ទាប់ទៅនេះ។ ដើម្បីសម្រេចកិច្ចការរបស់អ្នក ដែលឆ្លុះបញ្ចាំងពីការគ្រប់គ្រងប្រកបដោយប្រសិទ្ធផល និងការយល់ដឹងរបស់អ្នកចំពោះភាពខុសគ្នារវាងភាពបន្ទាន់ និងភាពសំខាន់ វិធីសាស្ត្រគ្រប់គ្រងការងារខាងក្រោមនេះគឺជាឧបករណ៍ដ៏ឈ្លាសវៃដែលអ្នកចាំបាច់ត្រូវប្រើប្រាស់៖
១) ដំបូងអ្នកត្រូវរាយឈ្មោះកិច្ចការដែលអ្នកត្រូវបំពេញទាំងប៉ុន្មាននៅលើក្រដាស បន្ទាប់មកកំណត់លំដាប់ភាពសំខាន់រៀងពីលំដាប់ទី១ដល់៥ ទាំងចំពោះភាពសំខាន់ និងភាពបន្ទាន់ ដែលលំដាប់ទី៥កំណត់ថាសំខាន់បំផុត ឬបន្ទាន់បំផុត។
២) ជំហានបន្ទាប់អ្នកត្រូវយកកិច្ចការដែលបានកំណត់រួចទាំងលំដាប់ភាពសំខាន់ និងភាពបន្ទាន់នោះហើយ មកបញ្ចូលនៅក្នុងទម្រង់ដូចដែលបានបង្ហាញក្នុងរូបភាពខាងលើ។
៣) ជំហានចុងក្រោយ អ្នកត្រូវពិចារណាថាតើអ្នកនឹងត្រូវដោះស្រាយបែបណាជាមួយកិច្ចការទាំងនោះ។ ដើម្បីឲ្យអ្នកអាចរៀបចំកិច្ចការទាំងនោះឲ្យស្ថិតនៅក្រោមការគ្រប់គ្រងរបស់អ្នកបានល្អ អ្នកត្រូវបែងចែក៤ផ្នែកផ្សេងគ្នា។
- ផ្នែកទី១ "ធ្វើឥឡូវនេះ" ៖ ក្នុងផ្នែកនេះកិច្ចការទាំងឡាយណាដែលស្ថិតក្នុងលំដាប់ទី៥ទាំងចំពោះភាពបន្ទាន់ និងភាពសំខាន់ អ្នកត្រូវយកមកដាក់នៅផ្នែកនេះទាំងអស់។ វាជាផ្នែកដែលផ្ដល់សញ្ញាដាស់តឿនដល់អ្នកថាត្រូវបំពេញវាឥឡូវនេះជាបន្ទាន់។
- ផ្នែកទី២ "មានកាលកំណត់" ៖ រីឯផ្នែកទី២នេះវិញ គឺសម្រាប់ដាក់បញ្ចូលនូវកិច្ចការទាំងឡាយណាដែលសំខាន់ តែមិនសូវបន្ទាន់។ អ្នកប្រាកដជាមិនចង់ឲ្យវាក្លាយមកជាកិច្ចការសំខាន់ហើយបន្ទាន់ដែរនោះទេ ដូច្នេះអ្នកមិនត្រូវពន្យារពេលធ្វើវានោះឡើយ គ្រាន់តែត្រូវទម្លាក់វាមកក្នុងលំដាប់ទី២ប៉ុណ្ណោះ។
- ផ្នែកទី៣ "ផ្ទេរការងារឲ្យអ្នកដទៃធ្វើជំនួស" ៖ តើអ្នកដឹងដូចម្ដេចបានថាការងារបែបណាដែលគួរផ្ទេរការទទួលខុសត្រូវឲ្យអ្នកដទៃធ្វើជំនួស ? គឺនៅពេលដែលការងារមួយនោះជាប្រភេទកិច្ចការបន្ទាន់ តែមិនសំខាន់ មិនសំខាន់ត្រង់ថាវាមិនបានរួមចំណែកដល់ការសម្រេចបាននូវទស្សនវិស័យចម្បងរបស់អ្នក ដែលទោះជាលទ្ធផលរបស់អ្នកដទៃក្នុងការងារនោះបែបណាក៏វាមិនប៉ះពាល់ដល់គោលដៅអ្នកដែរ។
- ផ្នែកទី៤ "ធ្វើពេលក្រោយ" ៖ តាមពិតកិច្ចការដែលនៅក្នុងផ្នែកនេះ មិនគួរស្ថិតនៅក្នុងឈ្មោះរាយនាមជាកិច្ចការដែលអ្នកត្រូវបំពេញនោះទេ ព្រោះវាមិនមានទាំងភាពបន្ទាន់ និងភាពសំខាន់សោះឡើយ។ សម្រាប់កិច្ចការបែបនេះ អ្នកត្រូវដាក់វានៅលំដាប់ក្រោមគេបង្អស់ក្នុងចំណោមកិច្ចការទាំងអស់៕
ប្រែសម្រួល៖ ស្រីពៅ ប្រភព៖ reinhardtsmit.nl
