អ្នកណាបង្កើតច្បាប់ផ្លាស់ប្ដូរប្រវត្តិសាស្ត្រពិភពលោកដំបូងបំផុត? ទឹកដីមួយនោះរលាយបាត់អស់ហើយ
តើបុគ្គលរូបណាដែលបានផ្លាស់ប្ដូរប្រវត្តិសាស្ត្រពិភពលោក ដោយការតាក់តែងបង្កើតច្បាប់ ដែលជាជញ្ជីងនៃសច្ចធម៌សម្រាប់ថ្លឹងថ្លែងផ្ដល់ភាពយុត្តិធម៌ដល់ប្រជាជននៅក្រោមការគ្រប់គ្រងរបស់ខ្លួន និងបានបង្កើននូវភាពវិសេសអស្ចារ្យ និងឥទ្ធិពលដ៏ខ្លាំងក្លាបង្ហាញពីអច្ឆរិយភាពនៃទឹកដីនៅក្នុងសម័យកាលរបស់ខ្លួន ?
ទីក្រុងបាប៊ីឡូន នៃទឹកដីមេសូប៉ូតាមី គឺជាទឹកដីដ៏ចំណាស់ និងមានឫទ្ធិអំណាចលេចធ្លោជាខ្លាំងក្នុងប្រវត្តិសាស្ត្រពិភពលោក ដែលអ្នកគ្រប់គ្រងនៃទឹកដីនេះ សុទ្ធតែជាស្ដេចដែលមានការដឹកនាំប្រកបដោយភាពឈ្លាសវៃ និងយុទ្ធសាស្ត្រដ៏មានប្រសិទ្ធភាពរៀងៗខ្លួន។ នាសម័យកាលដ៏យូរអង្វែងនោះមកហើយដែរ ស្ដេច Hammurabi (ឆ្នាំ១៨១០ដល់ឆ្នាំ១៧៥០មុនគ.ស) ជាស្ដេចដ៏មានឥទ្ធិពលបំផុតមួយរូបនៃទីក្រុងបាប៊ីឡូន ដែលបានតាក់តែងបង្កើតច្បាប់ នៅក្នុងទឹកដីរបស់ខ្លួនយ៉ាងមានឥទ្ធិពលបំផុត រហូតដល់គោលការណ៍ខ្លឹមសារក្នុងច្បាប់នោះ បានត្រូវបានយកមកប្រើប្រាស់នៅសម័យបច្ចុប្បន្នប្រៀបដូចជាក្បួនតម្រា សម្រាប់ថ្លឹងថ្លែងផ្ដល់ភាពយុត្តិធម៌ក្នុងជីវិតរបស់មនុស្សជាតិ។ ដោយសារភាពឈ្លាសវៃរបស់ទ្រង់សម្រាប់ទប់ទល់ជាមួយរាល់បុគ្គលដែលមិនគោរពច្បាប់ ដោយប្រើលេសដោះសាពីការមិនយល់ដឹងរបស់ខ្លួន ទ្រង់ក៏បានចារឹកច្បាប់តាក់តែងទាំង២៨២នៅលើផ្ទាំងថ្មកម្ពស់៨ហ្វុីតដោយមិនអាចរលុបបានងាយៗនោះឡើយ។
ម្យ៉ាងទៀត ដោយទ្រង់ឈ្វេងយល់ដឹងថា ច្បាប់នឹងប្រែក្លាយជាភាពគ្មានអត្ថន័យអ្វីនោះឡើយ ប្រសិនបើប្រជាជនមិនអាចអានវានោះ ដូច្នេះហើយបានជាការបង្កើតបណ្ណាល័យសាធារណៈសម្រាប់ផ្ដល់ការអប់រំដល់ទាំងបុរស និងស្ត្រីនៃប្រជាជនពួកគេត្រូវបានសង្កត់ធ្ងន់នូវការយកចិត្តទុកដាក់យ៉ាងដិតដល់ទៅលើពាសពេញទាំងទីក្រុងរបស់មេសូប៉ូតាមីនាសម័យនោះ។ មិនថាជាទឹកដី និងស្ដេចគ្រប់គ្រងអំណាចរបស់ពួកគេ មានឥទ្ធិពលអស្ចារ្យប៉ុណ្ណានោះទេ ទីបញ្ចប់ទៅ វត្តមានរបស់ទឹកដីបាប៊ីឡូនមិនមានភាពស្ថិតស្ថេរគង់វង្សនោះឡើយ ក៏ព្រោះតែការពឹងផ្អែកទៅលើការធ្វើស្រែចម្ការដ៏ចម្បងរបស់ប្រជារាស្ត្រ ហើយដីក៏ប្រែក្លាយជាខ្សត់ជីជាតិបន្តិចម្ដងៗ ពីមួយជំនាន់ទៅមួយជំនាន់រហូតត្រឹមឆ្នាំ២០០០មុនគ.ស ទឹកដីដែលធ្លាប់តែជាពំនឹងផ្អែកលើកសិកម្មរបស់ប្រជាជន ក្លាយជាវាលខ្សាច់ដែលអស់ជីជាតិ ទើបបង្កជាគ្រោះដ៏អកុសលរបស់ទឹកដីនេះដួលរលំបាត់មុខមាត់ចេញពីប្រវត្តិសាស្ត្រពិភពលោករហូតមកទល់សព្វថ្ងៃ៕
ប្រែសម្រួល៖ ស្រីពៅ ប្រភព៖ www.owlcation.com
