លក្ខណៈនៃការគិត៤យ៉ាងរបស់ខួរក្បាលបុគ្គលអ្នកប្រាជ្ញ
ពិតប្រាកដណាស់ថាមនុស្សម្នាក់ៗមានព្រហ្មលិខិតរបស់ពួកគេកំណត់មករៀងៗខ្លួន។ យ៉ាងណាមិញ ទស្សនវិទូបុរាណចិន ខុងជឺ បានពោលឡើងដូច្នេះថា៖ "បើអ្នកគិតចង់ធ្វើធំ អ្នកនឹងបានធ្វើធំ បើអ្នកចង់ទៅជាអ្វី អ្នកនឹងទៅជាយ៉ាងនោះ ដោយការប្រព្រឹត្ត មិនមែនដោយការរង់ចាំ ដោយការប៉ិនប្រសប់ ពុំមែនដោយសារតែឱកាស ដោយសមត្ថភាព ពុំមែនដោយសារជោគវាសនា បើធ្វើបានបែបនេះហើយ តើព្រហ្មលិខិតឯណាអាចយកឈ្នះក្ដីអំណត់ព្យាយាមបាន" ?
បុគ្គលប្រកបដោយប្រាជ្ញានិងគតិបណ្ឌិត មិនមែនព្រហ្មលិខិតជាអ្នកបង្កើតពួកគេមកទេ តែគុណតម្លៃទាំងនោះគឺកើតឡើងមកដោយកម្លាំងញើសឈាមរបស់ពួកគេទៅវិញទេ។ ការពិតនេះចង់សំដៅទៅដល់ថាអ្នកអាចផ្លាស់ប្ដូរជីវិតខ្លួនឯងបាន។ ប៉ុន្តែអ្នកក៏ត្រូវដឹងជាមុនផងដែរថា ចិត្តគឺជាអ្វីៗគ្រប់យ៉ាង។ រាល់ទង្វើនិងហេតុការណ៍ទាំងឡាយដែលកើតមានចំពោះអ្នក សុទ្ធតែកើតចេញពីចិត្ត និងការគិតរបស់អ្នកទាំងអស់។
ដូច្នេះ ដើម្បីផ្លាស់ប្ដូរព្រហ្មលិខិតដែលកំណត់ជីវិតអ្នក អ្នកចាំបាច់ត្រូវផ្លាស់ប្ដូរការគិតរបស់អ្នកចំពោះវាជាមុនសិន។ ផ្នត់គំនិតអន់ថយនឹងនិយាយថា ជីវិតជាអ្វីដែលមិនអាចផ្លាស់ប្ដូរបានព្រោះព្រហ្មលិខិតកំណត់មកដូចម្ដេច វានឹងទៅជាបែបនោះហើយ។ ដោយឡែក ផ្នត់គំនិតរីកចម្រើននឹងនិយាយថា គឺពួកគេខ្លួនឯងមិនមែននរណាទាំងអស់ ជាមនុស្សតែម្នាក់គត់ដែលអាចកំណត់ជីវិតពួកគេឲ្យទៅជាអ្វីដែលពួកគេចង់បាន គឺពួកគេខ្លួនឯងជាម្ចាស់នៃជីវិតខ្លួនឯង។ ត្រឡប់មកវិញ តើខួរក្បាលរបស់បុគ្គលអ្នកប្រាជ្ញទាំងឡាយមានទម្លាប់គិតដូចម្ដេច ?
១) ការជក់ចិត្តយ៉ាងងប់ងុលទៅលើអ្វីដែលពួកគេរៀនសូត្រ៖ បុគ្គលជោគជ័យរូបណាក៏តែងតែលើកឡើងពីជំនក់ចិត្តរបស់ពួកគេដែលជាប្រភពនាំទៅរកសមិទ្ធផលជោគជ័យក្នុងជីវិតដែរ។ ព្រោះតែហេតុអ្វីទៅ ? ការដើរបញ្ច្រាសពីបេះដូងរបស់ខ្លួនឯង វាមិនត្រឹមតែហត់នឿយទាំងផ្លូវកាយនិងផ្លូវចិត្តប៉ុណ្ណោះទេ ប៉ុន្តែវាពិបាកនឹងជំរុញអ្នកឲ្យជោគជ័យនិងមានក្ដីសុខបានណាស់។ បើកាលណាអ្នកដើរតាមបេះដូងខ្លួនឯង អ្នកមិនចេះហត់នឿយឡើយក៏ព្រោះតែអ្វីដែលអ្នកកំពុងធ្វើដុះដាលចេញមកពីជំនក់ចិត្តយ៉ាងងប់ងុលនោះឯង។
២) ជំនឿជឿជាក់ដ៏ខ្លាំងក្លាចំពោះគោលដៅដ៏ធំក្នុងជីវិត៖ ជំនឿគឺជាអ្វីដែលប្រៀបបានទៅនឹងភ្លើងដុតបញ្ឆេះចិត្តមនុស្សឲ្យពុះកញ្ជ្រោលជានិច្ចសម្រាប់ការសម្រេចនូវគោលដៅក្នុងជីវិត។ ជំនឿពិតថាគ្មានភ្នែកនោះទេ ប៉ុន្តែដរាបណាវាជាជំនឿត្រឹមត្រូវ ចេញពីការរិះគិតប្រកបដោយហេតុផលត្រឹមត្រូវ នោះវានឹងក្លាយជាប្រភពបំផុសចេញនូវសក្ដានុពលយ៉ាងអស្ចារ្យចេញពីខ្លួនអ្នកមិនខាន។
៣) ការផ្ចង់ស្មារតីរបស់ព្រះសង្ឃ៖ ធម្មជាតិនៃចិត្តរបស់មនុស្ស តែងប្រព្រឹត្តទៅដោយរវើរវាយនិងឥតសណ្ដាប់ធ្នាប់ ដែលជាឫសគល់នៃសេចក្ដីទុក្ខទាំងឡាយ។ បើអ្នកមិនអាចធ្វើជាម្ចាស់គ្រប់គ្រងទៅលើចិត្តរបស់ខ្លួន នោះអ្នកពិតជាមិនអាចផ្ចង់ស្មារតីផ្ដោតទៅលើផ្លូវដែលខ្លួនកំពុងដើរដែលនាំអ្នកទៅដល់គោលដៅបាននោះឡើយ។ សេចក្ដីស្ងប់នឹងនាំមកនូវលទ្ធផលការងារប្រកបដោយគុណភាពនិងប្រសិទ្ធភាព។
៤) ការងឿងឆ្ងល់របស់កូនក្មេង៖ គុណសម្បត្តិនៃការដាក់ខ្លួន ការទទួលស្គាល់នូវភាពល្ងង់ខ្លៅរបស់ខ្លួន និងការបើកចំហចិត្តទូលាយរៀនសូត្រពីចំណេះដឹងជុំវិញខ្លួនអ្នក ទាំងនេះហើយគឺជាលក្ខណៈរបស់បុគ្គលអ្នកប្រាជ្ញគ្រប់រូបមានដូចៗគ្នា។ អ្នកត្រូវចេះបង្កើតសំណួរមួយជារឿយៗថា "ហេតុអ្វី?"។ សំណួរតែមួយ តែវានឹងនាំអ្នកទៅរកឃើញដល់ឫសគល់របស់ធម្មជាតិនៃអ្វីៗទាំងឡាយ ហើយចំណេះដឹងអ្នកនឹងកាន់តែទូលាយចំពោះពិភពលោកនេះ៕
ប្រែសម្រួល៖ ស្រីពៅ ប្រភព៖ pickthebrain
